Вазорати корҳои дохилӣ аз боздошти як ҷавонзани 19-сала дар шаҳри Конибодом хабар дод, ки ӯ бо роҳи таъмаъҷӯӣ аз мардон пул меситонидааст.
ВКД мегӯяд, пас аз шикояти як марди 30-сола кормандони милитсияи шаҳри Конибодом амалиёти ҷустуҷӯӣ гузаронида ва ин ҷавонзанро боздошт карданд.
Бино ба иттилои тафтишотии ВКД, гумонбар бо ҷабрдида, ки телефонӣ мобилӣ мефурӯхтааст, моҳи августи соли 2024 дар шаҳри Хуҷанд ҳангоми харидани телфон ошно шудааст.
Дар шарҳи хабар гуфта мешавад: “Ҷавонзан 14-уми август соатҳои яки шаб ба ин мард бо “Ватсап” занг зада, хохиш мекунад то либосҳояшро кашида баданашро ба ӯ нишон диҳад, ин ҷавонзан бо “скриншот” кардан аз ӯ акс мегирад ва баъдан ин мардро таҳдид мекунад, ки ба ӯ маблағ диҳад дар ғайри ин сурат аксҳои урёни беобрукунандаи ӯро паҳн мекунад.”
“Бо ваъдаи пок кардани аксҳо аз ҷабрдида 1000 сомони мегирад бо ин қаноат накарда, такроран 15-уми август боз занг зада 300 сомони дигар талаб карда мегирад.”, омадааст дар хабари ВКД.
Гуфта мешавад, нисбати гумонбаршаванда парвандаи ҷиноятӣ бо қисми 1 моддаи 250 Кодекси ҷиноятии Ҷумҳурии Тоҷикистон оғоз шуда, тафтишот идома дорад. Ин банди қонун барои муҷрим аз 5 то 10 соли зиндонро пешбинӣ мекунад.
Вале назари гумонбар ва ё ҷабрдида дар бораи қазияи мазкур расонаӣ нашудааст.
Бархе мегӯянд, ҳолатҳое вуҷуд дорад, ки кормандони поёнии сохторҳои қудратӣ, аз ҷумла КДАМ ва ВКД барои пул кор кардан духтаронеро омода мекунанд, ки бо мардон ошно шаванд ва сипас бо чунин тариқ акс гирифтан он мардонро ба ҷанголи худ дармеоваранд ва дар ниҳоят чунин мардон аз тарси беобрӯ ва ё зиндонӣ шудан бо додани пули зиёд ҷони худро мехаранд.
