Рӯзи чоршанбе Президенти Белорус Александ Лукашенко дар суҳбат бо намояндагони Парлумон ва мақомоти кишвар гуфт, ки паём дар бораи бомбгузорӣ шудани ҳавопаймои ширкати “Ryanair” аз Швейтсария расида буд.
Лукашенко гуфт, ки дар дохили ҳавопаймои “Ryanair”, ки фавран ба фурудгоҳи Минск нишаст, як террористе буд, ки дар хориҷа аз он хабар доштанд. Паём дар бораи бобмгузорӣ шудани ҳавопаймои “Ryanair” ҳамзамон ба фурудгоҳҳои Афина, Вилнюс ва Минск расидааст, қайд кард ӯ.
Лукашенко мегӯяд, ки Ғарб аз иштирок дар таҳқиқи ҳодиса бо нишасти изтирории ҳавопаймои “Ryanair” дар Минск даст кашид.
Ҳамчунин Лукашенко афзуд, ки ҷониби Беларус баъд аз гирифтани иттилоъ дар бораи бобмгузорӣ шудани ҳавопаймо вокуниш нишон дод.
Ба гуфтаи Лукашенко, системаҳои муҳофизатии “БелАЭС” ҳангоми ҳодиса бо ҳавопаймои “Ryanair” дар ҳолати омодабош қарор доштанд.
Лукашенко инчунин амалкарди низомиёни Беларус дар ҳодисаи ҳавопаймо баҳои аъло дод.
Ӯ дар суҳбаташ афзуд, ки маълумоти иловагӣ, аз ҷумла дар бораи мухолифи боздоштшуда ба зудӣ ироа хоҳад шуд.
Ёдовар мешавем, ки расонаҳо рӯзи якшанбе гузориш доданд, ки як ҳавопаймои ҷангандаи Миг-29 мутааллиқ ба Белорус як ҳавопаймои мусофирбари “Ryanair”-ро раҳгирӣ намуда ва онро водор ба фуруди изтирорӣ ба фурудгоҳи Минск карда аст.
Мақомоти низомии Белорус муддаи шуданд, ки ин ҳавопаймо машкук ба таҳдид ба бомгузорӣ буд ва ҷангандаи Миг-29-и Белорус онро маҷбур ба фуруди изтирорӣ карда.
Дар ҳамин ҳол расонаҳо гузориш доданд, ки яке аз мусофирони ин ҳавопаймо аз мухолифони Ҳукумати Белорус ва гардонандаи яке аз каналҳои Телеграм ба номи “Nexta” буда ва далели фуруди ҳавопаймо низ ҳамин будааст.
Баъд аз ин ҳодиса кишварҳои Иттиҳоди Аврупо ба мувофиқа расиданд, ки алаҳи Белорус маҷмуае аз таҳримҳоро ҷорӣ кунанд.
Яке аз ин таҳримҳо, мамнуияти истифодаи Белорус аз ҳарими ҳавоӣ ва фурудгоҳҳои Иттиҳодияи Аврупо аст.
