Ҳизби наҳзати исломии Тоҷикистон (ҲНИТ) бо нашри як изҳорот қатли узви собиқаш Маҳмадназар Хоҷаевро дар зиндон маҳкум намуда, ба дӯши Эмомалӣ Раҳмон гузоштааст .
Дар ин изҳороти ҲНИТ, ки рӯзи 21-уми октябри соли ҷорӣ нашр шуд, гуфта мешавад, ки мақомот дар зиндон қасди ҷони аъзои собиқи ин ҳизбро доранд.
ҲНИТ меафзояд: Ин амали мақомот ҷинояти муташаккилона асту масъулияти он ба души шахси Эмомалӣ Раҳмон, Саймумин Ятимов, Рамазон Раҳимзода ва Мансур Умаров аст. Мақомот Маҳмадназар Хоҷаевро маҳз ба хотири қонунмеҳварӣ ва адолатхоҳиаш ба шаҳодат расондаанд.
ҲНИТ аз созмонҳои байналмилалӣ ва ҷомеаи ҷаҳонӣ талаб намудааст, ки ба ин қазия сареъан дахолат намоянд. “Зеро Раҳмон пас аз баргашт аз сафари Аврупо, бо ин амалаш ғайримустақим ба ҷомеа чунин нишон доданист, ки Иттиҳодияи Аврупо низ ҷиноятҳои ӯро таъйид намуда, аз ин амалҳояш ҳимоят хоҳад кард.”
Дар поёни ин изҳорот ҲНИТ таъкид мекунад, ки аз ин пас аз роҳҳои машруъи байналмилалӣ ҷавоб додан ба чунин ҷиноятҳоро ҳаққи қонунии худ медонад ва барои ҳимоят аз аъзову ҷонибдорон ва зиндониёни бегуноҳаш ба таври ҷиддӣ вориди амал хоҳад шуд.
Пеш аз ин Кумитаи шаҳрвандии наҷоти гаравгонҳо ва зиндониёни сиёсии Тоҷикистон (КШНГЗС) низ қатли бераҳмонаи ду нафар аз мухолифони Ҳукумати Тоҷикистон дар зиндони маъруф ба «Кирпичний»-и шаҳри Ваҳдатро шадидан маҳкум ва аз мақомоти марбутаи ин зиндон талаб намуда буд, ки сабабҳои ваҳшиёна кушта шудани ин ду мухолифи зиндониро барои афкори умумӣ тавзеҳ бидиҳанд ва ҳамчунин аз мақомоти интизомии кишвар интизор дорад, сабабгорони қатли ин ду зиндониро дар зудтарин фурсат муаррифӣ ва муҷозот намоянд.
Ёдовар мешавем, ки субҳи 13-уми октябри соли ҷорӣ як узви Ҳизби наҳзати исломии Тоҷикистон ва як тани дигар аз ҷонибдорони мухолифини Ҳукумати Эмомалӣ Раҳмон дар зиндони маъруф ба "Кирпичний"-и шаҳри Ваҳдат тавассути зиндонбонҳо ба сурати ваҳшиёна ба қатл расидаанд.
Бино ба иттилои манобеи Аздо тв аз Сарраёсати иҷрои ҷазои ҷиноятии Вазорати адлияи Тоҷикистон ин ду зиндонӣ субҳи 13-уми ояктбяр аз соати 05:00 то 07:00 саҳар зери шиканҷаи зиндонбонҳо қарор гирифта, онҳо ба лату кӯб ва шиканҷаҳои бераҳмонаи мақомот тоб наоварда, ҳар ду ҷони худро аз даст доданд.
Хоҷаев Маҳмадназар Зубайдуллоеви 35-сола, субҳи 13-уми октябр ҳангоми шиканҷаи зиндонбонҳо аз пушт аз ноҳияи сараш сахт осеб дида, дар натиҷаи хунравии аз ҳад зиёд дар зиндони "Кирпичний"-и шаҳри Ваҳдат вафот мекунад. Марҳум сокини ҷамоати деҳоти Роҳатии ноҳияи Рӯдакӣ буда ва ёри ба қатл расидааш ҳам як тан аз сокинони шаҳри Душанбе мебошад.
Хоҷаев Маҳмадназар 11-уми сентябри соли 2015 бо иттиҳомӣ ҳамкорӣ бо Ҳоҷӣ Абдуҳалим Назарзода боздошт ва сипас ба 28 соли зиндон маҳкум шуда буд. Вай оиладор ва соҳиби се фарзанд буд.
Маҳмадназар Хоҷаев, собиқ узви ҲНИТ дар соли 2015 номзад ба вакили ноҳиявии ин ҳизб аз ҳавзаи рақами 30 ноҳияи Рӯдакӣ буда, шаҳодатномаи номзад ба вакилиашро санаи 12-уми феврали 2015 ба даст оварда буд, аммо баъдтар, рӯзи 24-уми феврал маълум шуд, ки вай ҳамроҳи ду номазад ба вакили дигари ҲНИТ бо номҳои Аҳмадҷон Сангов ва Абдунаим Каримов бар асоси сохтакории мақомот ва аз номи онҳо бардурӯғ ариза навиштан, исмашон аз рӯйхати номзадҳо ба вакилӣ дар ноҳияи Рӯдакӣ ҳазф шудааст.
Бо гузашти 10 шабонарӯз аз қатли ин ду зиндонии сиёсӣ то ҳол мақомоти Тоҷикистон расман ин кушторҳои бераҳмона дар зиндони шаҳри Ваҳдатро шарҳ надодаанд.
Ёдовар мешавем, пеш аз ин дар соли 2019 бар асари як ошуби сохтаи мақомот чанд тан аз собиқ раҳбарони зиндонии ҲНИТ низ ба таври бераҳмона дар ин зиндон кушта шуда буданд.
Азимҷон Ваҳҳобов, коршиноси масоили сиёсӣ ва узви Раёсати Олии ҲНИТ дар суҳбат ба Аздо тв аз ҳодисаҳои нохӯши як моҳи охир дар зиндонҳо ёдовар шуд. Ваҳҳобов бар ин бовар аст, ки ҳамаи ин ҳодисаҳои нохуш бо ҳам рабт доранд ва мақомот бо қатли ваҳшиёнаи зиндониён мехоҳанд чанд паём ба ҳама диҳад:
"Паёми аввал ин аст, ки мақомот мехоҳад рӯҳияи адолатхоҳиро дар байни зиндониён бишканад ва ба онҳо паём дода, истодааст, ки Шумо зиндониён набояд аз дохили зиндон садо баланд кунед. Агар садо баланд кардед, оқибати Шумо ин аст ва ба таври ваҳшиёна кушта мешавад."
Дар идома Ваҳҳобов аз суҳбатҳои ахири Раҳмонов ёдовар шуд, ки дар он ӯ гуфта буд: "Намоз хонед, масҷид биравед, аммо ба сиёсат ворид нашавед, тибқи қонун ҷавоб хоҳед дод."
"Паёми ҳукумат ба ҷомеа ин аст, ки ҳаркасе бо режим мухолифат кард, ҳатто дар дохили зиндон амният нахоҳад дошт"
Ба иддаои коршиноси масоили сиёсӣ, ҳукумат ҳамчунин ба мухолифини дар хориҷбуда паём дода истодааст, ки "Агар Шумо муқобили сафари Раҳмонов ба Урупо мешавед, мо афроди Шуморо гаравгон дорем ва ҷавоби дандоншикан хоҳем дод."
Азимҷон Ваҳҳобов мегӯяд: Мутаассифона ин ҷиноятҳом ҳукумати Тоҷикистон аз ҷониби созмонҳои байналмиллалӣ ва давлатҳои ҳомии ҳуқуқи башар дида мешавад, аммо ҷавоби дандоншикане ба режими Раҳмонов дода нашудааст."
Вай умедворӣ намуд, ки ҷиноятҳои режими Раҳмонов таҳқиқ ва нафарони ҷинояткор ба сазои аъмолашон мерасанд.
