Мақомоти муҳоҷирати Иёлоти Муттаҳида як ҷавони 28-солаи тоҷикро бо гумони будубоши ғайриқонунӣ дар ин кишвар боздошт кардаанд. Дар ин бора Радиои Озодӣ бо истинод ба наздикони ӯ хабар додааст.
Ба навиштаи Радиои Озодӣ, боздоштшуда Улуғбек Элов ном дошта, бо номи Иброҳим низ шинохта мешавад. Ӯ зодаи шаҳри Душанбе буда, дар яке аз боздоштгоҳҳои муҳоҷирати Амрико нигоҳдорӣ мешавад.
Ба гуфтаи наздиконаш, Элов ҳуҷҷати қонунии иқомат дар Амрикоро надоштааст ва ба ҳамин сабаб аз ҷониби мақомоти муҳоҷират боздошт шудааст. Интизор меравад, парвандаи ӯро додгоҳи муҳоҷират баррасӣ кунад ва дар бораи ояндаи будубошаш дар Иёлоти Муттаҳида қарор қабул намояд.
Наздикони боздоштшуда ҳамчунин изҳори нигаронӣ кардаанд, ки дар сурати ихроҷи ӯ ба Тоҷикистон, эҳтимол бо мушкилот рӯбарӯ шавад. То ҳол мақомоти Тоҷикистон дар ин бора изҳори назар накардаанд.
Ҳамчунин мақомоти Амрико низ то имрӯз дар бораи боздошти Улуғбек Элов ё ҷузъиёти парвандаи ӯ изҳороти расмӣ нашр накардаанд.
Ин ҳодиса дар ҳолест, ки солҳои охир мақомоти муҳоҷирати Амрико назоратро бар муҳоҷирони бе ҳуҷҷати иқомат сахттар карда, боздошт ва ихроҷи онҳо аз кишварро бештар намудаанд.
