Муҳоҷирони тоҷик дар Олмон аз даргузашти як ҳамватани худ бо номи Усмонов Собитхон хабар додаанд. Ба гуфтаи онҳо, ӯ рӯзи 11 июл аз дунё гузаштааст.
Ба иттилои ҳамватанон, марҳум ҳамчун ронандаи мошини боркаш фаъолият мекард ва соҳиби се фарзанд будааст. Ҳоло ҷасади ӯ дар сардхонаи яке аз муассисаҳои тиббии Олмон нигоҳдорӣ мешавад.
Муҳоҷирони тоҷик барои интиқоли ҷасади марҳум ба Тоҷикистон маъракаи ҷамъоварии маблағро оғоз карда, аз ҳамватанон даъват намудаанд, ки дар ин кори хайр саҳм гузоранд.
То ҳол сабаби марги Усмонов Собитхон расман эълон нашудааст ва мақомоти Олмон низ дар ин бора маълумоти иловагӣ нашр накардаанд.
Дар солҳои охир, бо сахттар шудани қонунҳои муҳоҷират дар Русия, ки яке аз самтҳои асосии муҳоҷирати меҳнатии шаҳрвандони Тоҷикистон ба шумор мерафт, теъдоди зиёде аз муҳоҷирони тоҷик барои пайдо кардани ҷойи кор ва беҳтар кардани шароити зиндагӣ ба кишварҳои Аврупо, аз ҷумла Олмон, муҳоҷират кардаанд.
