Идибег Мардон, ки дар шабакаҳои иҷтимоӣ бо тахаллуси “Идибег Бохтарӣ” машҳур аст, дар наворе бо ашки резон аз мақомдорони Тоҷикистон шикоят кард.
Ин блогер, ки гуфта мешавад, наворро пас аз баромаданаш аз кишвар нашр кардааст, дъво дорад, ки мақомдорон мехостаанд “миёни ӯро бишикананд”. Навори ин блогер дирӯз дар шабакаи “Ютюб” нашр шуд ва то ҳол бештар аз 130 ҳазор нафар ӯро дидааст.
Идибек дар ин навор мегӯяд, ба хотири он ки дар Тоҷикистон “мақомдорони миёншикан” зиёд шудаанд ва амнияташ дар хатар афтодааст, Тоҷикистонро тарк мекунад. Ӯ аз раиси шаҳри Бохтар (собиқ Қурғонтеппа) Абдулмаҷид Муминзода ном бурда, иддао мекунад, ки маҳз фишорҳои ӯ ҳамроҳи раиси видояти Хатлон маҷбураш сохта, ки тарки Ватан кунад.
Ин блогери тоҷик замони дар Русия буданаш дар сабтҳояш бо риши дароз зоҳир мешуд ва бо наворҳои интиқодӣ аз мухолифони ҳукумати Эмомалӣ Раҳмон шуҳрат пайдо карда буд. Бохтарӣ пештар дар Русия кору фаълият мекард ва чанде пеш аз баргаштанаш ба Тоҷикистон хабар дод. Аммо дар ин навори охир дида мешавад, ки ришашро хеле кӯтоҳ кардааст.
Тоҷикистон борҳо аз сӯи созмонҳои ҳуқуқи башар ва мухолифон барои монеъ шудан ба гузоштани риши мардон ва хоссатан диндорон борҳо интиқод шудааст. Чизе, ки ин блогери таблиғгари ҳукумат онро пайваста рад мекард. Аммо ин бор зоҳиран риши худашро кӯтоҳ карданд.
Идибег даъво дорад, ки 70-80 дарсади ҷавоное, ки маҷбур ба тарки Ватан мешаванд ва ба мухолифон мепайванданд, сабабаш муомилаи бади ин гуна маснабдорон мебошад. Ӯ бо гиря мегӯяд, ки ба хотири таҳдиди амнияташ тарки Тоҷикистон мекунад. Вале ӯ аз Раҳмон тамҷид мекунад ва ба қавли худаш, “ин кори зердастон аст”, ки раисҷумҳур аз он хабаре надорад.
Маълум нест, ки чаро якбора мақомот алйҳи ӯ чора андешидааст, дар ҳоле, ки худаш даъво дорад, ки бо мақомдорон ҳамшин будаву бо чанде аз мансабдорон шиносоӣ пайдо карда аст. Ва дар наворҳои собиқаш низ пайваста аз ҳукумат ва аз шахси Раҳмон дифоъ мекард.
Моҳе пеш ин блогери тоҷик дар наворе аз шаҳрдори шаҳри Бохтар ба хотири дар ҳолати бад нигоҳ доштани шаҳр интиқод кард. Дар навор ӯ кӯли оберо нишон дод, ки дохилаш партоби зиёд буд ва аз бӯи ғализи он шикоят мекард. Ин кӯли пур аз партоб миёни хонаҳои истиқоматӣ ҷой гирифта ва онҷо садҳо одамон зиндагонӣ мекунанд. Ба иддаои Идибек, барои бартараф кардани ин мушкилӣ аз сӯи ҳукумат пул ҷудо шуд, аммо боз 70 ҳазор сомонии ин маблағи ҷудошударо масъулон дуздиданд. Чизе, ки дар Тоҷикисон ҳоло маъмул аст ва аксари иншооту корҳои ободонӣ маҷбуран аз тарафи соҳибкорон анҷом дода мешаванд ва роҳбарон ҳангоми ифтитоҳ иштирок кардаву аз ободонии ҳукумат лоф мезананд.
Ин блогер дар навораш таҳдид ҳам мекунад, ки маълумоти зиёде дар бораи фасоди раиси шаҳри Бохтар дорад ва дар ҳолати зарурӣ ҳамаро нашр хоҳад кард.
Ин навор аз субҳи ирмӯз байни корбарони шабакаҳои иҷтимоии тоҷик ба таври васеъ бозтоб ёфт ва бисёриҳо дар шарҳи навор блогерро ба дурӯягиву дуруғгӯӣ муттаҳам карданд. Ба қавли шарҳнависон, мушкилоте, ки ҳоло ӯ мегӯяд, ҳамеша дар кишвар вуҷуд дошт, танҳо ӯ ин мушкилотро пас аз оне, ки худаш гирифтор шуд, қабул кард.
