Як шаҳрванди Тоҷикистонро дар Русия ба гумони куштор дар кофтукоби ҷиноятӣ қарор додаанд

Як шаҳрванди Тоҷикистон ба гумони даст доштан дар куштори омӯзгори Донишгоҳи иқтисодии Русия бо номи Плеханов ва модари ӯ дар кофтукоби ҷоноӣ қарор дорад. Дар ин бора ба хабаргузории ТАСС як манбаъ аз мақомоти ҳифзи ҳуқуқ хабар додааст.

"Гумонбар дар куштори ду зан ва захмӣ намудани духтари шашсола дар ҷустуҷӯ қарор дорад. Вай шаҳрванди Тоҷикистон Усмонов Ҷасурҷон Абдукаримович буда, соли таваллудаш 1994 мебошад. Мувофиқи маълумоти пешакӣ, гумонбар дар хонаи зани кушташуда кор мекардааст", - гуфтааст манбаъ.

Аз як зани кушташуда Виктория Борковский ном бурда шуда, гуфта мешавад, ки номзади илмҳои иқтисодӣ буда, дар Донишкадаи иқтисодии Русия дарс медодааст.

Намояндаи Сарраёсати тафтишотии Кумитаи тафтишоти вилояти Маскав Олга Врадий ба хабаргузории ТАСС гуфтааст, ки куштор рӯзи 7 ноябр дар як хонаи хусусӣ дар минтақаи Солнечногорск сурат гирифтааст, ки дар он ҷасади ду зани соли таваллудашон 1976 ва 1953 (модар ва духтар) бо ҷароҳатҳои зиёди корд дар тамоми аъзои баданашон пайдо шуд.

Пулис афзуда, ки дар хона духтарчаи 6-сола низ пайдо шудааст, ки дар гардан ва қафаси синааш бо корд захм хӯрдааст. Кӯдак дар ҳолати вазнин ба беморхона мунтақил шуд. Ба гуфтаи мақомоти тафтишотии Русия, миёни ҳамлагар ва занҳои кушташуда муноқишаи пулӣ буда, қотил баъди он ки занҳоро ба қатл расондааст, пул ва ашёи қимматбаҳоро аз хона гирифта ғайб мезанад.

То ҳол сабаби асосии ин куштор шарҳ дода нашудааст. Мақомоти тафтишотии Русия барои ин ҳодисаи куштор парвандаи ҷиноятӣ оғоз кардаанд.