Имрӯз чоршанбе, 5-уми октябр дар масҷиди Вазорати дохилаи Афғонистон инфиҷор ба вуқуъ пайваст, ки бар асари он чанд нафар кушта ва захмӣ шудааст.
Тавре расонаҳои маҳаллӣ хабар медиҳанд, ин таркиш ҳангоме сурат гирифта, ки кормандони Вазорати дохила барои адои намоз онҷо ҷамъ омада буданд.
Ба гузориши “Афғонистонинтернашнл“, сухангӯи Вазорати дохилаи Толибон Абдунофеъ Такур вуқуи ин инфиҷорро дар дохили масҷиди вазоратхона таъйид карда, вале аз шумори захмиёну кушташудагон ва ҷузъиёти он чизе нагуфтааст.
Дар ҳамин ҳолӣ шабакаи арабии “Ал-Ҷазира” бо такя ба як манбаъ аз ниҳодҳои амниятии Толибон иттилоъ дод, ки бар асари ин таркиш 25 нафар кушта ва даҳҳо каси дигар захмӣ шудааст. Вале худи Толибон дар ин бора то ҳол омори дақиқе ба расонаҳо нагуфтаанд.
Ҳамчунин маълум нест, ки аз кормандони болоии ин вазорат касе кушта ва захмӣ шудааст ё на.
То ҳол масъулияти ин ҳамла дар дохили вазоратхонаи Толибонро касе ба дӯш нагирифтааст. Аммо аксари ҳамлаҳои қаблиро дар ин кишвар гурӯҳи ДИИШ ба дӯш гирифта буд.
Ин дар ҳолест, ки Вазири корҳои хориҷаи Афғонистон Амрихон Муттақӣ як рӯз пеш аз ин таркиш дар мулоқот бо Намояндаи Аврупо дар умури Афғонистон Томас Никлассон гуфта буд, ки ДИИШ дар ин кишвар “зарбаи сахте” хӯрдааст.
