Рӯзи 28-уми апрел дар марзи Тоҷикистону Қирғизистон, сари нуқтаи тақсимоти об дар қаламрави баҳсӣ, ки ҳарду аз кишварҳо онро азони худ медонанд, низои хунине оғоз ёфт. Даргирӣ дар деҳаи Хоҷаи Аълои ҷамоати Чоркӯҳи шаҳри Исфара сари нуқтаи обтақсимкунии “Головной” сар зад, ки ҷониби Тоҷикистон мехоста дар он камераҳои назоратӣ насб кунад.
Ин минтақа бо минтақаи Оқсойи ноҳияи Бодканди Қирғизистон ҳаммарз аст. Душанбе иддао дорад, ки низомиёни Қирғизистон кӯшиши забт кардани иншоотро бо истифодаи силоҳ кардаанд. Аммо Бишкек меӯяд, ки марзбонони тоҷик аввал оташ кушодаанд.
Субҳи 29-уми апрел то шоми он рӯз дар марзи Тоҷикистону Қирғизистон, задухӯрди шадиди мусаллаҳона сурат гирфит. Дар натиҷаи ин муноқишаи марзӣ 183 шаҳрванди Қирғизситон маҷруҳ шуда, 36 нафар ҷон бохта аст. Маълумоти расмӣ дар бораи қурбониён аз Тоҷикистон ироа намешавад. “Радиои Озодӣ” то кунун номи 18 нафар аз қурбониёни ин муноқишаро маълум карда, ки 10 тоашон низомиён ва 8 тои дигар ғайри низомӣ будаанд.
Вазирони корҳои хориҷии Қирғизистон ва Тоҷикистон дар шоим 29 апрел барои оташбас дар марз ба созиш расиданд. Ва эълом шуд, ки рӯзи 29 апрел соати 20:00 ба вақти маҳаллӣ (17:00 ба вақти Маскав) оташбаси қатъӣ сурат бигирад ва нерӯҳои мусаллаҳро ба ҷойҳои истиқомати қаблии худ бозгардонанд.
Дертар дар рӯзи шанбе якуми май раҳбарони кумитаҳои амнияти милии Тоҷикистону Қирғизистон дар наворе аз ба тавофуқи комили оташбас расидан хабар доданд.
Саймумин Ятимов ва Қамчибек Тошиев ба рӯзноманигорон гуфтанд, ки тавофуқи оташбас ҳосил шудааст ва ба зудӣ артиши ҳарду кишвар аз марзҳо дур бурда мешаванд. Ба гуфтаи Тошиев тавофуқнома аз 4 банд иборат аст, аммо ҷузъитёти он шарҳ дода нашуд.
Тибқи иттилои Кумитаи ҳолатҳои фавқулодаи Тоҷикистон дар рӯзи 3-юми май дар муноқишаи ахири марзӣ дар ҳудуди се ҷамоати Исфара 14 хона комилан ва 2 манзили зист қисман вайрон шуданд. Як иншооти ёрирасон низ зарар дидааст. Ҳамзамон қисман як мактаби миёна ва хонаи истиқоматӣ дар деҳаи Овчӣ-Қалъачаи ноҳияи Бобоҷон Ғафуров тахриб гардидааст. Раиси вилояти Суғд гуфт, хонаҳои вайроншударо то як моҳи дигар месозанд.
Мақомоти Қирғизистон мегӯянд, дар натиҷаи муноқиша дар марз бо Тоҷикистон 78 манзил, ду мактаб, як нуқтаи тиббӣ, се дидбонгоҳи марзӣ, як боғча, 10 нуқтаи фурӯши сӯзишворӣ, бинои шуъбаи корҳои дохилӣ ва 8 мағоза оташ гирифтааст. Қирғизистон ният дорад ин хонаҳоро то ҳамин тирамоҳ барқарор кунад.
Бо вуҷуди расидан ба оташбас дар майдони ҷанг, ҳанӯзҳам даъвоҳо бар болои аз сӯи кӣ оғоз шудани низоъ идма дорад. Ба гуфтаи коршинос Даниил Кисилев дар хабаргузории Фергана, “пас аз задухӯрдҳои хунин дар марз, ҳам мансабдорони Бишкек ва ҳам васоити ахбори умуми Қирғизистон ҳама чизи имконпазирро ба харҷ медиҳанд, то Қирғизистонро ҳамчун қурбонии таҷовузи Тоҷикистон муаррифӣ кунанд”. Ҳоло ба иттилои Галина Байтерек, сухангӯи президенти Қирғизистон, ҷониби Қирғизистон мехоҳад барои рӯзноманигорони расонаҳои байналхалқӣ ба вилояти Бодканд сафари корӣ ё пресс-тур ташкил кунад. Рӯзноманигоронро ба мавзеҳое дар марзи Тоҷикистону Қирғизистон мебаранд, ки дар натиҷаи муноқишаи марзӣ зиён дидаанд. Байтерек мегӯяд, “Мо рӯзноманигоронро ба он хотир ба он ҷо мебарем, ки иттилои ростинро ба ҷомеаи ҷаҳонӣ расонем. Дар ҷои ҳодиса он чиро ки гузашт ба рӯзноманигорон нишон медиҳему шарҳ медиҳем. Онҳо бо чашмони худ ҳама чизро мебинанд ва хулоса мебароранд”.
То кунун 26 рӯзноманигор аз 20 расона, ки 10 расонаи он байналхалқӣ аст, барои рафтан ба Бодканд сабти ном кардаанд.
