Мироҷ Абдуллоев, раиси ҲКТ. Акс аз нашрияи "Садои мардум"

Рӯзи 5 сентябр Ҳизби комунистии Тоҷикистон дар анҷумани ғайринавбатияш номзад ба мақоми перезидентро муайян кард. Дар анҷумани ин Ҳизб раисаш Мироҷ Абдуллоев, бидуни рақиб бо тарафдории 55 вакил ҳамчун номзад ба интихобот пешбарӣ шуд.

Ҳизби комунисти Тоҷикистон дертар аз ҳама ҳизбҳо анҷуманашро баргузор кард ва то шурӯи интихобот ҳудуди як моҳ мондааст, ки бояд ҳизбҳо то 11 сентябр, яъне пеш аз оғози таблиғоти интихоботӣ 250 ҳазор имзо ҷамъоварӣ намоянд то намзадашон сабтином шавад. Мироҷ Абдуллоев дар сӯҳбати кутоҳ ба Радиои Озодӣ гуфтааст, боварӣ дорад, дар ин фурсати кӯтоҳ, ки 5 рӯз боқӣ мондааст, беш аз 200 ҳазор имзои лозимаро ҷамъоварӣ мекунанд.

Радиои Озоди бо такя ба қавли раҳбари ин Ҳизб навишт, ки ӯ зимни суханронияш дар анҷумани Ҳизб гуфт: “Ҳизби мо мустаҳкам аст ва дар интихобот ғалаба мекунем”.

Агарчи раҳбарияти Ҳизби комунисти Тоҷикистон аз барномаи пешазинтихоботияш чизе нагуфтаанд, аммо Радиои Озодӣ хабар дод, ки нусхаи барномаи ҳизб дастрасаш гардидааст ва тақрибан аз шиорҳое иборат мебошад, ки дар барномаҳои дигар аҳзобҳо низ дида мешаванд. Аз ҷумла, ислоҳот дар мақомоти ҳифзи ҳуқуқ, рушди истеҳсоли ватанӣ, паст кардани сатҳи камбизовативу муҳоҷирати меҳнатӣ, коҳиши мақомотҳои назораткунанда, решакан кардани ришвахурӣ, ҳимояи ҳуқуқуқи колективҳои меҳнатӣ ва амсоли ин ҳадафҳо, ки одатан танҳо навишта мешаванду амалӣ намегарданд.

Ҳизби коммунист соли 1920 таъсис ёфтааст ва ҳизби яккатози замони Шӯравӣ буд, баъд аз пошхӯрии ин Иттиҳод дар Тоҷикистон ба ҷуз қишри калонсол ҷавонон аз барномаҳои он ҷонибдорӣ намекунанд. Ба гуфтаи коршиносон ин ҳизб ба хотири сиёсати бисёрҳизбӣ ҳамчун як намуна аз ҷониби ҳукумати Тоҷикистон нигоҳ дошта мешавад. Аммо ба иддаои раҳбари ҲКТ онҳо 38 ҳазор аъзо доранд ва беш аз 12 дарсади онро ҷавонон ташкил медиҳанд.

ҲКТ то соли 2015 дар порлумони кишвар ду ҷой дошт. Шодӣ Шабдолов, раҳбари собиқи ин ҳизб ва Исмоил Талбаков, муовини ӯ. Аз Шабдолов зиёд шунида мешуд, ки дар парлумон аз сиёсати Эмомалӣ Раҳмон интиқод мекард. Аммо дар интихоботи соли 2015 ҳизби онҳо ҳамроҳ бо ҲНИТ ба порлумон роҳ наёфтанд. Шодӣ Шабдолов дар як ҷаласаи ҳизбӣ, ки ӯ онро “табаддулот” номида буд, аз мақомаш барканор шуд ва ба ҷояш Исмоил Талбаков раҳбари ин ҳизб шуд. Пас аз даргузашти Исмоил Талбаков раҳбарии ин ҳизб ба души Мироҷ Абдуллоев гузашт.

Интихоботи президентӣ дар Тоҷикистон рӯзи 11 октябр баргузор хоҳад шуд. Аз 7 ҳизби сиёсӣ то ҳол 6 ҳизб номзадҳои худро барои ворид шудан ба маъракаи интихоботӣ эълон кардаанд, вале Ҳизби сотсилат-демократи Тоҷикистон интихоботро таҳрим ва эълон кард, ки дар он ширкат нахоҳад кард.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.