36.9 C
Dushanbe

Гилояи мавлавӣ Абдулҳамид аз афзоиши “табъиз” дар Эрон

Мавлавӣ Абдулҳамид Исмоилзиҳӣ мегӯяд, дар муддати 44 соли баъд аз инқилоб дар Эрон ҳатто як нафар аз аҳли суннат ба унвони устондор таъйин нашудааст.

Ба гузориши пойгоҳи иттилоърасонии Дафтари имоми ҷумъаи аҳли суннати Зоҳидон, 13-уми ноябри соли 2022 ба рӯзи якшанбеи гузашта рост меояд, мавлавӣ Абдулҳамид дар мулоқот бо намояндаи Алии Хоманӣ, раҳбари Эрон ҳодисаҳои хунини маъруф ба ҷумъаҳои хунини Зоҳидон ва Хошро “натиҷаҳои табъизҳои мавҷуд дар ҳаққи ҷомеаи аҳли суннат” донистааст.

Мавлавӣ Абдулҳамид дар ин дидор гуфтааст, “мо муътақидем омори болои куштаҳо ва захмиҳои ин ҳодиса натиҷаи табъизест, ки дар нерӯҳои мусаллаҳ вуҷуд дорад. Дар ҳоли ҳозир аз аҳли суннат дар нерӯҳои аслӣ ва кадрии низомӣ ва интизомӣ ҳузур надоранд, магар хеле андак, дар ҳоле, ки дар режими собиқ аҳли суннат дар нерӯҳои мусаллаҳ ҳузур доштанд.”

Имоми ҷумъаи аҳли суннати Зоҳидон афзуда, вақте бо масъулон дар мавриди бакоргирии аҳли суннат дар нерӯҳои мусаллаҳ суҳбат мекунем, аз нерӯҳои басиҷӣ гузориш медиҳанд, вақте дархости интисоби мудирони кулли устонҳои суннинишин матраҳ мешавад, фармондорон ва масъулони шаҳристонҳои ҳошияи кишварро ёдоварӣ мекунанд, дар ҳоле, ки бузургтарин мушкил, табъиз дар марокизи устонҳо ва маркази кишвар аст.

Хатиби масҷиди Маккии Зоҳидон таъкид карда, ки “то кунун баъд аз инқилоб ҳатто як аҳли суннат ба унвони устондор таъйин нашудааст ва дар мудириятҳои маркази кишвар низ аҳли суннат ҳузур надоранд. Дар Шӯрои таъмини устони Сиистону Балучистон ҳатто як нафар аз аҳли суннат ҳузур надорад, дар ҳоле, ки ин минтақа суннинишин аст…”

Гуфта мешавад, муносибатҳои мавлавӣ Абдулҳамид Исмоилзиҳӣ бо раҳбари Эрон замоне сардтар шуд, ки моҳе пеш баъд аз адои намози ҷумъа дар масҷиди Маккӣ, ки зери идораи ӯст, ба самти мардум тирборон шуд ва дар натиҷа зиёда аз 85 нафар кушта ва наздик ба 300 нафар захмӣ шуд.

Исмоилзиҳӣ ин ҳодисаро ба шиддат маҳкум кард ва мақомоти Эронро муқассир донист ва аз онҳо хост тамоми омилони ин ҳодисаи хунинро боздошт ва муҷозот кунанд. Аммо дар ибтидо касе ба гуфтаи ӯ накард, чанд рӯз баъдтар ангушти иттиҳомро сӯи Алии Хоманаӣ раҳбари Эронро бурд ва гуфт, вай ҳам аз омилони пасипардагии ин ҳодисаи хунин мебошад.

Баъд аз расонаӣ шудани ин хабар мақомот ва расонаҳои наздик ба ҳукумати Эрон алайҳи Мавлавӣ Абдулҳамид мавзеъ гирифта, як ҷанги сардеро дар расонаҳо ва минбарҳои масоҷид ба роҳ андохтанд ва ҳатто кор то ҷое кашида шуд, ки тарҳи террори ӯро ҳам дар бархе маҳфилҳои расонаӣ матраҳ карда буданд.

Вақте мардуми балуч диданд, ки тарҳи боздошт ва ё террори раҳбари сунниҳои Эрон дар бархе расонаҳо ба таври ошкор матраҳ мешавад, сарони қабилаҳои устони Сиистону Балучистон дар Эрон ва наздикону пайвандон ва шогиродону муридони ӯ дар Покистону Афғонистон барои ҳимоят аз мавлавӣ Абдулҳамид рафта бо вай байъат карданд. Коре, ки дар сад соли ахир бори аввал дар Эрон таҷриба шуд.

Ин амр дар ҳол мақомот ва бахусус раҳбари Эрон, ки беш аз 30 сол аст ин кишварро раҳбарӣ мекунад, нигарон кард ва аз баландпарвозиҳои худ дар ин масъала кӯтоҳ омада, ҳайатаҳоеро паси ҳам барои ором кардани вазъият дар ин устон ба мулоқоти мавлавӣ Абдулҳамид фиристонд.

Амруллоҳи Низом, махсус барои Azda tv

Хабарро таблиғ кунед:

БЕШТАР БИХОНЕД
БЕШТАР БИХОНЕД

Ҳалокати 5 узви як хонавода дар Суғд

Бар асари як садамаи нақлиётӣ дар вилояти Суғд 7 нафар кушта ва ду каси дигар захмӣ шудааст.

Эмомалӣ Раҳмон писари Аҳмадшо Масъудро аз Душанбе ронд

Бархе расонаҳои афғонистонӣ хабар доданд, ки мақомоти Тоҷикистон дафтари Ҷабҳаи муқовимати миллии Афғонистонро дар Душанбе бастааст.

Боздошти як шаҳрванди Узбекистон дар Лаҳистон

Бино ба иттилои расонаҳои лаҳистонӣ, як шаҳрванди Узбекистон бо иттиҳоми ҳамла ба корд ба ҷони ду ноболиғ боздошт шудааст.

Беш аз 135 муҳоҷир дар интизори ихроҷ аз Русия

Сафорати Тоҷикистон дар Русия эълон кардааст, ки танҳо дар як боздоштгоҳи муваққатии Маскав беш аз 135 муҳоҷири тоҷикистонӣ дар интизори ихроҷ қарор доранд.