-3.1 C
Dushanbe

CPJ аз мақомот озодии Далер ва дигар рӯзноманигорони зиндониро талаб кард

Кумитаи дифоъ аз хабарнигорон (CPJ) бо нашри баёнияе барои 10 сол равонаи зиндон кардани рӯзноманигор ва блогери тоҷик Далери Имомалиро маҳкум кард ва хостори озоди ӯ шуд.

Гулноза Саид, ҳамоҳангсози барномаҳои CPJ дар Аврупо ва Осиёи Марказӣ мегӯяд, ки ҳукми сангини Далери Имомалӣ нишон дод, ки мақомоти Тоҷикистон аз оғоз бо парванда алайҳи ин рӯзноманигор мехостанд нишон бидиҳанд, ки журналистикаи интиқодии ҷамъиятӣ  ғайриқобили қабул аст. Ба гуфтаи ӯ, афзоиши фишор болои расонаҳои тоҷик барои ҷорӣ кардани худсонсурӣ мебошад.

Дар идома CPJ аз мақомоти Тоҷикистон талаб кардааст, ки Далери Имомалӣ ва тамоми рӯзноманигорони дигарро, ки ҳоло барои корашон зиндонӣ шудаанд, фавран озод кунанд ва аз сӯиистифода аз додгоҳ барои “террор”-и боқимондаи матбуоти мустақили кишвар даст кашанд.

Мақомот блогер ва рӯзноманигори шинохтаи тоҷик Далери Имомалиро рӯзи 15-уми июн боздошт ва баъдан ӯро ба соҳибкории ғайриқонунӣ, расондани хабари дурӯғ ва узвият дар созмонҳои мамнуъ “Гурӯҳи-24” муттаҳам кард. Худи Далер дар бозпурсиҳо иттиҳоми соҳибкории ғайриқонуниро қабул карда, вале ҳамкориро бо созмонҳои мамнуъ напазируфтааст. Ҳамзамон Ҳаракати сиёсии “Гурӯҳи 24” ҳама гуна ҳамкорӣ бо Далери Имомалиро рад карда буд.

Дар мурофиаи охир, ки шоми 17-уми октябр дар Боздошгоҳи муваққатии шаҳри Душанбе баргузор шуд, додрас Даврон Назарзода ин рӯзноманигори ҷавонро барои 10 сол аз озодӣ маҳрум кард. Пештар айбдоркунандаи давлатӣ аз додрас барои Далер 10,5 соли зиндонро талаб карда буд.

Бино ба иттилои манобеи Радииои Озодӣ, Далери Имомалӣ дар сухани охиринаш аз додгоҳ хост, “нисбаташ ҳадди камтарини ҷазо таъйин кунанд”. Аммо ин талаби рӯзноманигор қабул нашуд ва додгоҳ барои ӯ ҷазои вазнин таъйин кард.

Далери Имомалӣ 10 солро дар зиндони низомаш пурзӯр сипарӣ мекунад ва дар баробари он бояд 12 ҳазору 800 сомонӣ ҷарима супорад.

То ҳол ба расонаҳо маълум нест, ки Далери Имомалӣ дар додгоҳ ба ин иттиҳомот чӣ гуна вокуниш нишон додааст ва оё ӯ қасд дорад аз болои ин ҳукм шикоят барад ё не.

Далери Имомалӣ ва Абдуллоҳ Ғурбатӣ, хабарнигори дигари зиндонӣ, ки ба 7,5 соли зиндон маҳкум шуда буд, то замони боздошташон дар шабакаи ютубии “Daleri Imomali”, ки 150 ҳазор обуна дошт фаъолият намуда дар он гузоришҳое, ки вобаста ба масъалаҳои иҷтимоӣ ва шикояти шаҳрвандон аз болои мақомот буд, таҳия мекарданд.  

Кумитаи дифоъ аз хабарнигорон менависад, ки Далери Имомалӣ ва Абдуллоҳ Ғурбатӣ аз ҷумлаи шаш рӯзноманигоре мебошанд, ки ҳоло дар Тоҷикистон бо иттиҳоми ҷиноии сангин пушти панҷара нишастаанд ва мақомот аз онҳо барои гузоришҳояшон интиқом гирифтаанд.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Аз Насимҷон Шарифов то ҳол хабаре нест

Бо гузашти се рӯз аз Насимҷон Шарифов, намояндаи Ҳаракати...

Мудири шуъбаи “Қаряи Боло” боздошт шуд

Мудири шуъбаи беморхонаи "Қаряи Боло"-и пойтахт бо иттиҳом даст доштан дар тасарруфи беш аз 70 ҳазор сомонӣ боздошт шудааст.

Як сарбози амрикоӣ дар назди сафорати Исроил худро оташ зад

Рӯзи якшанбе, 25-уми феврали соли ҷорӣ як сарбози нерӯҳои ҳавоии Амрико дар назди сафорати Исроил дар Вашингтон худро оташ зад.

Музокироти пинҳонии Тоҷикистон бо Толибон

Мақомоти Тоҷикистон бо намояндаҳои Толибон ба сурати пинҳонӣ дар шаҳри Душанбе мулоқот кардаанд.