Дар ноҳияи Ванҷи Вилояти Мухтори Кӯҳистони Бадахшон рӯзи 2-юми апрел бар асари канда шудани сангпора аз кӯҳ ва бархӯрди он ба автобусе, ки наваскаронро интиқол медод, як ҷавон ҷон бохтааст.
Бино ба иттилои Радиои Озодӣ, дар ин ҳодиса дасти кам се нафари дигар захмӣ шудаанд. Гуфта мешавад, автобус наваскаронро аз Хоруғ ба Душанбе мебурд, ки қисмати ноҳияи Ванҷ ногоҳ сангҳо аз кӯҳ сарозер шуда ба автобуси онҳо бархӯрдааст.
Бар асоси иттилои манбаъ, сангпора ба қисми миёнаи автобус бархӯрда, сабаби рух додани садама гардидааст. Захмиён аввал ба бемористони марказии ноҳияи Ванҷ интиқол ёфта, пас аз ташхис бо чархбол ба Душанбе фиристода шудаанд. Ҷасади ҷавони фавтида ба зодгоҳаш ноҳияи Шуғнон бурда шудааст.
Мақомот то ҳол ин ҳодисаро расман шарҳ надодаанд.
Дар ҳамин ҳол як наворе, ки дар фазои маҷозӣ паҳн шудааст ва гуфта мешавад ба автобусе марбут аст, ки наваскаронро интиқол медод, дида мешавад, ки пораи санги калоне аз сақфи автобус бархӯрда, ба дохили он ворид шудааст.
Ин ҳодиса дар ҳоле рух дода, ки мавсими даъвати баҳории ҷавонон ба сафи Қувваҳои мусаллаҳи Тоҷикистон аз 1-уми апрели соли ҷорӣ оғоз шудааст ва то охири моҳи май идома меёбад.
