Ба гузориши ББС, Сардори полиси Ҳаити эълом кард, ки чор тан аз касоне, ки дар терорри президент гумонбар дониста мешуданд, кушта ва ду каси дигар аз онҳо боздошт шудааст.
Ба иттилои манбаъ, Леон Шарл, сардори полиси ин кишвар шаби гузашта эълом кард, ки ҳамлагарон се тан аз кормандони полисро ба асорат гирифта, дар натиҷа заду хурди мусаллоҳона байни нерӯҳои бехатарӣ ва ҳамлагарон оғоз шуд.
Ҷумҳурии Ҳаитӣ бо интишори баёнияе гуфт, ки президенти ин кишвар, Ҷувенел Моиз аз тарафи як гурӯҳи мусаллаҳи номаълум дар хонааш ҳадафи тирборон қарор гирифт.
Ба иттилои манбаъ, президент дар ҳодиса ҷон дод ва ҳамсари ӯ Мартин Моиз захмӣ шуда ва ба бемористон интиқол ёфт. Аммо каме баъдтар ҳамсари раисҷумҳур низ бар асари захми шадид дар бемористон даргузашт. Айни замон Сарвазири Ҳаитӣ, Клод Ҷозев умури давлатро ба зимма дорад.
Хабаргузории ТАСС бо такя ба баёнияи ҳукумати Ҳаитӣ навишт, ҳодисаи куштори раисҷумҳур “тақрибан соати 01-и шаби 6 ба 7 июли соли ҷорӣ аз тарафи шахсони номаълум, ки баъзеашон испанӣ ҳарф мезаданд, рух дод. Ҳамлагарон ба манзили шахсии президенти ҷумҳурӣ ворид гардида, ӯро мавриди тирборон қарор додаанд”.
Хабаргузории “Associated Press” иттлоъ дод, ки дар ин кишвар ҳолати фавқулодда эълон шуда, фурудгоҳи давлатӣ муваққатан бастааст.
Бино ба додаҳои тафтишоти пешакӣ қотилон шаҳрвандони хориҷӣ гуфта мешаванд. Аммо сафири Ҳаитӣ дар Вашингтон гуфт, ки қотилон зархаридони ҳирфаӣ будаанд ва худро ба сифати кормандони Идораи мубориза бо маводди мухаддири Амрико муаррифӣ кардаанд.
Президенти кушташудаи Ҳаитӣ соли 2017 ба қудрат расид. Мухолифонаш ӯро ба он муттаҳам мекарданд, ки низоми ҳукуматро ба сӯи диктотурӣ мебарад.
