Президенти Тоҷикистон 62 нафар аз судяҳои кишварро ба сурати фаврӣ аз як вазифа озод карда, ҳамон лаҳза дубора ба вазифаҳои нав таъйин кард.
Бино ба иттилои Хадамати матбуоти Президенти Тоҷикистон, имрӯз, 6-уми декабри соли 2022 "Эмомалӣ Раҳмон бо кадрҳое, ки ба вазифаҳои судяи судҳои шаҳриву ноҳиявӣ ва судҳои вилоятиву шаҳри Душанбе таъйин гардиданд, мулоқот намуд."
Ба қавли манбаъ, Президенти Тоҷикистон 62 нафар аз судяҳои шаҳру ноҳияҳ, вилоятҳо ва шаҳри Душанберо ба сурати фаврӣ дар як ҷаласа аз вазифа озод ва сипас ба вазифаҳои нав дар дигар мақомоти судӣ гузошт.
Инчунин Эмомалӣ Раҳмон якуякбора имрӯз 68 нафари дигарро ҳам, ки аксари онҳо "ҷавон" гуфта шудаанд, "яклӯхт" дар курсиҳои мухталифи мақомоти судии шаҳру ноҳияҳои кишвар таъйин кард.
Бар иловаи ин 130 нафар, ки вазифаи нав ё курсиҳои худро иваз карданд, фармон дод, ки :"Идрисзода Балаҷон Алиҷон бо сабаби ба кори дигар гузаштан аз вазифаи судяи суди Шаҳринав,
Саидзода Муҳаббат Шерали бо сабаби расидан ба синни ниҳоии дар вазифаи судя будан аз вазифаи раиси суди ноҳияи Шаҳринав,
Назри Мухаммадвали бо хоҳиши худаш аз вазифи муовини раиси суди вилояти Хатлон озод карда шаванд."
Гуфта мешавад, дар кишваре чун Тоҷикистон аксари вазифаҳо, бо пул хариду фурӯш мешаванд ва ҳамаи онҳо нархҳои муайни худро доранд. Мақомоти судӣ низ истисно нестанд. Дар ин мақомот тақдири аксари парвандаҳои маъмурӣ ва ҷиноятиро пул ҳал мекунад.
Ба ҳамин хотир, хеле аз коршиносони ҳуқуқӣ мегӯянд, як судя ҳуқуқ дорад то панҷ сол дар як курсӣ адои вазифа кунад, вале чун тағйироти кадрӣ дар Тоҷикистон "ба як тиҷорати сердаромад" табдил шудааст, Эмомалӣ Раҳмон пеш аз муҳлат ва ҳатто як сол нагузашта хеле аз судяҳоро аз вазифаҳои ишғолкардаашон озод мекунад.
Инчунин аксари онҳое, ки ба вазифаҳои нав таъйин мешаванд, ба хусус кадрҳои ҷавон фарзандон ва ё наздикону пайвандони онҳое ҳастанд, ки дар ниҳодҳои болоӣ кор мекунанд ва ё воситае доранд. Ба ин хотир озод кардан ва ба вазифаи нав таъйин кардани онҳо ба манфиату маслиҳати мансабфурӯшҳо ва дар раъси онҳо худи президент Эмомалӣ Раҳамон аст, ки аз мақоми президентиаш сӯиистифода мекунад.
Амруллоҳи Низом, махсус барои Azda tv
