Котиби Шӯрои амниятии Русия ба Тоҷикистон меояд
Котиби Шӯрои амнияти Русия Николай Патрушев рӯзҳои 28-29 апрел ба Душанбе меравад. Ӯ дар Тоҷикистон бо ҳамкоронаш аз кишварҳои аъзои Созмони Паймони Амнияти Дастаҷамъӣ (СПАД) гуфтушунид анҷом хоҳад дод.
Дафтари матбуоти Шӯрои Амнияти Русия хабар дод, ки 28 апрел дар Душанбе Патрушев бо дабирони шӯроҳои амнияти Арманистон, Беларус, Қазоқистон, Қирғизистон ва Тоҷикистон музокироти дуҷониба анҷом медиҳад. Инчунин рӯзи 29-уми апрел дар нишасти котибони шӯроҳои амнияти кишварҳои СПАД ширкат хоҳад кард.
Дар ҷаласа инчунин масъалаҳои амнияти ҳарбӣ, мубориза бо таҳдидҳо ба амният, чораҳои безараргардонии таҳдидҳо баррасӣ карда мешаванд.
Интизор меравад, ки Эмомалӣ Раҳмон котибони шӯроҳои амниятро қабл аз оғози ҷаласа ба ҳузур пазирад.
Патрушев бори охир ба Тоҷикистон моҳи октябри соли 2019 ҳангоми сафари дурӯза ба Осиёи Марказӣ ташриф оварда буд. Дар он сафараш Патрушев бо Раҳмонов мубориза бо терроризм, таҳдидҳо ба амнияти Осиёи Марказӣ, масоили ҳамкории ду кишвар дар доираи СПАД ва созмонҳои дигарро баррасӣ намуда буд.
Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.