Қазоқистон ба сифати кумаки башардӯстона ба Тоҷикистон 100 адад дастгоҳи нафасдиҳии сунъӣ (ИВЛ) мефиристад. Ин хабарро дар як нишасти хабарӣ Людмила Бюрабекова, муовини вазири тандурустии Қазоқистон эълом кардааст.

Қаблан  журналист Ерканат Копжасарули  гуфта буд, ки ҳукумати Қазоқистон ба Тоҷикистон барои харидории 100 адад дастгоҳи нафасдиҳии сунъӣ  63,2 млн. тенге  муодили $153 ҳазор ҷудо кард. Ба ин қарори ҳукумат корбарони шабакаҳои иҷтимоӣ дар ин кишвар изҳори нороҳатӣ карда ёдовар шуданд, ки феълан дар худи Қазоқистон "вазъият хеле душвор аст ва худи ин кишвар ба кумак ниёз дорад". Ба навбати худ дар вазорати тандурустӣ тазаккур доданд, ки кумак ба дигарҳо як таҷрибаи умумиҷаҳонӣ аст:

"Ҳоло  ҳамаи кишварҳо якдигарро ёрӣ карда истодаанд, мо ҳам дар бобат канор  намеистем. Аллакай ба дигар кишварҳо кӯмак намудем.Ҳозир ҳукумати Қазоқистон масъалаи расонидани кӯмаки башардӯстона ба Тоҷикистонро дар намуди дастгоҳҳои маснӯии нафас дида истодаст ва қарор аст то анҷоми сол фиристода шавад.Ин ҷо сухан аз дастгоҳҳои нафасдиҳии сунъие меравад, ки барои мошинҳои “Ёрии таъҷилӣ” ба ҳангоми интиқоли беморон дар роҳ ба беморхона истифода мешаванд. Ин дастгоҳҳои сохти ватанӣ аст, ки дар вилояти Оқмола тавлид мешаванд. Корхона моро мутмаин кардааст, ки барои масраф ва истифодаи дохилӣ мушкил пеш намеояд ва омодаанд барои берун ҳам истеҳсол кунанд".
Людмила Бюрабекова. Акс аз: ortcom.kz


Муовини вазири тандурустии Қазоқистон гуфтааст, ки қарор аст дастгоҳҳои нафасдиҳии сунъӣ барои бемористонҳо низ дар ин коргоҳ истеҳсол бишавад. Ёдовар мешавем, ки Қазоқистон қаблан низ барои Тоҷикистон ҷиҳати мубориза ва ҷилпавгирӣ аз коронавирус кумак карда буд. Дар моҳи майи соли ҷорӣ Қазоқистон ба Тоҷикистон 5 000 тона орд ёрии башардӯстона намуд. Ба ҳангоми таҳвили ин миқдори орд сафири Қазоқистон Аскар Тоҷибоев ёдовар шуда буд, ки Қазоқистон ҳамасола ба мардуми бародари Тоҷикистон кумаки башардӯстона мерасонад, ки ҳаҷми умумии он аз соли 2006 инҷониб зиёда аз 38 миллион доллари ИМА-ро ташкил менамояд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.