Вазири корҳои дохилии Тоҷикистон бо ирсоли номае ба ҳамтои русиаш хостааст, ки парвандаи ҷиноятии шаҳрванди Тоҷикистон Сайёра Дусаеваро зери назорати худ қарор диҳад.
Бино ба иттилои сомонаи Вазорати корҳои дохилии Тоҷикистон, имрӯз, 10-уми январи соли 2023 Рамазон Раҳимзода бо ирсоли номае ба вазири корҳои дохилии Русия аз вай хостааст, ки парвандаи бонуи тоҷикистонӣ Сайёра Дусаеваро, ки дар вақти кор аз ҷониби як ошпази гурҷӣ мавриди лату кӯб қарор гирифта, аз худаш муҳофизат кард, зери назорати худ қарор диҳад.
Дар ин барқияи Вазири корҳои дохилии Тоҷикистон омадааст: "Вазири корҳои дохилии Ҷумҳурии Тоҷикистон генерал-полковники милитсия Раҳимзода Рамазон Ҳамро вобаста ба ҳодисаи рӯзи 4-уми январи соли 2023, ки дар тарабхонаи “Хинкалная Тбилисо”, воқеъ дар шаҳри Митишии вилояти Москваи Федератсияи Россия нисбати шаҳрванди Ҷумҳурии Тоҷикистон Сайёра Дусаева рух дод, ба Вазири корҳои дохилии Федератсияи Россия генерали политсия Колоколтсев Владимир Александрович барқия ирсол намуда, хоҳиш намуд, ки ҷиҳати воқеъона баррасӣ намудани ҳодисаи мазкур ва таҳти назоратбарӣ қарор додани он мусоидат намояд."
Пеш аз ин, вақте навори кӯтоҳе аз ҷараёни ин ҳодиса дар расонаҳои русӣ ва шабакаҳои иҷтимоӣ роҳ ёфт, вокунишҳои зиёдеро дар байни корбарон ба вуҷуд оварда буд. Аксари корбарон ҳам хостори пуштибонӣ аз ин бонуи тоҷикистонӣ шуда буданд. Онҳо аз сафорати Тоҷикистон дар Русия ва дигар мақомоти кишвар хоста буданд, ки барои ҳимояи ин шаҳрванди Тоҷикистон иқдом кунанд.
Гуфта мешавад, "як ошпази ин тарабхона шаҳрванди Тоҷикистон Сайёра Дусаеваро бераҳмона лату кӯб намуда, нисбаташ зӯроварии ҷисмонӣ ва таҳқиру тавҳинро раво дида, шаъну шарафи ӯро паст кардааст ва номбурда маҷбур шудааст барои муҳофизати худ бо истифода аз корд ӯро ба ҳалокат расонад. Оид ба ин ҳодиса аз ҷониби мақомоти дахлдори Федератсияи Русия тафтишот идома дорад."
