Кумитаи Ҳелсинкии Норвегия бо нашри як баёния аз мақомоти Тоҷикистон талаб кардааст, ки макони будубоши Аслиддин Шариповро ошкор кунанд.
Дар изҳороти ин кумита, ки рӯзи 30-юми октябр нашр шудааст, гуфта мешавад, Шарипов баъд аз истирдодаш дар аввалҳои моҳи октябри соли ҷорӣ аз Русия ба Тоҷикистон нопадид шудааст ва пайвандонаш дар бораи будубошаш ҳеҷ маълумоте надоранд.
Дабири кулли Кумитаи норвежии Ҳелсинкӣ Берит Линдеман мегӯяд, ки “Мақомоти Тоҷикистон бояд дар куҷо будани Аслиддин Шариповро ошкор кунанд ва шарҳ диҳанд, ки чаро наздиконаш баъди истирдоди ӯ аз Русия аз ӯ хабаре надоранд“.
Хонум Линдеман аз мақомоти Тоҷикистон талаб кардааст, ки агар Шариповро боздошт кардаанд, ӯро раҳо кунанд.
Инчунин намояндаи Кумитаи норвежии Ҳелсинки Мариус Фоссум дар саҳфаи “X”-и худ навиштааст, ки таъқиби пайвандони мухолифон кори хосси Тоҷикистон гаштааст.
Гуфта мешавад, Аслиддин Шарипов бародари Шавкати Муҳаммад мебошад. Шавкат мудири телевизиони “Паём”, як расонаи муқими Аврупост, ки бо гузоришҳои интиқодӣ дар бораи сиёсатҳои ҳукумати Тоҷикистон ва пӯшиши буҳрони ҳуқуқи башар дар ин кишвар миёни мардум маъруф аст.
Ба бовари Кумитаи норвежии Ҳелсинки, нопадид шудани Шарипов баёнгари он аст, ки мақомоти Тоҷикистон аъзои хонаводаи мунтақидон ва мухолифони ҳукуматро нишон гирифтаанд.
Ёдовар мешавем, ки Аслиддин Шарипов 21 сентябри соли 2022 бо дархости мақомоти интизомии Тоҷикистон дар шаҳри Нижний Тагили Русия боздошт шуда буд.
Тибқи иттилои манобеи Azda tv, Кумитаи ҳуқуқи башари Созмони Милали Муттаҳид моҳи сентябри 2023 ба мақомоти Русия тавсия карда, ки Аслиддин Шарипов, бародари Шавкати Муҳаммадро, ки дар Русия аз моҳи сентябри соли 2022 боздошт шуда буд, ба Тоҷикистон истирдод накунад. Аммо Додситонии кулли Русия ин тавсияи Кумитаи ҳуқуқи башари СММ-ро ба инобат нагирфта, бо судури қароре ӯро дар торихи 1-уми октябри соли ҷорӣ ба мақомоти Тоҷикистон таслим кард.
Шавкати Муҳаммад, бародари Аслиддин Шарипов 10-уми октябри соли ҷорӣ бо нашри номаи саркушодае ба Додситони кулли Тоҷикистон Юсуф Раҳмон дар саҳифаи фейсбукияш навишта буд, ки Додситонии вилояти Суғди Тоҷикистон бародараш Шарипов Аслиддинро бо терроризм ва ифротгароӣ муттаҳам карда, алайҳи ӯ бо қисми 2 модаи 307.3 Кодекси ҷиноятии Ҷумҳурии Тоҷикистон парванда боз карда, аз моҳи декабри соли 2021 дар пайгард қарор дода буданд.
Шавкати Муҳаммад дар номаи сакушодаи худ айбҳои алайҳи бародараш эълоншударо рад мекунд. Аз ҷумла, узвият дар “Гурҳи 24”, ҲНИТ ва нашри матолиби дорои хусусияти террористӣ дар саҳифаи шахсияш дар Фейсбукро туҳмат медонад.
Ҳамчунин дар ин номаи саркушода аз Додситони кулли кишвар хоста шудааст, ки парвандаи Аслиддин Шариповро мунсифона баррасӣ кунад, ӯ мегӯяд, бародараш гуноҳе надорад ва боздошти ӯ ғайриқонунӣ аст.
