16.9 C
Dushanbe

Душмании Хадамоти матбуоти Президент ба Эмомалӣ Раҳмон

Хадамоти матбуоти Президинети Тоҷикистон бо нашри як навор дар бораи маротибаи панҷум умра кардани Эмомалӣ Раҳмон мусалмон будани ӯро зери суол бурдааст.

19-уми июли соли 2023 Хадамоти матбуоти Президенти бо нашри як гузориши видеоӣ дар телевизиони Тоҷикистон ва шабакаҳои иҷтимоӣ аз умра кардани Эмомалӣ Раҳмон ва ҳайати ҳамроҳонаш дар шаҳри Маккаи Мукаррама хабар дод.

Дар оғози ин гузориш пас аз намои зоҳирии Каъба нишон дода мешавад, ки Эмомалӣ Раҳмон ҳамроҳ бо тарҷумонаш, раиси Кумитаи дин, сафири Тоҷикистон дар Арабистони Саудӣ, сафири Арабистони Саудӣ дар Тоҷикистон, раҳбари муҳофизонаш ва дигарон аз пилла пойин мешаванд. Дар ҳамин вақт бо садои баланд қироати Қуръон оғоз мешавад, ки маънояш чунин аст: “Танҳо тасаллути шайтон бар касонест, ки ӯро дӯст гирифтаанд ва касоне, ки ба Худо ширк меварзанд.” (сураи Наҳл, ояти 100)

Ровии ин гузориш бо беэҳтиромии хоссе нисбат Қуръони Карим, ки “Худо мефармояд, Вақте Қуръон хонда шавад, хомӯш истода ва ба он гӯш диҳед” (сураи Аъроф, ояти 204) садои тиловати Қуръонро пасттар карда, худаш бо садои баланд дар бораи ин сафари Эмомалӣ Раҳмон гузоришашро оғоз мекунад.

Вақте дар навор Президенти Тоҷикистон ва ҳайати ҳамроҳонаш вориди Каъба мешавад ва аз он берун мебароянд, садои ровӣ хомӯш ва қироати ояти 104-и сураи Наҳл баланд мешавад, ки тарҷумааш чунин аст: Медонем, ки мегӯянд:“Ин Қуръонро башаре ба ӯ меомӯзад”. Забони касе, ки ба ӯ нисбат мекунанд, аҷамист, ҳол он ки ин забони арабии равшанест.”

Ҷолиб он аст, ки вақте Эмомалӣ Раҳмон ба назди Ҳаҷаруласвад (санги сиёҳ) рафта, сарашро ворид мекунад, то ӯро бибӯсад, дар ҳамин вақт садои қироати ояти 105 аз ин сураи муборака баланд мешавад, ки тарҷумааш чунин аст: “Худо касонеро, ки ба оёташ имон намеоваранд, ҳидоят намекунад ва барояшон азобе дардовар муҳайёст.

Инчунин дар ин навор нишон дода мешавад, ки Эмомалӣ Раҳмон ва ҳайати Тоҷикистон дар атрофи Каъба тавоф мекунанд ва дар ҳамин вақти тавоф кардан садои қироати ояти 106 сураи Наҳл садо медиҳад, ки мефармояд: “Касоне дурӯғ мебофанд, ки ба оёти Худо имон надоранд, инҳо худ дурӯғгӯянд.

Дар охир вақте дар навор нишон дода мешавад, ки пас аз саъй кардан байни Сафо ва Марва Эмомалӣ Раҳмон аз дохили меҳмонхонае ба сӯи Масҷиди Ҳаром ва саҳни Каъба назорра дорад, ин оятҳои таҳдидомез садо медиҳанд: “Ва азоби бузург барояшон муҳайёст. Ва ин ба он сабаб аст, ки инҳо зиндагии дунёро бештар аз зиндагии охират дӯст доранд...”

Гуфта мешавад, дар мусалмон будани кормандони Хадамоти матбуоти Президенти Тоҷикистон касе шубҳа надорад, вале бо вуҷуди он, ки дар ҳайати ҳамроҳони Эмомалӣ Раҳмон касоне ҳастанд, ки забони арабиро хуб медонанд, нашр кардани ин гузориш бо ин шева чандин суолҳоеро дар зеҳни бинанда халқ мекунад, аз он ҷумла, оё таҳиякунандаҳои ин гузориш дӯсти раиси ҳукумат ҳастанд ва ё бадбину фурсатталаб…?

Бархе низ ин суолҳоро матраҳ мекунанд, ки ин оёти Қуръони Карим, ки дар ин навор садо медиҳанд, ҳама дар бораи таҳидиду ваъид бар кофиру золиму мушрик ва касоне, ки ба оёоти Ӯ бовар надоранд, нигаронида шудааст, оё ҳамсафарони арабидони Эмомалӣ Раҳмон ва масъули матбуоти Дастгоҳи Президент инро қасдан гузоштаанд ва раҳбари худро золим мешуморанд?

Тазаккур: Тарҷумаи ин оятҳо аз нусхаи тарҷумаи Қуръони Карим, ки бо дастури Эмомлаӣ чоп шудааст, гирифта шудаанд.

Амруллоҳи Низом, махсус барои Azda tv

Хабарро таблиғ кунед:

БЕШТАР БИХОНЕД
БЕШТАР БИХОНЕД

Сарвати пурасрор: Ҳамсари сарвазири Тоҷикистон дар Дубай қасрҳои боҳашамат харидааст

Сарвазири Тоҷикистон ва ҳамсараш ба суолҳо дар бораи он ки чӣ гуна тавонистааст дар кишвари худ ва Имороти Муттаҳидаи Арабӣ соҳиби амволи ғайриманқул шавад, посух надод.

Вазъи муҳоҷирони тоҷик дар Русия беҳтар мешавад?

Владимир Колоколтсев, вазири корҳои дохилии Русия дар пасманзари ҳодисаи хунин дар "Крокус" ба Тоҷикистон омад.

Баррасии масоили иқтисодии Тоҷикистону Туркия

Нишасти навбатии Комиссияи муштараки иқтисодии Тоҷикистон ва Туркия бо ҳузури намояндаҳои ду кишвар баргузор шуд.

Афзоиши шумори Қурбониёни ҳамлаҳои Исроил дар Ғазза

Субҳи рӯзи 28-уми май нерӯҳои исроилӣ урдугоҳҳои оварагон дар қисмати ғарбии шаҳри Рафаҳро ба шиддат бомборон карданд, ки дар натиҷа 16 нафар кушта ва даҳҳо каси дигар маҷруҳ шудаст.