Субҳи имрӯз Рафоат Абдусаломова, нахустин ровии телевизиони Тоҷикистон аз олам чашм пӯшид.
Бино ба иттилои наздикону пайвандони марҳум, бомдори имрӯз, 24-уми октябри соли 2023 рӯзноманигор ва ровии шинохта Рафоат Абдусаломова дар синни 84-солагӣ дар шаҳри Душанбе даргузашт
Бону Рафоат Абдусаломова бо вуҷуди кӯҳансол будан, яке аз корбарони шабакаҳои иҷтимоӣ ва бахсус Фейсбук буд. Вай дар хеле аз мавридҳо ва масоили иҷтимоӣ дар Тоҷикистон аз тариқи ҳамин саҳфаи худ изҳори назар мекард.
Субҳи имрӯз наздикону пайвандони бону нахустиншуда хабари марги ӯро тавассути саҳфаи корбарии худи Рафоат Абдусаломова дар Фейсбук нашр карда, гуфтанд: “Имрӯз соати 04:30 аввалин наттоқи телевизион, журналист, Корманди хизматнишондодаи фарҳанги Ҷумҳурии Тоҷикистон Рафоат Абдусаломова аз олам гузашт.”
Гуфта мешавад, бону Рафоат Абдусаломова собиқаи 45 соли кор дар телевизиони Тоҷикистонро дошт. Дар давоми зиёда аз ин чор даҳа дар зинаҳои гуногуне кор карда, ровӣ ва муаллифи чандин барномаҳо, аз ҷумла “Дугонаҳо”, “Гулдаста”, “Ватан ва фарзандон”, “Муҳаббат ва оила”, “Гулдухтарон”, “Дилафрӯз” ва ғайра буд.
Маросими гиромидошт ва хайрухӯш бо бону Рафоат Абдусаломова зуҳри имрӯз, соати 12:00 дар кӯчаи Мирзо Турсунзода 8, ҳуҷраи 44 дар шаҳри Душанбе баргузор шуд.
Ба қавли википедианависони тоҷик, бону “Рафоат Абдусаломова 10 марти соли 1939 дар ҷамоати деҳоти Пӯлодони ноҳияи Конибодом таваллуд шуда, соли 1963 Донишгоҳи давлатии Тоҷикистон ба номи В. И. Ленинро хатм кардааст. 3 октябри соли 1959 нахустин барномаи санҷишии Телевизиони Тоҷикистонро ба забони тоҷикӣ ба тамошобинон пешкаш намуд.”
Вай дорандаи ҷоизаҳое ба монанди “Корманди шоистаи маданияти Тоҷикистон (1989), Грамотаи Фахрии Президиуми Совети Олии ҶШС Тоҷикистон, Нишони сарисинагии “Аълочии телевизион ва радиои СССР” мебошад.
