Сергей Шойгу, дабири Шӯрои амнияти миллии Русия, эълом кардааст, ки Маскав дар ҳоли барқарор кардани “ҳамкории ҳамаҷониба” бо ҳукумати Толибон мебошад. Ҳамчунин ин мауомдори рус кишварҳои минтақаро ба густариши ҳамкорӣ бо Кобул ташвиқ кардааст.
Ба гузориши хабаргузории Интерфакс, Шойгу гуфтааст, ки ҳамкорӣ бо Афғонистон барои таъмини амният ва рушди минтақа аҳамияти калидӣ дорад.
Ӯ афзудааст, ки Русия бо Толибон “гуфтугӯи амалгароёна” роҳандозӣ кардааст, ки бахшҳои амниятӣ, тиҷоратӣ, фарҳангӣ ва кумакҳои башардӯстонаро дар бар мегирад.
Ин изҳорот дар нишасти мақомоти амниятии Созмони Ҳамкории Шанхай (СҲШ) садо додааст. Ин созмон аз кишварҳое чун Тоҷикистон Чин, Ҳинд, Эрон, Покистон ва чанд кишвари Осиёи Марказӣ иборат аст.
Шойгу ҳамчунин дар нишасти ин созмон пешниҳод кардааст, ки “гурӯҳи тамоси Созмони Ҳамкории Шанхай бо Афғонистон” дубора фаъол карда шавад.
Ҳамзамон, як ҳайати баландпояи ҳукумати Толибон барои ширкат дар нишасти Қазон — пойтахти Ҷумҳурии Тотористони Русия — ба ин кишвар сафар кардааст.
Дар солҳои охир муносибатҳои Русия ва Толибон тадриҷан густариш ёфта, Маскав талош дорад нақши фаъолтаре дар таҳаввулоти Афғонистон ва амнияти минтақа дошта бошад.
Аммо Тоҷикистон ва дигар кишварҳои ҳамсояи Афғонистон агарчи бо Толибон муносибатҳои тиҷоратӣ ва ҳамкориҳои дуҷониба дар самтҳои гуногун доранд, вале ошкор аз муносибатҳои дипломатӣ ҳарф намезананд ва то ҳанӯз ҳукумати Толибонро ба расмият нашинохтаанд.
