Бо гарон шудани нархи гази моеъ дар Тоҷикистон, ин навъи сӯзишворӣ камёфт шуда, боиси боло рафтани роҳкирои таксиҳои 7-сомона дар Душанбе гаштааст.
Бино ба иттилои “Asia-Plus”, нархи гази моеъ дар бархе аз нуқтаҳои фурӯши сӯзишворӣ то ба 8 сомонӣ расидааст ва дар ҷойҳое, ки қимати он аз 7,20 то 7,80 сомонӣ аст, лимит барои харид ҷорӣ шудааст.
Ба гуфтаи ронандагон, аксар нуқтаҳои фурӯши сӯзишвории кишвар дар зарфи ду-се соат тамоми сӯзишвории барои рӯз пешбинишударо фурӯхта, то рӯзи дигар баста мешаванд.
Дар ҳамин ҳол як ронанда аз шаҳри Душанбе дар суҳбат бо “Asia-Plus” гуфтааст, ки бензин ҳам камёфт шуда, субҳи имрӯз ба чаҳор нуқтаи сӯзишвории пойтахт пайиҳам рафта, бензин наёфтааст.
Мақомот то ҳол сабаби гарону камёфт шудани газу бензинро дар кишвар шарҳ надодаанд, аммо кормандони нуқтаҳои фурӯши сӯзишворӣ ин мушкилиро нархи яклухти газу бензин дар кишварҳои содиркунанда рабт додаанд.
Гуфта мешавад, дар пасманзари боло рафтани қиммати газу бензин ва камёфт шудани он дар кишвар, роҳкиро низ гарон шудааст.
Аз ҷумла, таксиҳои “7-сомона”-и шаҳри Душанбе 10 сомонӣ шуда, инчунин нархи роҳкиро аз пойтахт ба ба баъзе манотиқи дигари кишвар низ 3-5 сомонӣ боло рафтааст.
Тибқи оморҳои расмӣ, дар нимсолаи аввали соли 2023 аз ҷониби 30 ширкат ба Тоҷикистон беш аз 174 ҳазор тонна бензини тамғаҳои гуногун ба маблағи тақрибан 100 миллион доллар ворид карда шудааст, ки 59 дарсади он ба ширкати “Газпромнефт-Тоҷикистон” рост меояд.
Гуфта мешавад, ки маҳсулоти нафтии Тоҷикистон асосан аз Федератсияи Русия (85,4%), Қазоқистон (5,1%), Туркманистон (4,4%), Узбекистон (2,6%) ва дигар кишварҳо (2,5%) ворид мешавад.
Аммо гази моеъ асосан аз Қазоқистон (73,5%) ва Русия (тақрибан 24,7%) ворид карда мешавад ва дар нимсолаи аввали соли 2023 14 ширкат ҳудуди 170 ҳазор тонна гази моеъ ба Тоҷикистон ба маблағи беш аз 66 миллион доллар ворид кардаанд.
Ба иттилои расонаҳо, дар ҳоли ҳозир мақомоти Қазоқистон содироти газро ба дигар кишварҳо манъ кардааст ва яке аз сабабҳои камёфт ва боло рафтани қиммати ин навъи сӯзишвориро коршиносон ба ҳамин рабт медиҳанд.
Аммо аксари коршиносон бар ин назаранд, ки сабаби асосии гароншавии нархи сӯзишворӣ дар Тоҷикистон инҳисори мутлақи ин тиҷорат аз ҷониби наздикони Эмомалӣ Раҳмон ва набудани рақобати солим дар ин соҳа мебошад.
