Сурат: Фейсбук

Иззат Амон, як ҳомии ҳуқуқи муҳоҷирон дар Русия ва раҳбари “Маркази тоҷикон” дар саҳифаи фейсбукаш хабар дод, ки имрӯз 14 октябр кормандони пулиси минтақаи будубошаш ба идораи корияш омада идораашро кофтукоб кардананд.

Ӯ навиштааст, ки кормандони пулис бо баҳонаи ҷустуҷӯи адабиёти динӣ идора ва асноди ӯро мавриди кофтукобу бозҷӯӣ қарор додаанд. Иззат Амон дар идома навишта, ки “метавонистед як айбномаи муносибтаре пайдо кунед”.

Дар зери ин навишта корбарон ва ҳаводорони Иззат Амон вокунишҳо нишон дода андешаву назарҳои худро коридаанд. Шуҳрат Қудрат вакили мудофеи тоҷик зери ин пост сабаби ин амали мақомотро пурсидааст, Иззат Амон дар ҷавоб мегӯяд “Мисли ҳамеша, онҳо террорист ва экстремистро аз “Маркази тоҷикон” ҷустуҷӯ доранд”.

Иззат Амон яке аз чеҳраҳои маъруфи тоҷик дар Русия аст, ки солҳо аз ҳуқуқи муҳоҷирони тоҷик ҳимоят мекунад. Ӯ ба мақсади барои кумак расондан ба муҳоҷирон марказеро бо номи “Маркази тоҷикон” кушод ва аз номи он ба муҳоҷирон ёрӣ мерасонд. Хусусан муҳоҷироне, ки мефавтанд, талош мекунад ҷасадҳои онҳоро тариқи марказаш ва бо кумаки хайрхоҳон ба Ватан фиристад. Чанд рӯзи пеш навишта буд, ки аз сабаби зиёд дидани ҳолатҳои маргу мири муҳоҷирон хаста шудааст ва мехоҳад марказашро бибандад.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.