Оморҳои ахир аз талафоти инсонӣ дар заминларзаи Афғонистон нишон медиҳанд, ки бар асари ин ҳодиса зиёда аз 3500 нафар кушта ва захмӣ шудааст.
Шабакаи "Алҷазира"-и Қатар бо нашри гузорише хабар додааст, ки дар натиҷаи заминларзаи шаби 22-уми июни соли ҷорӣ дар Афғонистон зиёда 1500 нафар кушта ва беш аз 2000 каси дигар захмӣ шудаанд.
Ба иттилои манбаъ, танҳо дар вилояти Хусти Афғонистон зиёда аз 600 хонаи маскунӣ пурра вайрону валангор шудааст. Дар вилоятҳои Пактико, Пактиё ва Нангарҳор ҳам теъдоди зиёде аз хонаҳои мардум хароб ва замингир шудаанд.
Инчунин дар асари ин ҳодиса хеле аз аъзои хонаводаҳо, ки аксари онҳо дар ҳолати фақру тангдастӣ низ ба сар мебурданд, пурра ва ё қисми зиёде аз онҳо кушта ва захмӣ гардидаанд. Мардум пас аз ҷаноза кушташудагонро ба сурати дастаҷамъӣ ба хок месупоранд.
Бомдоди 22-уми июн, заминларзаи шадиде, ба миқёси рихтер 6,1 бал, манотиқе аз вилоятҳои ҷануби шарқии Афғонистон ва Покистонро сахт такон дод ва дар натиҷа ҳазорҳо нафар хонаву кошона ва азизону пайвандони худро аз даст доданд.
ٍМардуми маҳаллӣ дар Афғонистон пас аз вуқӯи ҳодиса аввалин касоне буданд, ки ба кумаки осебдидагон шитофтанд ва гурӯҳҳое низ дар сар то сари ин кишвар сандуқҳои хайрияи сайёре таъсис дода, ба ҷамъоварии кумакҳои хайрия оғоз кардаанд.
Инчунин пас аз расонаӣ шудани ин хабар, дирӯз, сафири Эрон дар Афғонистон бо ибрози ҳамдардӣ эълон намуд, ки ҷумҳурии исломӣ дар як иқдоми фаврӣ дар ду ҳавопаймои борбар кумакҳои аввалияи худро ба осебдидагон расонидааст.
Кишварҳои Покистону Чин, Амрикову Олмон ва бархе созмонҳои байналмилалӣ, аз он ҷумла Созмони Миллали Муттаҳид ва Ҳилоли Аҳмар низ ҳамдардии худро нисбат ба қурбониёни ин ҳодиса баён карда, аз ирсоли кумакҳои худ ба зарардидагон хабар додаанд.
Ҳамзамон раҳбарияти Толибон ва раҳбарони пешини Афғонистон ба мисли Ашраф Ғанӣ, Абдуллоҳ Абдуллоҳ ва ҳатто Ҷабҳаи муқовимати миллӣ ҳама аз мардум, созмонҳои хайрияи дохилӣ, минтақавӣ ва байналмилалӣ барои осебдидагон дархости кумак кардаанд.
Дар ҳамин ҳол Мария Захарова, сухангӯи Вазорати корҳои хориҷии Русия ҳам дирӯз гуфт, Толибон агар расман аз Маскав дархости кумак намоянд, ба зарардидагон ёрии худро хоҳанд расонид.
Омори воқеии кушта шудагон, захмиҳо ва осебдидагон дар ҳоли афзоиш аст, зеро то кунун мардум ва дигар ниҳодҳои кумакрасон натавонистаанд, ки тамоми оворҳои ба ҷо монда аз ин ҳодисаро бартараф карда, теъдоди дақиқи кушта шудаҳо, захмиҳо ва ҳаҷми зарарҳои ба ҷо монда аз ин ҳодисаро пешниҳод кунанд.
Гуфта мешавад, то замони таҳияи ин гузориш дар Тоҷикистон на Эмомалӣ Раҳмон ва на Вазорати корҳои хориҷӣ то ҳол дар бораи қурбониён ва зарардидагони заминларзаи Афғонистон изҳори назар накардаанд, вале дар бархе аксу наворҳо дида мешавад, ки як чархболи кумакрасон дар маҳалли ҳодиса ҳузур дорад ва дар рӯи он бо ҳуруфи крилӣ исми Тоҷикистон навишта шудааст.
