Гирдиҳамоии муҳоҷирони тоҷик дар назди сафорати Тоҷикистон дар Маскав (Видео)

Имрӯз 2 апрел гурӯҳе аз муҳоҷирони тоҷик дар шаҳри Маскав гирдиҳамоӣ ташкил карда, шиорҳои "Озодӣ ба Иззат Амон, Русия шаҳрвандони худро ҳимоят мекунад" сар доданд.

Дар наворҳо дида мешавад, шумори хеле зиёди аз муҳоҷирони гирдиҳамомада ба сӯи сафорати Тоҷикистон дар Маскав раҳсипоранд.

Наворҳо аз корбарон

Чанд нафар аз штирокчиёни ин гирдиҳамоӣ ба “Аздо тв” наворҳо фиристода, гуфтанд, ки пулис муҳоҷиронро боздошт кардааст.

Дар наворҳои дигар низ дида мешавад, ки пулис муҳоҷиронро аллакай боздошта ва ба автобусҳо савор мекунад.

Бино ба гуфтаи худи муҳоҷирон пулиси Маскав дар 12 автобус муҳоҷиронро савор намуда ба боздоштгоҳ мебарад.

То ҳол дар мавриди таҷаммӯи муҳоҷирон дар назди сафорати Тоҷикистон дар Маскав шарҳи расмие нашр нашудааст. Аз ин пештар низ нафарони андаке, ки барои талаби озодии Иззат Амон дар сафорат гирдиҳам омада буданд, аз ҷониби пулиси Маскав боздошт шуда буданд.

Ёдовар мешавем, ки Иззат Амон як чеҳраи маъруф ва ҳомии ҳуқуқи муҳоҷирон рӯзи 25 моҳи март шаҳрвандияш лағв ва рӯзи 27 дар Тоҷикистон хабари боздошташ расонаӣ шуд. ВКД-и Тоҷикистон Иззат Амонро ба қаллобӣ муттаҳм намуда, нисбаташ бо моддаи 247, қисми 4-и Кодекси Ҷумҳурии Тоҷикстон паарванда боз кардааст.

Аммо наздикони ӯ ва ҷомеаи шарҳрвандӣ ин иттиҳомотро рад мекунанд ва парвандаро дорои ангезаи сиёсӣ унвон кардаанд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.