Гуноҳ ҳам надошта бошӣ бояд ҷаримаро супорӣ. Шикояти навбатии Нилуфар Раҷабова

Нилуфар Раҷабова, духтари Раҳматуллоҳи Раҷаб – яке аз зиндониёни сиёсӣ ва аъзои РО ҲНИТ хабар дод, ки Хадамоти иҷрои ноҳияи Шоҳмансури шаҳри Душанбе 20-уми июл бо ирисоли як санади расмӣ талаб намудаст, ки Нилуфар Раҷабова дар давоми 10 рӯз маблағи ҷаримаро, ки 550 сомонӣ аст, бипардозад. Дар ҳолати насупоридани ҷарима то рӯзи муайянгардида нисбати ӯ чораҳои қонунӣ андешида мешавад.

Нилуфар Раҷабова дар сӯҳбат ба “Азия-Плюс” гуфтааст, барои супоридани ҷарима маблағе надорад ва аз мақомот хостааст телефони мобилияшро баргардонанд то онро фурӯшаду маблағи ҷаримаро бипардозад. Ӯ худи ҳамон рӯз ба Вазорати корҳои дохилӣ ва Прокуратураи генералии ҶТ ариза навишта, хоҳиш кардааст, ки телефони мобилияшро баргардонанд. Дар акси ҳол ӯ ба созмонҳои байнулмилалии ҳифзи ҳуқуқи инсон муроҷиат хоҳад кард.

Нилуфар ба “Азия-Плюс” гуфта, ки баъд аз ҳафт моҳ маҷбур шудааст, ин масъаларо боз расонаӣ кунад. Зеро иҷрочиёни қарорҳои додгоҳӣ аз ноҳияи Шоҳмансури пойтахт рӯзи 20-уми июл ба ӯ як санади расмиро фиристода, зимнан тақозо кардаанд, дар муддати 10 рӯз маблағи ҷаримаро бипардозад. Ҳушдор низ додаанд, ки дар ҳолати саркашӣ нисбаташ чораҳои қонунӣ андешида мешаванд.

Нилуфар Раҷабова гуфт, ки дар телефони мобилияш аксҳое аз ҳуҷҷатҳои тиббии фарзандони бемораш буданд, ки барояш муҳимманд. Ӯ мегӯяд, ҳангоми боздошташ дар 18 декабри соли гузашта бо сабабҳои номаълум кормандони ШВКД-2 дар ноҳияи Сино телефони мобилиашро аз дасташ гирифта гуфтаанд, ки баъд аз ташхис бозпас мегардонанд, аммо то ҳол онро нагардондаанд.

Ёдрас мекунем, ки 18 декабри соли 2019 мақомоти суди ноҳияи Синои шаҳри Душанбе Нилуфар Раҷабоваро барои доштани ҳиҷоб дастгир намуда нисбаташ бо моддаи 460 КҲМ ҶТ парванда боз карданд ва ӯро дар ниҳоят ба андозаи 10 нишондиҳанда миқдори 550 сомонӣ ҷарима бастанд.