Гурӯҳе аз ҳоҷиёни тоҷик ба сабаби доштани ҳуҷатҳои қалбакӣ дар сафари ҳаҷ дар Арабистони Саудӣ сарсон шуда, аз сафорати Тоҷикистон дархости баргаштан ба Ватанро карданд.
Кумитаи дин, танзими анъана ва ҷашну маросими Тоҷикистон 8-уми апрели соли 2026 бо нашри як изҳорот ин воқеаро ҳамчун амали қаллобӣ унвон кардааст.
Дар гузориши кумита гуфта мешавад, ки шахсони алоҳидае бо роҳи фиреб эътимоди зоиронро ба даст оварда, ба онҳо гуфтаанд, ки барои адои маросими ҳаҷ кумакашон мекунанд. Ин одамон ба зоирон бейҷиқҳое додаанд, ки ҳеҷ қувваи ҳуқуқӣ надоранд. Ин дар ҳолест, ки муҳлати барасмиятдарории ҳуҷҷатҳо барои мавсими ҳаҷҷи фарзии имсола кайҳо ба анҷом расида, ҳоло ҳеҷ як ширкати сайёҳӣ ё шахси миёнарав имкони таҳияи асноди заруриро надорад.
Ба гуфтаи манбаъ, ҳоло ин гурӯҳи шаҳрвандон дар ҳолати душвор қарор дошта, аз Кумитаи дин ва сафорати Тоҷикистон дар Арабистони Саудӣ дархост кардаанд, ки барои баргаштан ба Ватан ба онҳо кумак расонанд.
Кумитаи дини кишвар аз шаҳрвандон хоҳиш кардааст, ки ба ваъдаҳои дурӯғи миёнаравҳо бовар накунанд ва дар ҳолати рӯбарӯ шудан бо чунин ҳолат, ба намояндагони ин ниҳод муроҷиат кунанд.
Ҷузъиёти бештари ин рухдод, вазияти кунунии зоирон ва ҳувият ё дастгирии қалллобон ва фиребгарон ҳануз хабаре нашр нашудааст.
