Сафорати Амрико дар Душанбе дар паёми твиттерие зимни нигаронӣ аз боздошти рӯзноманигорон ва фаъолони ҷомеаи шаҳрвандӣ мегӯяд, ки Тоҷикистон тамом ақшори ҷомеаро ба шиддат саркӯб мекунад.
Сафорат дар изҳороташ меорад, ки Ҳукумати Тоҷикистон бо истифода аз қонунгузории ҷиноӣ рӯзноманигорон, блогерон, фаъолони ҷомеаи шаҳрвандӣ ва шаҳрвандони оддиро, ки аз ҳуқуқи конститусионии худ барои озодии баён истифода мекунанд, башидат саркӯб мекунад.
Ин ниҳоди дипломотии Амрико дар Тоҷикистон аз нигарониҳои Гузоришгари вежаи Созмони Амният ва Ҳамкории Аврупо (САҲА) дар умури озодиҳои расона ҳимоят кардааст.
Ҳамчунин дар ин паёми имрӯзааш Сафорати Амрико аз Ҳукумат хостааст, ки раванди муҳокимаҳои рӯзноманигоронро озод баргузор кунад, ба боздоштшудаҳо имкон бидиҳад, ки ҳаққи дастрасӣ ба вакили мудофеъро дошта бошанд.
Ҳамзамон намояндагони Амрико дар Душанбе аз мақомоти кишвар талаб карданд, ки саркӯб барои озодии баёнро мутаваққиф кунад ва афроди бегуноҳ зиндонӣ шудадро озод кунад.
Ин дар ҳолест, ки Тереза Рибейро, намояндаи САҲА дар умури озодии расонаҳо пас аз сафараш ба Тоҷикистон рӯзҳои 3 то 7-уми октябри соли ҷорӣ бо нашри изҳороте аз вазъи расонаҳо ва боздошту зиндонӣ шудани рӯзноманигорон дар ин кишвар изҳори нигаронӣ карда буд.
Хонум Рибейро дар мулоқоташ бо мақомоти тоҷик аз онҳо хоста буд, ки дар ростои муомила бо ВАО талош кунанд дар чорчӯби меъёрҳои байналмилалӣ ва САҲА амал дошта бошанд ва мушкилоту монеаҳоро бардоранд.
Аммо дида мешавад, ки мақомоти тоҷик на ин ки дар ин соҳа иқдоме карданиянд, балки пас аз изҳороти Намояндаи вежаи САҲА боз чанд рӯзноманигору блогери дигар, аз ҷумла Далери Имомалӣ барои 10 сол равонаи зиндон шуд.
