Комиссияи вижаи Бонки ҷаҳонӣ барои муайян кардани иқтидори НБО Роғун ба Тоҷикистон меоянд

Интизор меравад, ки ба Тоҷикистон миссияи Бонки ҷаҳонӣ барои муайян кардани иқтидори нерӯгоҳи барқи обии Роғун ташриф оваранд. Дар ин бора Вазорати молияи Ҷумҳурии Тоҷикистон хабар дод.

Ин масъала рӯзи сешанбеи гузашта дар мулоқоти онлайни вазири молияи Тоҷикистон Файзиддин Қаҳҳорзода бо ноиби президенти Бонки ҷаҳонӣ дар Аврупо ва Осиёи Марказӣ Анна Бйерде баррасӣ шуд.

Дар мулоқот инчунин Директори Бонки ҷаҳонӣ дар Осиёи Марказӣ Лилия Бурунчук, намояндаи доимии Бонки ҷаҳонӣ дар ҷумҳурӣ Ян-Питер Олтерс ва инчунин раиси Бонки миллии Тоҷикистон Ҳоким Ҳоликзода ширкат доштанд.

Дар ин мулоқот гуфта шуд, ки муайян кардани иқтидори нерӯгоҳи Роғун ба ҷалби сармоя ва татбиқи босуръати ин лоиҳаи аз ҷиҳати стратегӣ муҳим, мусоидат хоҳад кард.

Ҳамчунин дар рафти ин ҷаласа таъкид шуд, ки НБО-и Роғун аҳамияти минтақавӣ дорад ва на танҳо ба рушди Тоҷикистон, балки ба рушдт дигар кишварҳои Осиёи Марказӣ низ мусоидат хоҳад кард.

Ёдовар мешавем, ки НБО- и Роғун бузургтарин нерӯгоҳи барқи обӣ дар Осиёи Марказӣ бо иқтидори 3600 МВт мебошад.

Дар айни замон, аз 6 агрегати ин нерӯгоҳ 2-тои он кор мекунанд, ки дар соли 2020 1 миллиарду 287 миллион кВт / соат нерӯи барқ ​​тавлид кардаанд, ки ин миқдор барқ 6,5% ҳаҷми умумии истеҳсоли нерӯи барқ ​​дар кишварро ташкил медиҳад.

Дар айни замон, агрегатҳои НБО-и Роғун бо иқтидори кам (100-120 МВт) кор мекунанд, иқтидори лоиҳавии ҳар як агрегат 600 МВт мебошад.

Ҳукумати Тоҷикистон барои хатми сохтумони нерӯгоҳ манбаъҳои иловагии маблағгузорӣ меҷӯяд. Интизор меравад, ҳукумати Тоҷикистон барои сохтани Роғун аз бонкҳои аврупоӣ: Credit Suisse (Швейтсария) ва Landesbank Baden-Wuerttemberg (Олмон) ба маблағи 340 миллион евро қарз гирад.

Дар соли 2020 барои маблағгузории ин иншоот 3,2 миллиард сомонӣ (тақрибан 290 миллион доллар) ҷудо карда шудааст, ки аз он 2,2 миллиард сомонӣ аз буҷа ва 1 миллиард сомонӣ аз ҳисоби захираҳои байналмилалии кишвар мебошанд.

Эмомалӣ Раҳмон дар миёнаҳои моҳи октябри соли гузашта дар як мулоқот бо сохтмончиёни ин иншоот қайд карда буд, ки аз оғози барқарорсозии ин корҳо дар соли 2008, барои сохтмони нерӯгоҳи барқи обӣ беш аз 25,3 миллиард сомонӣ ҷудо карда шудааст.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.