Мақомоти олии Тоҷикистон ва Арабистони Саудӣ бо имзои як санад талаботи раводид байни ду кишварро бекор карданд.
Бино ба иттилои расмӣ, 27-уми сентябри соли 2024 байни Тоҷикистон ва Арабситони Саудӣ як Ёддошти тафоҳум ба имзо расид, ки бар асоси он “талаботи раводид барои дорандагони шиносномаҳои дипломатӣ, хизматӣ ва махсус” бекор карда шуд.
Ба қавли манбаъ, шаҳрвандони ҳар ду кишвар, ки “дорандаи шиносномаҳои дипломатӣ, хизматӣ ва махсус мебошанд, аз талаботи гирифтани раводид барои вуруд, хуруҷ, убур ва будубош дар ҳудуди давлати тарафи дигар ба муҳлати на зиёда аз 90 (навад) рӯз дар муддати 180 (яксаду ҳаштод) рӯз аз санаи вуруди аввалин озод карда мешаванд.”
Вазорати корҳои хориҷии Тоҷикистон мегӯяд: “Ёддошти тафоҳуми мазкур баъд аз 30 (сӣ) рӯзи гарифтани огоҳиномаи охирини хаттӣ тавассути роҳҳои дипломатӣ дар бораи иҷро гардидани расмиёти дохилидавлатие, ки барои эътибор пайдо кардани Созишномаи мазкур заруранд, эътибор пайдо мекунад.”
Гуфта мешавад, ин Ёддошти тафоҳумро аз тарафти Ҳукумати Тоҷикистон вазири корҳои хориҷӣ Сироҷиддин Муҳриддин ва аз тарафи Арабситони Саудӣ, вазири корҳои хориҷии Шоҳигарии Арабистони Саудӣ Файсал бин Фарҳон Оли Сауд дар ҳошияи иҷлосияи 79-уми Маҷмаи Умумии Созмони Милали Муттаҳид дар шаҳри Ню-Йорк имзо карданд.
