Ҳуқуқ

Муроҷиати ҳамсари маҳбуси сиёсӣ ба Эмомалӣ Раҳмон

Валамати Иброҳимзода, ҳамсари маҳбуси сиёсӣ Раҳматулло Раҷаб, бо талаби раҳоии шавҳараш аз “Карсер” ба Эмомалӣ Раҳмон муроҷиат кардааст.

Иброҳимзода дар ин муроҷиаташ мегӯяд, ки "агар муроҷиат ба Президент ҷинояти сангин бошад, пас маро низ барои ин дар паҳлӯи шавҳарам зиндонӣ кунед."

Навори видеоиро духтари Раҳматуллои Раҷаб, Нилуфар Раҷабова дар саҳфаи фейсбукии худ нашр кардааст. Дар ин навор ҳамсари маҳбуси сиёсӣ мегӯяд, мақомоти Тоҷикистон ӯ ва тамоми хонаводаашро, аз ҷумла кӯдаконашро “душмани халқ” эълон карда, пайваста онҳоро таҳқир мекунанд. Дар идома мегӯяд, “Мо душмани халқ нестем, мо халқе ҳастем, ки ҳақ дорем ба хидматгорони халқ муроҷиат кунем.”

Валамат Иброҳимзода мегӯяд, шавҳарашро барои муроҷиат ба Президент дар “Картсер” ҷой кардаанд, дар ҳоле, ки бе ин ҳам дар ин 6 сол Раҳматуллоҳи Раҷаб саломатии худро аз даст додааст. Ва “Карсер” ҳатто барои нафарони солим ва ҷавонон мисли ҳукми қатл аст. Ба онҷо зиндониҳоеро мешинонанд, ки ҷиноятҳои сангине дар зиндон анҷом додаанд.

Ин маҳбуси сиёсӣ дар ҳоле барои ҷазо додан ба утоқи ҷазо (ШИЗО) бурда мешавад, ки Умед Бобозода омбудсмени тоҷик ҳангоми вохӯрӣ бо Раҳматтулоҳи Раҷаб ва дигар маҳбусон гуфта буд, ки шумо ҳуқуқи арзу шикоят карданро доред. Ба гуфтаи Валамат Иброҳимзода борҳо худи сардорон ба шавҳараш ва дигар маҳбусони сиёсӣ таклиф карданд, ки ба номи Президент ариза навишта бахшиш пурсанд. “Аммо шавҳарам на бахшиш, балки бозбинии ошкори парвандаашро мепурсад, зеро ӯ ягон ҷиноят содир накардааст.”,-мегӯяд ҳамсари Раҳматуллоҳи Раҷаб.

Ба гуфтаи вай, қаблан шавҳараш 7 бор ба Раисҷумҳур нома навиштааст, аммо ҳеҷ кадоме аз онҳо ба Президент нарасидаанд. “Магар ӯ гунаҳкор аст, ки номаҳояш ба шумо намерасанду маҷбур шудааст номаи кушод нависад?” — мепурсад ин модари тоҷик.

Иброҳимзода мегӯяд, шавҳараш Раҳматуллоҳи Раҷаб 6 сол пеш бе ягон асос аз хонааш боздошт шуд ва бидуни додгоҳу тафтишоти одилона ба 28 соли зиндон маҳкум шудааст.

Дар охир Валамат Иброҳимзода ба ҳомиёни ҳуқуқи башар дар Тоҷикистон ва саросари ҷаҳон, рӯзноманигорони содиқ ва дипломатҳои хориҷӣ дар Тоҷикистон ва дигар кишварҳо муроҷиат намуда, хоҳиш кардааст, ки “хомӯш нашинед ва аз мо дифоъ кунед. Шавҳари ман танҳо талаб мекунад, ки парвандааш ошкоро баррасӣ шавад ва аз ӯ айбнома барои коре, ки содир накардааст, бардошта шавад. Ӯ сазовори “карсер” ва ҳукми қатл нест.”

Ёдовар мешавем, ки Зубайдуллоҳи Розиқ ва Раҳматуллоҳи Раҷаб, ду узви зиндонии Раёсати олии ҲНИТ пас аз навиштани номаи кушод ба Эмомалӣ Раҳмон дар зиндони шаҳри Ваҳдат мавриди муҷозот қарор гирифта, онҳоро ба утоқи ҷазо (ШИЗО) бурдаанд.

Номаи кушодаи ин ду маҳбуси сиёсӣ рӯзи 5-уми ноябр ба дасти Аздо тв расида буд ва онро расонаӣ кард. Дар ин нома онҳо аз Эмомалӣ Раҳмон таҳқиқи мунсифона ва аз нав бозбинии парвандаашонро дар ҳузури коршиносону нозирони байналмилалӣ ва рӯзноманигорони дохиливу хориҷӣ хоста буданд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp, Viber ва Imo ба ин рақам:

Матолиби дигари Ҳуқуқ

Тоҷикистон

Изҳороти ПМТ дар мавриди вазъияти номуайяни М. Ҳаит

Тоҷикистон

Ба пайвандони Маҳмадалӣ Ҳаит иҷозати мулоқот надоданд

Ҷомеа

Муроҷиати додхоҳонаи як маҳбус ба Эмомалӣ Раҳмон

Ҳуқуқ

Маҳдудияти нав дар зиндонҳои Тоҷикистон