Дастаи мунтахаби футболи Тоҷикистон дар радабандии ФИФА як зина боло рафт

Федератсияи байналмилалии ассотсиатсияҳои футбол (ФИФА) имсол рейтинги нави тимҳои миллиро нашр кард. Дастаи мунтахаби Тоҷикистон бо 1144 хол дар ҷои 120-ум қарор дорад. Дар ин бора ФФТ хабар дод.

Бино ба иттилои сомонаи расмии ФФТ дастаи мунтахаби Тоҷикистон бо Урдун дар Дубай 2 бозии дӯстона анҷом додааст.

Ёдовар мешавем, ки Тоҷикистон бозии навбатии худро бо дастаи Муғулистон дар тури ҳафтуми даври дуюми мусобиқаи интихобии Ҷоми Ҷаҳонии 2022 дар гурӯҳи F анҷом медиҳад. Вохӯрӣ рӯзи 25 март дар Варзишгоҳи марказии Душанбе соати 18:00 баргузор мешавад.

Дастаи мунтахаби футболи Тоҷикистон дар радабандии моҳи декабри соли гузашта бо доштани 1143 хол дар ҷойи 121-ум қарор дошт. Метавон гуфт, ки тими футболи Тоҷикистон дар раддабандии нав 1 зина боло рафтааст.

Дастаи мунтахаби футболи Тоҷикистон дар Осиё мақоми 22-юмро ишғол мекунад. Дар Осиё зинаи аввалро бо 1502 хол тими Ҷопон (зинаи 27-ум дар ҷаҳон), мақоми дуюмро бо касби 1496 имтиёз дастаи Эрон (29-ум дар ҷаҳон) ва ҷойи сеюмро Кореяи Ҷанубӣ бо 1465 хол (38-ум дар ҷаҳон) касб кардаанд.

Байни кишварҳои минтақаи Осиёи Марказӣ мунтахаби Ӯзбекистон дар зинаи аввал, дар Осиё - ҷойи 12-ум ва дар ҷаҳон дар мақоми 85-ум ҷойгир шудааст.

Дар ҷаҳон бошад дар мақомҳои якум ва дуюм Белгия ва Фаронса бо доштани 1780 ва 1755 хол ҷойгиранд

Рейтинги ФИФА аз соли 1993 ба ин сӯ тартиб дода мешавад. Имтиёзҳо ба кишвар аз рӯйи натоиҷи дастаи мунтахаби миллӣ дар давраи 4 сол дода мешавад.

Дар таърихи рейтинги ФИФА танҳо 8 дастаи миллӣ дар ҷойи аввал қарор доштаанд, ки аз онҳо 6 тимаш аз Аврупо - Олмон, Италия, Фаронса, Испания, Нидерланд, Белгия ва 2 тими дигар аз Амрикои Ҷанубӣ - Бразилия ва Аргентина мебошанд.

Дастаи мунтахаби Тоҷикистон дар таърихи вуҷуд доштани рейтинги ФИФА бореҳам ба рӯйхати 100-гона дохил нашудааст. Натиҷаи беҳтарини он дар феҳристи ФИФА ҷойи 106-ум дар моҳи июни соли 2013 ва натиҷаи бадтаринаш ҷойи 180-ум дар соли 2003 мебошад.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.