Ба боварии сиёсатмадорони рус, тасмими Имороти Муттаҳидаи Арабӣ метавонад вуруди муҳоҷирони тоҷикистониро ба Русия аз нав бештар кунад.
Сиёсатшиноси рус Вадим Трухачев дар мусоҳибае бо расонаи SM.News. гуфт, ба далели мушкилсозӣ аз сӯи муҳоҷирони тоҷикистонӣ кишварҳои зиёде бо Тоҷикистон низоми раводид ҷорӣ кардаанд.
“Имороти Муттаҳидаи Арабӣ аз додани раводид ба шаҳрвандони Тоҷикистон худдорӣ мекунад. Тоҷикон бо задухӯрдҳои оммавӣ дар ин кишвар машҳур шудаанд. Қаблан низ Кореяи Ҷанубӣ иҷозаи вуруди муҳоҷирони корӣ аз Тоҷкистонро қатъ кард. Туркия ҳам пас аз даст доштани шаҳрвандони ин кишвар дар ҳамлаҳои террористӣ бо Тоҷикистон раводид ҷорӣ кард”, – мегӯяд Трухачев.
Ҳамин тариқ, барои муҳоҷирони кории Тоҷикистон кишварҳое каме боқӣ монда аст, ки онҳо озодна битавонанд барои кор бираванд. Ин сиёсатшиноси рус таъкид мекунад, ки бо сабабҳои болозикр эҳтиол меравад вуруди муҳоҷирони тоҷик, бахусус тундравҳо ба Русия афзоиш меёбад.
Ин коршиноси рус бо таври истеҳзоомез иброз дошта, ки акнун “мутахассисони арзишманди радшудаи тоҷик” ба куҷо хоҳанд рафт?
Гуфтаҳои ин коршинос дар ҳоле садо медиҳаднд, ки муҳоҷирони тоҷик ҳангоми вуруд ба хоки Русия аз сахтиҳо шикоят мекунанд. Дар наворҳое, ки дар шабкаҳои иҷтимоӣ нашр шудааст, гуфта мешавад, ки марзбонони Русия ҳам дар марзҳои заминӣ ва ҳам дар фурӯдгоҳҳо шаҳрвандони Тоҷикистонро сахт тафтиш мекунанд. Ва ҳоалтҳое ҳам ҳаст, ки онҳоро барои ворид шудан ба ин кишвар иҷозат намедиҳанд ва ба Ватан бозпас мефиристанд.
Ҳодисаҳои хунин дар “Крокус Сити Ҳолл” ва гаравгонгирӣ дар зиндони Волгоград, ки гумонбарони асосии ин ду ҳодиса зодагони Тоҷикистон гуфта мешаванд, ҳолатро боз баддтар карда ва мақомоти Русия шароитро барои муҳоҷирон, бахусус тоҷикистониён душвортар карданд. Дар ин росто мақомоти Тоҷикистон барои сабук кардани мушкилоти муҳоҷирон талоши чашмрасе надоранд ва хомӯшӣ пеша кардаанд.
