Коршиносони Созмони Милали Муттаҳид бо нашри эъломияе аз ҳукмҳои пайиҳами ҳомиёни ҳуқуқ ва хабарнигорону фаъолони маданӣ дар Тоҷикистон ибрози нигаронӣ кардаанд.
Дар ин эъломия, ки рӯзи 4-уми июл нашр шудааст, коршиносони СММ аз ҳукумати Тоҷикистон талаб кардаанд, ки барои беҳтар кардани вазъи ҳомиёни ҳуқуқ ва хабарнигорону фаъолони зиндонӣ ба аҳдҳои худ вафо кунад.
Коршиносон ба ҳукумати кишвар хотиррасон кардаанд, ки ҷиноят эълон кардани кори осоиштаи ҳомиёни ҳуқуқ ба ӯҳдадориҳои байналмилалии Тоҷикистон дар масъалаи ҳуқуқии инсон мувофиқат намекунад.
Инчунин дар ин эъломия таъкид мешавад, ки омехта кардани ҳомиёни ҳуқуқи башар бо ифротгароён ва террористон амали бисёр хатарнок аст.
Коршиносон аз парвандаи хабарнигорону блогерон, фаъолонони маданӣ ва вакилони дифоъ, аз ҷумла Далери Имомалӣ, Абдулло Ғурбатӣ, Завқибек Саидаминӣ, Абдусаттор Пирмуҳаммадзода, Хушом Ғулом, Улфатхоним Мамадшоева, Манучеҳр Холиқназаров ва Фаромӯз Иргашов ёдовар шуда, мегӯянд, ки аз ин 9 нафар 8 нафар ба ифротгароӣ ва терроризм айбдор шудаанд.
Дар идома коршиносони СММ аз суиистифодаи қонуни “мубориза бар зидди терроризм” барои пахши садоҳои интиқодӣ дар Тоҷикистон изҳори нигарони ҷиддӣ кардаанд.
Ба гуфтаи намояндагони СММ, Далер Имомалӣ, Абдуллоҳи Ғурбатӣ, Завқибек Саидаминӣ ва Абдусаттор Пирмуҳаммадзода маҳз барои бозтоби масоили иҷтимоӣ ва нақзи ҳуқуқи башар дар Тоҷикистон боздошту зиндонӣ шудаанд.
Дар эъломия аз саркӯби эътирозгарон дар Бадахшон ёдовар шуда, гуфта мешавад, ки мақомоти тоҷик нафаронеро, ки аз ҳуқуқи эътирозгарон ҳимоя мекарданд, мисли Улфатоним Мамадшоева, Манучеҳр Холиқназаров, Фаромӯз Иргашо ва Хушом Ғулом дар моҳи майи соли 2022 боздошт карданд.
Коршиносони СММ мегӯянд, ки нафарони дар боло зикршуда ғайриодилона муҳокима шуданд, чун панҷ нафар ба вакили мудофеъ дастрасӣ надоштанду парвандаи чанд тани онҳо муҳри махфӣ дошт ва мурофиаи аксарият паси дарҳои баста гузашт.
Дар охир онҳо аз шароити боздошти ҳамаи ин ҳомиёни ҳуқуқи башар ва саломатии онҳо нигаронӣ намуда, аз ҳукумати Тоҷикистон даъват кардаанд, ки маҳбусони сиёсиро бо хидматрасонии муносиби тиббӣ, аз ҷумла муолиҷаи тиббӣ ва доруворӣ таъмин кунанд.
Коршиносони СММ ва дигар ниҳодҳои ин созмон бори аввал нест, ки аз вазъи ҳуқуқи башар дар Тоҷикистон изҳори нигаронӣ мекунанд. Дар гузашта ин созмон ва даҳҳо созмони дигар аз мақомоти Тоҷикистон раҳоии беқайду шарти маҳбусони сиёсӣ, аз ҷумла аъзои ҲНИТ, адвокати зиндонӣ Бузургмеҳр Ёров, Зайд Саидов, Маҳмадрӯзӣ Искандаров ва дигаронро талаб карда буданд. Аммо мақомоти кишвар тавсияву талаби созмонҳоро дар аксар ҳолат нодида мегирад ва онҳоро риоя намекунад.
