Созмони байналмилалии ҳомии ҳуқуқ Freedom Now 19-уми июли соли ҷорӣ бо нашри изҳороте аз мақомоти Тоҷикистон хостори озодии бечунучарои Бузургмеҳр Ёров шуд.
Ин созмони ҳомии ҳуқуқ қарори додраси шаҳри Ваҳдатро, ки ҳафтаи гузашта дар Боздоштгоҳи муваққатии шаҳри Душанбе мурофиаи Бузургмеҳр Ёровро пеш бурд ва бар ҳукми зиндони ӯ 10 солу 2 моҳи дигар афзуд, маҳкум карда, онро худсарона номид.
Дар изҳороти Freedom Now таъкид мешавад, ки тафсилоти дақиқи иттиҳомоти мақомот алайҳи Бузургмеҳр Ёров рӯшан нест. “Зеро мурофиаи додгоҳие, ки асосан бояд ошкор гузаронида шавад, дар Боздоштгоҳи муваққатии шаҳри Душанбе пушти дарҳои баста баргузор шуд. Далелҳои пешниҳодшуда низ барои тасдиқи иддаоҳо ночиз буданд.“
Ин созмон мегӯяд, тамдиди худсаронаи ҳукмҳои зиндон дар Осиёи Марказӣ як таҷрибаи маъмулӣ аст. Маҳбусони сиёсӣ аксар вақт қурбонии ин тамдидҳо мешаванд, зеро мақомот барои хомӯш кардани мунтақидони худ аз шароити номусоид ва ба ҳаёт таҳдидкунандаи зиндон ва иттиҳомоти бардурӯғро бар асоси қонунҳои норавшан истифода мебаранд.
Гузоришгарони ин созмон таъкид кардаанд, ки ғайриқонунӣ афзудан бар ҳукми зиндони Ёров ба истиқлолияти додгоҳҳо, ҳуқуқи инсон ва демократия дар Тоҷикистон хатари ҷиддӣ дорад.
Ҳамчунин Freedom Now менависад, ки аз амният ва саломатии Ёров сахт нигарон буда, аз ҳукумати Тоҷикистон хоҳиш мекунанд, ки:
– Ёровро фавран ва бечунучаро озод кунед; ва
– бехатарӣ ва саломатии ӯро тибқи стандартҳои байналмилалӣ таъмин намояд!
Ёдовар мешавем, ки муҳокимаи ин маҳбуси сиёсӣ рӯзи 10-уми июли соли ҷорӣ дар Боздоштгоҳи рақами 1-и пойтахт пушти дарҳои баста ва бидуни ҳузури пайвандонаш баргузор шуд.
Додрас Бузургмеҳр Ёровро ба “қаллобӣ дар ҳаҷми махсусан калон” гумонбар донист. Худи Ёров иттиҳомоти мақомотро дар рафти муҳокимаҳо сохта номида буд.
Ҷамшед Ёров, бародари Бузургмеҳр Ёров ва раиси бунёди “Бузургмеҳр” дар суҳбат ба Аzda.tv ин ҳукмро туҳмат ва бераҳмона номид. Ёров мегӯяд, мурофиаи бародараш пушти дарҳои баста гузашт ва Бузургмеҳр ба адвокат дастрасӣ надоштааст.
Ин парвандаро мақомот гӯё бар асоси шикояти Ҳасан Ҳасанов, як зиндонии маҳбаси “Ваҳдат” боз карданд. Ҳасан Ҳасанов иддао кардааст, ки Бузургмеҳр Ёров бо ваъдаи озодӣ аз маҳбас аз ӯ 42 ҳазору 500 сомонӣ гирифтааст. Бузургмеҳр Ёров бо навиштани нома аз дохили зиндон чунин муомила бо Ҳасан Ҳасановро рад карда, онро туҳмати навбатии мақомот номида буд.
