Дар шаҳри Хоруғи Вилояти Мухтори Кӯҳистони Бадахшон беш аз даҳ узви “Комиссияи 44” аз ҷониби мақомот бозпурсиву боздошт шудаанд. Дар ин бора Pamir Daily News хабар медиҳад.
Яке аз боздоштшудагон Фаромуз Иргашев, ҳуқуқшиноси ҷавоне, ки дар интихоботи президентии соли 2020 номзадиашро гузошта буд ва инчунин Музаффар Муборакшоев, Манучеҳр Холиқназаров ва дигарон мебошанд.
То ҳол мақомоти кишвар расман сабаби бозпурсиву боздошти ин фаъолонро шарҳ надодааст.
Дар ҳамин ҳол Радиои Озодӣ дар истинод ба манбааш хабар додааст, ки рӯзи 28-уми майи соли ҷорӣ беш аз даҳ узви “Комиссияи 44” ба додситонӣ даъват шуда, “баъди бозпурсӣ дар бораи дарёфти пул аз хориҷа” ба боздоштгоҳ бурда шудаанд”, ки дар байнашон ҳуқуқдон Фаромуз Иргашев низ вуҷуд дорад.
Як узви “Комиссияи 44” бо шарти ифшо нашудани номаш гуфтааст, “тақрибан 13 нафар боздошт шудаанд, ки бархе аз онҳо аъзои гурӯҳи тафтишотии ҳодисаҳои моҳи ноябр ҳастанд ва маълум нест, ки алайҳи онҳо парванда боз шудааст ё на”.
Дар идома ин ҳамсуҳбати Радиои Озодӣ гуфтааст:
“дар гузашта муҳоҷирони бадахшонӣ барои фаъолияти “Комиссияи 44” ва таҳқиқи одилонаи ҳодисаҳои моҳи ноябр ба таври расмӣ кумак карда буданд. Вале аз созмону кишварҳои хориҷӣ чизе нарасидааст, ки мояи нигаронӣ бошад. Танҳо муҳоҷирон кумак карданд, зодагони Бадахшон. Мардум фақат мехостанд, ҳақ ба ҳақдор бирасад. “Комиссияи 44” намояндаи онҳо буд”.
Ёдовар мешавем, ки “Комиссияи 44” моҳи ноябри соли 2021 дар пайи эътирозҳо дар Хоруғ пас аз қатли Гулбиддин Зиёбеков, сокини Роштқалъа ташкил шуд. Бо миёнравии онҳо ба эътирози чаҳоррӯза дар Хоруғ хотима дода шуда буд.
Ба қавли баъзе огоҳони умур, зоҳиран мақомот мехоҳад бо туҳмате “Комиссияи 44”-ро ғайриқонунӣ эълон намуда, аъзои онро, ки аксаран аз фаъолони ҷомеаи шаҳрвандӣ ҳастанд, равонаи зиндон кунад.