Фаъоли ҷомеаи шаҳрвандии Бадахшон Абру Алимардоншоев аз равиши татбиқи қонуни авф, ки ба муносибати 35-солагии Истиқлоли давлатии Тоҷикистон қабул шудааст, нигаронӣ кард.
Ӯ дар саҳифаи фейсбукии худ навиштааст, ки озод шудани беш аз 11 ҳазор маҳкумшуда ва кам шудани муҳлати ҷазои ҳазорон нафари дигар боиси хушҳолии ҳазорон оила шудааст. Тибқи маълумоти нашршуда, қонуни авф барои озод ё сабуктар шудани ҷазои беш аз 18 ҳазор нафар пешбинӣ шудааст.
Ба гуфтаи Алимардоншоев, татбиқи қонун нисбат ба маҳкумшудагони парвандаҳои марбут ба рӯйдодҳои ВМКБ саволҳоро ба миён овардааст. Ӯ бо истинод ба маълумоте, ки дар ихтиёр дорад, мегӯяд, аз миёни тақрибан 300 маҳкумшудаи ин парвандаҳо танҳо ду нафар озод шудаанд. Ба гуфтаи ӯ, яке аз онҳо Муҳаммадсултон Мавлоназаров мебошад, аммо шахсияти нафари дуюм то ҳол маълум нест.
Ҳамчунин ба навиштаи ӯ, муҳлати ҷазои се маҳкумшудаи дигар — Улфатхоним Мамадшоева, Рамзӣ Вазирбеков ва Хушом Ҷумаев кам карда шудааст.
Алимардоншоев ҳамчунин таъкид мекунад, ки баъзе ниҳодҳои байналмилалии ҳифзи ҳуқуқ ва сохторҳои вобаста ба Созмони Милали Муттаҳид қаблан нисбат ба баъзе парвандаҳои марбут ба фаъолони ҷомеаи шаҳрвандӣ изҳори назар карда буданд. Аз ҷумла, нисбат ба парвандаҳои бархе фаъолони ҷомеаи шаҳрвандӣ тавсияҳо дар бораи бознигарӣ ва масъалаҳои вобаста ба ҳуқуқи онҳо пешниҳод шуда буданд.
Ба андешаи ӯ, агар ҳадафи қонуни авф воқеан бар пояи принсипҳои инсондӯстӣ амалӣ шавад, татбиқи он бояд нисбат ба ҳамаи шаҳрвандон баробар сурат гирад.
Инчунин Алимардоншоев гуфтааст, ки садҳо оилаи маҳкумшудагони парвандаҳои марбут ба ВМКБ то ҳол мунтазири бозгашти наздикони худ ҳастанд ва изҳори умед кардааст, ки ҳамаи боздоштшудагоне, ки беасос маҳкум шудаанд, рӯзе ба назди хонаводаҳои худ бармегарданд.
