Муҳоҷират

Ятимов: Бояд 24 соат кор кунем

Раиси Кумитаи давлатии амнияти миллии Тоҷикистон мегӯяд, ҳамарӯза ҳудуди 600 нафар гурезаҳои Афғонистон талош доранд, то марзро убур ва ба кишвари мо ворид шаванд.

Саймумин Ятимов, раиси КДАМ дар ин бора 13-уми октябр ҳангоми ҷаласаи сарони хадамоти амниятии кишварҳои узви Иттиҳоди Давлатҳои Мустақил хабар дода гуфт:

Гурезагоне, ки мехоҳанд сарҳадро убур ва ба Тоҷикистон ворид шаванд, ҳамарӯза теъдодашон 500 то 600 нафар буда дар ду моҳи охир зиёда аз 15 ҳазор муҳоҷири афғон ба Тоҷикистон паноҳ овардаанд.

Раиси КДАМ дар бораи ин мавҷи паноҳҷӯёни афғон меафзояд, “мехоҳанд, ки марзи давлатиро убур кунанд. Мо инчунин эҳсос мекунем, ки интиқоли кӯшиши силоҳу муҳиммоти ҷангӣ ва маводи мухадир аз давлати ҳамсоя афзоиш ёфтааст.”

Ба таъкиди раиси КДАМ бо дар назардошти вазъияти кунунии Афғонистон сарҳадбонон ва дигар нерӯҳои амнияти Тоҷикистон бояд дар ҳоли омодабош қарор дошта бошанд.

“Мо дар як режиме қарор дорем, ки бояд 24 соат кор кунем.”

Ин ҳам дар ҳолест, ки пештар сарҳадбонони тоҷик садҳо паноҳҷӯи афғонро аз марзҳои кишвар ронда, иҷоза надода буданд, ки вориди хоки Тоҷикистон шаванд.

Бино ба гузоришҳо 4-уми октябр Толибон дар Бадахшони Афғонистон гуфта буданд, ки 600 паноҳҷӯро аз марзи Афғонистон бо Тоҷикистон ба хонаҳояшон баргардонда иддаеро ҳушдор доданд, ки ба манзилҳояшон баргарданд.

Инчунин манбаъҳои дигар низ аз латукӯб ва қатли паноҳҷӯён дар Ишкошими Афғонистон аз сӯи Толибон гузориш доданд.

Ин ҳам дар ҳолест, ки Раҳимзода, вазири корҳои дохила эълон карда буд, ки Тоҷикистон тавони қабули паноҳҷӯёни Афғонистонро надорад. Сафорат ва консулгариҳои кишварамон дар Афғонистон ба осонӣ ба мардум раводид намедиҳанду марзҳо низ ба рӯи паноҳҷӯёни афғон баста мебошанд, аммо акнун суол ин ҷост, ки ин теъдоде, ки раиси КДАМ мегӯяд, аз чӣ роҳе худро ба Тоҷикистон мерасонанд?

Ба хотири тасдиқи ин арқоми пешниҳод кардаи Саймумин Ятимов ва посух ёфтан ба ин суол пеш аз ҳама фарзияи шабакаи афғонистонии "Тулӯънюс", ки гуфта буд, визаи 60 доллараи Тоҷикистон дар бозорҳои сиёҳи Афғонистон зиёда аз 400 доллар фурӯхта мешавад, пеши назар барҷаста менамояд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp, Viber ва Imo ба ин рақам:

Матолиби дигари Муҳоҷират

Муҳоҷират

Русия: Супоридани изи ангӯшт барои муҳоҷирон ҳатмӣ шуд

Муҳоҷират

7 рузи рухсатӣ барои пешгирӣ аз коронавирус дар Русия

Муҳоҷират

Саргардонии паноҳҷӯёни афғон дар марзи Тоҷикистон

Муҳоҷират

Афзоиши муҳоҷирони зан дар Русия