Ширкати пулчинаки IRS ба хотири "афзоиши сарбории иҷтимоӣ" тарифҳои гузариш аз плазаҳои толлингии роҳи автомобилгарди “Душанбе-Чаноқ”-ро то 70 дарсад қиматтар карда, дар нахргузории хадамот ва молу маҳсулот инқилоб карда аст.
Ширкати «Инновейтив Роуд Солюшнз ЛТД»IRS бо нашри як иттилоия хабар дод, ки бо таваҷҷуҳ ба зиёд шудани хароҷоташ дар мувофиқа бо Хадамоти зиддиинҳисории Тоҷикистон нархи тарифаҳои худро то 70 дарсад гаронтар кардааст.
Дар иттилоияи Ширкати «Инновейтив Роуд Солюшнз ЛТД» гуфта мешавад, ки ҳудуди 800 корманд дорад ва бо сабаби зиёд шудани хароҷоташ натаметавонад, ки ҳуқуқи моҳонаи онҳоро зиёд кунад.
Ширкати «Инновейтив Роуд Солюшнз ЛТД» таъкид мекунад, ки тағйир дар нархи тарифаҳо бо сабаби беқурб шудани шудани пули миллӣ-сомонӣ, хариди техникаву маҳсулот барои нигаҳдории роҳ, "ба итмом расидани муҳлати истифодаи ҷузъҳо ва элементҳои роҳи автомобилгарди Душанбе – Чаноқ ", ва "афзоиши сарбории иҷтимоӣ" дар Тоҷикистон таҳия шудаааст.
Ширкати «Инновейтив Роуд Солюшнз ЛТД», ки ба Ҷамолиддин Нуралиев, шавҳари Озода Раҳмон, духтари Эмомалӣ Раҳмон таъаллуқ дорад, вақте солҳои 2008-2009 бо Ҳукумати Тоҷикистон созишномаи ҳамкориро баррасӣ ва имзо кард, дар корномааш дар ҳеч гӯшаи дунё таҷрибаи корӣ надошт. Ҳатто макони сабти ном шудани ширкат ҳам барои вакилон рушан набуд. Ягон унвон ва ё суроғаи қонунӣ ва электронӣ ҳам надошт. Аммо тайи 11 соли ахир бо гузоштани плазаҳои толингӣ дар роҳи дорои аҳамияти байналмилалии Душанбе-Чаноқ солона ба ҳисоби миёна аз 40 то 50 млн доллар даромад мегирад ва аз ҳама намуди пардохти андозҳо расман муоф карда шудааст.
Молики ин ширкат, Ҷамолиддин Нуралиев, домоди президент Эмомалӣ Раҳмон, ки дар ҳоли ҳозир муовини аввали раиси Бонки миллии Тоҷикистон аст, эътироф мекунад, ки дар давоми 11 соли пулчинии ширкаташ аз мардум нархи таваррум дар Тоҷикистон 130 дарсад афзоиш доштааст, аммо бар ивази кам кардани хароҷоти роҳ ва пешгирӣ аз гарон шудани молу хидматрасониҳо дар ин самт сарбории иҷтимоии аҳолиро аз 1-уми январи соли 2022 зиёда аз 50 дарсад зиёд мекунад.
Ин дар ҳолест, ки вай хуб медонад, ҳама гуна афзоиш дар нархи тарифҳои гузариш аз плазаҳои толлингии роҳи автомобилгарди “Душанбе-Чаноқ” дар тамоми иқтисодиёти Тоҷикистон таъсир расонида, роҳкирои мусофирон ва нархи маҳсулоте, ки тавассути ин роҳ интиқол дода мешаванд, ками кам то 30 дарсад қиматтар хоҳанд шуд.
Гуфтанист, Ҷамолиддин Нуралиев, шавҳари Озода Раҳмон, раҳбари Дастгоҳи Президенти Тоҷикистон ва яке аз номзадҳои эҳтимолӣ ба мақоми раёсати ҷумҳурӣ дар ҳоли интиқоли қудрат аз падар ба яке аз фарзандонаш дар Тоҷикистон аст, бо баланд бардоштани нархи гузаштан аз роҳи дорои аҳамияти байналмилалӣ дар Тоҷикистон инқилоб кардан мехоҳад, инқилоби афзоиши нархҳо, ки ҳам сарбории иҷтимоии мардумро зиёдтар мекунад ва ҳам садои эътирозҳои сокинони кишварро баландтар, иқдом кардааст.
Эмомалӣ Раҳмон соҳлост, ки мехоҳад дар замони зинда буданаш курсии президентиро ба яке аз фарзандонаш: Рустами Эмомалӣ ва ё Озодаи Раҳмон дар Тоҷикистон ба мерос гузорад, аммо шароитро номусоид мебинад ва вазъияти минтақа ҳам ҳар замон ӯро водор мекунанд, ки корро ба таъхир гузорад.
Бо ин вуҷуд, аксар коршиносон ҳадс мезананд, ки ба эҳтимоли зиёд соли 2022 дар Тоҷикистон интиқоли қудрат сурат хоҳад гирифт ва ин тасмими ахири молики IRS-ро метавонад як занги огоҳӣ аз ҷониби Ҷамолиддин Нуралиев ба Эмомалӣ Раҳмон унвон кард, ки домод ҳамсараш Озода Раҳмонро нисбат ба дигар аъзои оила сазовортар медонад, ки бояд вай ҷонишини падараш дар курсии президентӣ бошад.
Бо вуҷуди он ки Ҷамолиддин Нуралиев, домоди Эмомалӣ Раҳмон ҳамчун корманди баландмақоми давлатӣ машғул шудан ба тиҷорат барояш расман мамнуъ аст, аммо ҳоло яке аз тоҷирони бузург ва муваффақ буда, ширкати пулчинакаш дар бозорҳои бонкдорӣ, хонасозӣ, домдорӣ, боғдорӣ, бима ва ғайра низ кор мекунад ва яке аз домодҳои миллиардери Эмомалӣ Раҳмон дар Тоҷикистон низ мебошад.
Амруллоҳи Низом, махсус барои АЗДО ТВ
