Мақомоти корҳои дохилии Тоҷикистон аз боздошти як зан бо гумони даст доштан дар қатли як марди 61-сола дар шаҳри Душанбе хабар доданд.
Ба иттилои Вазорати корҳои дохилӣ, кормандони мақомоти ҳифзи ҳуқуқи ноҳияи Фирдавсӣ ҷинояти одамкуширо ошкор намуда, як зани 34-сола бо номи Шарофати Ҷамолиддинро ҳамчун гумонбар дастгир кардаанд.
Тибқи маълумоти тафтишоти пешакӣ, шаби 13-уми июн гумонбар ҳамроҳ бо Иноятов А., сокини 61-солаи пойтахт, дар манзили иҷоравӣ воқеъ дар кӯчаи Назрибеков нӯшокиҳои спиртӣ истеъмол мекарданд. Ба гуфтаи мақомот, миёни онҳо дар ҳолати сархушӣ муноқиша сар задааст.
Гуфта мешавад, дар пайи ин муноқиша зан бо истифода аз корди ошхона ба узвҳои гуногуни бадани мард зарба зада, ӯро ба ҳалокат расондааст. Мақомоти тафтишотӣ мегӯянд, гумонбар ҳоло дар ҳабси пешакӣ қарор дошта, тафтиши ҳодиса аз ҷониби додситонии ноҳияи Фирдавсӣ идома дорад.
Назари гумонбар ё наздикони ӯ дар робита ба ин қазия дастрас нест.
Ба гуфтаи мақомоти ҳифзи ҳуқуқ, дар бисёре аз ҷиноятҳои вазнин, аз ҷумла одамкушӣ ва расонидани зарари ҷиддӣ ба саломатӣ, истифодаи нӯшокиҳои спиртӣ ва ё маводи нашъовар яке аз омилҳои асосии сар задани муноқишаҳо номида мешавад. Коршиносон мегӯянд, афзоиши чунин ҳодисаҳо нигаронкунанда буда, зарурати тақвияти корҳои пешгирикунанда ва баланд бардоштани огоҳии ҷомеаро бештар мекунад.
