Италия қаҳрамони Аврупо

11-уми июл мунтахаби Италия дастаи Англияро бо ҳисоби 3:2 шикаст дода, пирӯзи Евро-2020 эълон шуд.

Финали қаҳрамонии Евро-2020 бо иштироки дастаҳои миллии Италия ва Англия баргузор гардид. Тимҳо бо ҳам дар варзишгоҳи “Уэмбли”-и Лондон (Англия) вохӯрданд. Вақти асосӣ ва изофии вохӯрӣ бо ҳисоби 1:1 хотима ёфт.

Итолиёвиҳо дар задани силсилаи пеналтӣ ғалабаро (3:2) ба даст оварданд.

Финали қаҳрамонии Евро-2020-ро дастаи доварон аз Ҳолланд бо роҳбарии Бёрн Куйперс доварӣ мекарданд.

Ҳисоби бозиро дар дақиқаи 3-юм тими миллии Англия боз кард. Ҳимоятгари дастаи “Манчестер Юнайтед” Люк Шоу аввалин голи худро, дар ҳайати Англия зад.

Тими миллии Италия дар дақиқаи 67-уми бозӣ, ҳисобро баробар кард. Тӯпро ба дарвозаи Англия, Леонардо Бонуччи, ҳимоятгари дастаи “Ювентус” ворид кард. Вақти асосии бозӣ бо ҳисоби 1:1 анҷом ёфт.

Дар 30 дақиқаи замони изофӣ низ ҳисоб тағйир наёфта, ғолиби бозиро силсилаи пеналтӣ муайян кард. Дар задани зарбаҳои 11-метрӣ Италия бо ҳисоби 3:2 ғолиб шуд. Букайо Сака бозигари тими миллии Англия пеналтии ҳалкунандаро ба нишон расонид.

Гуфтанист, тими миллии Италия бори чаҳорум дар таърихи худ ба финали қаҳрамонии Евро роҳ ёфт ва бори дувум ғолиб шуд.

Бояд гуфт, ки тими миллии Англия бо раҳбарии сармураббӣ Гарет Саутгейт тавонист аввалин бор ба финали қаҳрамонии Аврупо роҳ ёбад.

Италия ва Англия дар даври ниманиҳоии қаҳрамонии Евро-2020 тимҳои миллии Испания ва Данияро шикаст дода, ба финал роҳ ёфта буданд.

Евро-2020 мебоист тобистони соли гузашта баргузор гардад, аммо бо сабаби пандемияи коронавирус, мусобиқа ба соли 2021 гузошта шуд. Бозиҳо аз 11 июн дар чанд давлат, аз ҷумла Озарбойҷон, Англия, Венгрия, Олмон, Дания, Испания, Италия, Ҳолланд, Русия, Руминия ва Шотландия баргузор гардид.

Евро-2016 ба фарқ аз Евро-2020 дар як давлат дар Фаронса баргузор гардид. Ғолиби қаҳрамонии Евро-2016 тими миллии Португалия

буд. Евро-2024 дар Олмон баргузор мегардад.




Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.