Ҳукумат тарҳи наверо барои рушди маориф пешниҳод кард

Ҳукумати Тоҷикистон ба парлумони кишвар тарҳи нави низоми маорифро барои баррасӣ пешниҳод кардааст.

Гуфта мешавад, дар сурати қабул гардидани ин тарҳ аз ин пас мудирони маорифи шаҳру ноҳояҳро на раисони шаҳру ноҳия, балки Вазорати маориф ва илми Ҷумҳури Тоҷикистон таъйин ва озод мекунад, вале ба назари коршиносон бо ин кор намешавад системаи маорифро беҳбуд бахшид.

Дар Вазорати маориф ва илми Ҷумҳури Тоҷикистон аз пешниҳод гардидани ин тарҳ хушнудӣ намудаанд ва гуфтаанд, ки агар чунин тарҳ амалӣ гардад, соҳа рушд хоҳад кард. Аммо коршиносон бар ин назаранд, ки айни ҳол соҳаи маорифи кишвар яке аз соҳаҳои фасодзадатарин дар кишвар ба ҳисоб меравад, ва қабули ин қонун метавонад барои боз фасодзадатаршудани ин ниҳод замину бигӯзорад.

Як коршинос, ки нахост номаш бурда шавад, ба “Аздо тв” гуфт:

“ҳоло дар кишвар қабули чунин қонун ба манфиати кор нест, ҳама вазъияти кунинии ин соҳаро хуб медонем, ки дар чӣ вазъияте қарор дорад, замоне, ки аз хонандагон пул мегиранд, оё имкон дорад, ки аз нафароне, ки вазифа медиҳанд пул нагиранд”.

Айни ҳол соҳаи маориф дар Тоҷикистон аз ҳисоби буҷети ноҳияҳо маблаӯгузорӣ мешавад ва аз соли 2012 ин тараф таъйину барканории масъулони сохторҳои маҳаллии Вазорати маориф дар ихтиёри раҳбарони шаҳру навоҳӣ гузошта шудааст. То соли 2012 таъйини мудирони маориф аз ҷониби Вазорати маориф амалӣ мегардид, баъди тағйиру иловаҳо ба қонун аз ин ниҳод гирифта шуда бар зиммаи раисони ноҳияҳо вогузор гардид.