Мақомоти Тоҷикистон барои ҷалби сармоя ба сохтмони метрои Душанбе бо “Эксимбонк”-и Кореяи Ҷанубӣ гуфтугӯ карданд.
Ба иттилои Вазорати нақлиёти Тоҷикистон, ҳайате бо роҳбарии муовини аввали вазири нақлиёт Неъматзода Фаррух зимни сафари расмӣ ба шаҳри Сеул дар робита ба ҷалби сармоя барои сохтмони метро дар Душанбе гуфтугӯ карданд.
Гуфта мешавад, дар ҷараёни вохӯриҳо роҳбарияти Бонки содиротию воридотии Корея (Эксимбонк) ва намояндагони Тоҷикистон бар иловаи баррасии лоиҳаи метрои Душанбе инчунин роҳҳои маблағгузории тарҳҳои бузурги зерсохтории дигарро низ баррасӣ карданд.
Вазорати нақлиёти кишвар тарҳи метрои пойтахтро яке аз лоиҳаҳои калидии рушди зерсохтори нақлиётӣ дар ҷумҳурӣ арзёбӣ мекунад. Инчунин ҷонибҳо масъалаҳои марбут ба навсозии шабакаҳои роҳу нақлиёт, рушди бахши логистика ва ҷорӣ кардани технологияҳои муосирро мавриди гуфтугӯ қарор додаанд.
Бар асоси иттилои манбаъ, дар мулоқот зарурати тавсеаи ҳамкориҳои иқтисодиву сармоягузорӣ ва ҷалби маблағҳои хориҷӣ барои рушди соҳаи нақлиёти Тоҷикистон таъкид гардидааст. Ду тараф омодагии худро барои идомаи ҳамкориҳо ва татбиқи лоиҳаҳои муштарак иброз доштаанд.
Аз ин пеш мақомоти Тоҷикистон соли 2025 бо ширкатҳо ва ниҳодҳои молиявии Кореяи Ҷанубӣ дар мавриди сохтмони метрои Душанбе ба мувофиқа расида буданд. Бар асоси тарҳи пешниҳодшуда, метрои пойтахт аз се хат иборат хоҳад буд, ки аз минтақаи Сирки давлатӣ оғоз шуда, ба самти дарвозаҳои ҷанубӣ, шимолӣ ва шарқии шаҳр идома меёбад.
Бо вуҷуди ин, масъулон мегӯянд, масъалаи оғози сохтмон ҳанӯз ниҳоӣ нашудааст. Дар нишастҳои матбуотии имсола вақте аз вазири нақлиёти Тоҷикистон Азим Иброҳим дар ин мавриид пурсида шуд, гуфта буд, ки дар ин маврид сухан гуфтан ҳанӯз барвақт аст. Вале таъкид кард, ки корҳои техникӣ ва иқтисодии тарҳ бояд дар моҳҳои наздик анҷом ёбанд ва танҳо баъд аз он масъалаи амалии сохтмон баррасӣ хоҳад шуд.
