Хабар
ТОҶИКИСТОН ҶОМЕА
Марги як хонанда дар Данғара ва барканории нозири БДА
Додситонии ноҳияи Данғара садамаеро таҳқиқ мекунад, ки боиси марги як хонандаи мактаб шудааст.
Додситонии ноҳияи Данғара садамаеро таҳқиқ мекунад, ки боиси марги як хонандаи мактаб шудааст. Дар робита ба ин ҳодиса нозири Бозрасии давлатии автомобилӣ Тавфиқ Одинаев муваққатан аз кор дур карда шудааст.
Ба иттилои Радиои Озодӣ, садама рӯзи 12-уми ноябр дар деҳаи Ёхсу рух дода, додситонии ноҳия парвандаи ҷиноӣ боз кардааст.
Дар бораи шароити ҳодиса маълумоти зиддунақиз вуҷуд дорад. Шоҳиде рӯзи 16-уми ноябр ба Озодӣ гуфтааст, Одинаев мошинеро таъқиб мекард, ки ба амри ӯ итоат накарда буд. Ба иддаои ӯ, нозир дар маҳалли аҳолинишин бо суръати баланд ҳаракат дошт.
Аммо манбаи наздик ба тафтишот таъқибро рад карда, гуфтааст, нозир дар сафари хидматӣ буд. Ӯ ҷузъиёти бештар надодааст. Ҳар ду манбаъ нахостаанд номашон ошкор шавад.
Мавқеи худи Одинаев дастрас нест. Озодӣ мегӯяд, рӯзи 16-уми ноябр чанд бор ба ӯ занг задааст, вале телефонаш хомӯш буд. Ба навиштаи расона, ВКД низ бо гузашти чор рӯз дар бораи садама иттилоъ надодааст.
Ҳанӯз маълум нест, тафтишот кадом ривоятро тасдиқ мекунад. Ҳоло нозири БДА ҳамчун гумонбар аст ва муваққат аз кораш дур карда шудааст.
Ин ҳодиса дар пасманзари талафоти зиёди садамаҳои роҳ рух додааст: тибқи омори ВКД, дар нимсолаи аввали 2026 дар Тоҷикистон 287 нафар дар садамаҳо фавтида, 508 нафар маҷруҳ шудаанд.