Хона блог саҳифа 143

Фармони даъвати баҳории ҷавонон ба хидмати ҳарбӣ имзо шуд

Аз ҷониби
Azda TV 3
-
0

Президенти Тоҷикистон, Эмомалӣ Раҳмон фармони даъвати баҳории шаҳрвандон ба хидмати ҳарбиро имзо кард.

Фармон 19-уми феврали соли ҷорӣ нашр шуд. Дар он гуфта мешавад, ки даъвати ҷавонон аз 1-уми апрел то 31-уми майи соли 2025 сурат мегирад. “Дар ин давра, ба сафи Қувваҳои мусаллаҳ, Қӯшунҳои сарҳадӣ, Гвардияи миллӣ, Қӯшунҳои дохилии Вазорати корҳои дохилӣ, Сарраёсати Қӯшунҳои мудофиаи гражданӣ, Сарраёсати корҳои дохилии Вазорати корҳои дохилии Ҷумҳурии Тоҷикистон ва Вазорати корҳои дохилии Ҷумҳурии Тоҷикистон мардони ба синни 18 расида, инчунин шаҳрвандони калонсол, ки ҳуқуқи таъхир ё озод кардан аз хидматро надоранд, даъват мешаванд.”


Эмомалӣ Раҳмон дар фармони худ аз комиссияҳои даъвати вилоятҳо ва шаҳри Душанбе хоста шуда, ки барои ҷалби ҷавонон ба қисмҳои ҳарбӣ диққати ҷидӣ дода шавад. Инчунин аз комиссариатҳои ҳарбӣ ва мақомоти маҳаллӣ низ талаб шуда, ки дар як ҷоягӣ даъватро мувофиқи қонун ба роҳ андозанд.

Талаби “ҷалби ҷавонон ба артиш мувофиқи қонун” дар ҳоле садо медиҳад, ки ҳамасола садҳо ҳолати бо зӯр аз кӯчаву бозор боздошт кардани ҷавонон ба артиш дар расонаҳо нашр мешавад. Ва сокинон ин амали мақомотро ғайриқонунӣ арзёбӣ мекунанд, вале то ҳол ҳеч мақомдоре барои ин рафтори ғайриқонунияш муҷозот нашудааст.

Ҳамчунин Эмомалӣ дар фармони худ Вазорати фарҳанг, Комитаи кор бо ҷавонон ва варзиш, Комитаи телевизион ва радио вазифадор карда карда, ки раванди даъватро бо воситаи ахбори омма паҳн кунанд.

Ин ҳам дар ҳоле аст, ки ба назари огоҳон Эмомалӣ Раҳмон дар тӯли беш аз 30 соли ҳукуматдориаш ҳар сол ду маротиба барои ҷалби сарбозон ба артиш чунин фармоне содир мекунад. Аммо ҷалби сарбозон ҳамеша аз роҳои ғайриқонунӣ сурат мегирад. Боздошти ҷавонон дар кӯчаву хиёбонҳо, фишор боли падар модарҳои ҷавонон аз роиҷтарин абзоре аст, ки ҳукумати хонаводагии Эмомалӣ барои ҷалби сарбоз истифода мекунад.

Думаи давлатӣ: Муҳоҷироне, ки бемории вазнин доранд, бояд ихроҷ шаванд

Аз ҷониби
Azda TV
-
0

Вакилони парлумони Русия пешниҳод кардаанд, ки муҳоҷирон бояд ба таври илзомӣ ҳар сол як маротиба аз муонаи тиббӣ гузаранд.

Гуфта мешавад, аз тарафи Комиссияи Думаи давлатии Русия оид ба сиёсати муҳоҷират пешниҳод шудааст, ки дар қонунгузорӣ муқаррар карда шавад, ки муҳоҷирон уҳдадоранд, пас аз як соли ворид шуданашон ба ин кишвар боз дубора аз муоинаи тиббӣ гузаранд. 

Дар ин бора хабаргузории русии ТАСС аз қавли Ирина Яровая, муовини раиси парлумон ва раиси Комиссияи Думаи давлатии Русия оид ба сиёсати муҳоҷират хабар додааст.

Ба иттилои “Дума ТВ”, Ярмова дар нишасти Комиссия рӯи шахсисозӣ кардани вазифаи аз муоина гузаштани муҳоҷирон таъкид карда, гуфтааст: “Мо дар сатҳи қонунгузорӣ уҳдадор шудани муҳоҷирон барои гузаштан аз муоинаи тиббӣ пас аз як соли ворид шуданашонро пешниҳод мекунем. Ташкили гузоришҳои тиббӣ ба таври электронӣ ин имкониятро ба мо медиҳад, ки муҳимтарин масъалаи марбут ба шахсисозӣ кардан (ба уҳдаи худи фард гузоштан)-и масъулият кайфияти муоинаҳои тиббиро ҳал кунем ва ин масъулиятро ба уҳдаи худи афрод гузорем”.

Системаи баҳисобгирии байниидоравӣ бо иттилоотрасонӣ ба мақомоти корҳои дохилӣ ба мо дар ҳалли дигар масъалаҳои муҳими ин тарҳ кумак мекунад. Аз ҷумла, масъалаи муҳими дигар ин назорат болои будубош ва ихроҷи муҳоҷирон аст.

Ин намояндаи Думаи давлатии Русия гуфта, ки “Ҳарчанд масъалаи ихроҷи нафароне, ки ба бемориҳои хатарнок мубтало ҳастанд, хеле печида ва ҳассос аст, вале суоли воқеӣ ин аст, ки дар куҷо бояд ин афроди мубтало ба бемориҳои ҷиддиро нигоҳ дошт ва аз инзивояшон мутмаин гардид?” 

Пештар раиси Думаи давлати Русия Вячеслав Володин гуфта буд, ки Думаи давлатӣ иқдомоти қонуниро барои муоинаи тиббии шаҳрвандони хориҷие, ки ба Федератсияи Русия меоянд таҳия карда истодааст.

Ҳамин тавр Думаи давлатӣ аз раҳбарияти Федератсияи Русия интизор дорад то пешниҳодот оид ба танзими муҳоҷирати корӣ ва ворид шудани хонаводаҳои муҳоҷирони корӣ ба қаламрави Русияро ироа кунад.

Боздошти марде, ки дар бозори Панҷакет як кӯдакро ба корд зад

Аз ҷониби
Azda TV 3
-
0

Наворе дар шабакаҳои иҷтимоӣ паҳн шудааст, дида мешавад як марди калонсол дар дохили бозор бо корд ба шиками кӯдак мезанад ва аз ҷои ҳодиса фарор мекунад.

Гуфта мешавад, ки ин ҳодиса 16-уми феврал дар бозори Панҷакент иттифоқ афтодааст. Дар ин навор, ки дурбини мадорбастаи бозор сабт кардааст, дида мешавад, кӯдак бо модараш аст, марди ҳамлагар рӯбарӯи онҳо омада, бе далел ва хеле хунсардона ба шиками кӯдак корд зада, ба роҳаш идома медиҳад. Лаҳзае пас кӯдак фарёд зада шикамашро меқапад ва мардум дар гирди ӯ ҷамъ мешаванд. Дертар дар фазои маҷозӣ хабар нашр шуд, ки кӯдак зинда аст ва саломатияш низ хуб аст.

Ин ҳодиса дар шабакаҳои иҷтимоии тоҷикӣ сару садои зиёдеро ба бор овард ва сокинон аз мақомоти дахлдор хостори ҳарчи зудтар боздошт ва муҷозоти сахт кардани ин мардро карданд.

Дертар аксе нашр шуд, ки гуфта мешуд марди гумонбар боздошт шудааст. Дар ҳоли ҳозир, ҷузъиёти ин ҳодиса ошкор нашудааст ва дар бораи кӯдаки ҷабрдида ва марди гумонбар иттилооти зиёде нест. То ҳол Вазорати корҳои дохилӣ расман дар ин бора чизе нагуфтааст.

Мақомоти Тоҷикистон аз нав мубориза бо риш ва ҳиҷобро оғоз кардаанд?

Аз ҷониби
AZDA-TV
-
0

Дар вилояти Хатлони Тоҷикистон кормандони милитсия ҷавонеро барои гузоштани риш боздошт карданд.

Як шоҳиди ҳодиса бо шарти фош нашудани номаш рӯзи чоршанбе ба Azda.tv гуфт, ки кормандони ҳифзи ҳуқуқ ин ҷавонро мустақиман дар кӯча нигоҳ дошта, сабаби риш гузоштанашро пурсиданд ва баъдтар ӯро маҷбур сохтаfнд, ки ришашро тарошад, аммо ҷавон талаби кормандони милитсияро рад кардааст. Кормандони ҳифзи ҳуқуқ баъд аз шунидани ҷавоби рад ҷавонро бо зӯр ба шуъбаи милитсия бурда, ришашро маҷбуран тарошиданд ва ӯро бо иттиҳоми вайрон кардани тартиботи ҷамъиятӣ ҷарима ва барои 10 шабонарӯз ҳабс кардаанд.

Ба гуфтаи шоҳиди ҳодиса ин ҷавон намозашро ҳамеша намехонад ва ба масҷид ҳам намерафт, аммо ин ҳам натавонист ӯро аз муҷозот наҷот диҳад.

Ин бори аввао нест, ки кормандони ҳифзи ҳуқуқи кишвар ҷавонону мардонро барои доштани риш боздошту ҷарима ва бидуни ризоияташон дар идораҳои милитсия ришашонро метарошанд.

Қонунгузории кишвар расман гузоштани ришро барои ҳеч марде манъ намекунад, аммо солҳои охир назорати шадид дар мавриди намуди зоҳирии сокинон мушоҳида мешавад. Мақомот чунин чораҳоро “амалиёт дар чорчӯби мубориза бо фарҳангӣ бегона ва ба тартиб даровардани намуди зоҳирии сокинон” меноманд. Аммо таҳлилгарон мегӯянд, ки ин амали мақомот бештар мубориза бо арзишҳои дини ислом равона гаштааст.

Аз ҷумла, дар гузашта мақомот рафтани ҷавононро ба масҷид манъ карда буданд. Дертар Вазорати маорифи кишвар бо қароре пӯшидани сатрро барои занон ва гузоштани ришро барои мардони ҷавон ва “идгардак”-и кӯдакону донишомӯзонро манъ карда буд.

8-уми майи соли 2024 парлумони кишвар ба қонун “Дар бораи танзими ҷашну маросим” тағйиру иловаҳо ворид намуда, “воридот, фурӯш, тарғиби либосҳои ба фарҳанги миллӣ бегона, инчунин, дар ҷойҳои ҷамъиятӣ пӯшидани чунин либосҳо”-ро манъ кард.

Пас аз қабули ин қонун мақомот даст ба “рейд”-и занони ҳиҷобдор зада, занонро дар кӯчаву бозору идораҳо маҷбур мекарданд, ки ҳиҷобашонро бигиранд.

Ин фишору рейдҳо вокуниши корбарони шабакаҳои иҷтимоиро ба бор овард ва мақомот маҷбур шуданд барои муддате аз ин навъ боздошту бозпурсиҳо худдорӣ кунанд.

Созмонҳои байналмилалӣ борҳо чунин амалҳои мақомдорони тоҷикро интиқод карда буданд. Ба гуфтаи гурӯҳҳои ҳомии ҳуқуқ, маҳдудият дар доштани риш озодиҳои шахсиро поймол мекунанд ва метавонад ҳамчун табъиз (дискриминатсия) аз рӯи эътиқоди динӣ арзёбӣ шавад.

Azda TV аз хонандагони худ мехоҳад, назарҳои худро дар бораи чунин ҳолатҳо бикоранд. Агар худи Шумо ва ё наздиконатон бо чунин мушкилот рӯбарӯ шудаед, метавонед ҳикояти худро тариқи Вотсап ва Телеграми мо бо рақами +48571608008 фиристед.

Трамп: Зеленский раисҷумҳури бекифоят аст!

Аз ҷониби
AZDA.TV
-
0

Раисҷумҳури Амрико Доналд Трамп дар як изҳороте мулоқоти дирӯзаи намояндагони Амрико ва Русияро “муфид ва бисёр хуб” арзёбӣ кард.

Ӯ зимни изҳороташ гуфт, президенти Украина Владимир Зеленский президенти бекофият аст ва хостаҳои беҷо дорад.

Зеленский қаблан гуфта буд, ки заминҳои аз ғасбшудааш аз ҷониби Русия бояд ба Украина баргардонида шаванд ва тамоми музокирот байни Русия ва Амрико дар мавриди Украина бидуни ҳузури Киев эътибор надорад. Аммо Трамп мегӯяд, “Гумон мекунам қудрати хотима додани ҷангро дар Украина дорам.”

Инчунин Трамп мегӯяд, Украина, ки ба пешниҳодоти ӯ розӣ нест, 3 сол муҳлат дошт ва мебоист ҷангро ба охир мерасонад. Ӯ ҳамчунин аз раисҷумҳури Украина интиқод кард ва гуфт, ки маҳбубияти Зеленский дар кишвараш 4%-ро ташкил медиҳад ва бояд интихобот гузаронида шавад. Аммо имрӯз Владимир Зеленский дар изҳороте ин иддаои Трампро рад кард ва гуфт, ки 4% ин омори Русия аст ва дар асл дар байни шаҳрвандонаш аз маҳбубияти болое бархурдор аст.

Зеленский мегӯяд, ӯ низ мехоҳад ҳарчи худтар ҷанг бо Русия хотима ёбад, аммо бояд манофеи амниятияш ба инобат гирифта шавад. “Мо поён додани ҷангро мехоҳем, вале раванди музокирот бояд одилона бошад. Мо намехоҳем, ки касе бореро бар дӯши мо гузорад.”, мегӯяд раисҷумҳури Украина.

Ин ҳам дар ҳолест, ки ба гуфтаи таҳлилгарон, Зеленский ва раҳбарони кишварҳои аврупоӣ аз он нигаронанд, ки Трамп дар масъалаи сулҳ бо Путин шитобзада аст ва ин метавонад боиси нодида гирифтани манофеи амниятии онҳо шавад ва низ дар оянда дасти Путинро барои таҳдид ба Украина ва ё дигар кишварҳо бозтар гузорад.

Расонаҳои ғарбӣ мегӯянд, ки Трамп аллакай барои Русия имтиёзҳое додааст, аз ҷумла шомилшавии Украинаро ба НАТО рад карда, хоҳиши Киев барои барқарор кардани тамоми қаламравҳои аздастрафтаашро “хаёлпарастӣ” хондааст.

Ёдовар мешавем, ки дирӯз, 18-уми феврал дар шаҳри Риёз, пойтахти Арабистони Саудӣ нишасти вазирони корҳои хориҷии Русия ва Амрико доир гашт. Гуфта мешуд, меҳвари асосии гуфтушунид дар он нишаст масъалаи поён додани ҷанги Русия бо Украина аст. Аммо дар байни музокиракунандагон намояндагони Украина ҳузур надоштанд.

Владимир Зеленский низ дирӯз дар Анқара ба хабарнигорон гуфт, ки аз ин ки ба нишасти Риёз намояндагони Украина даъват нашуданд, ғофилгир шудааст.

Гуфта мешуд, дар нишасти Риёз ҳайати Русияро вазири корҳои хориҷии он Сергей Лавров ва ёвари президенти Русия Юрий Ушаков намояндагӣ мекарданд, аммо ҳайати Амрико аз вазири корҳои хориҷии ин кишвар Марко Рубио, мушовири амнияти миллӣ Майк Волтз ва фиристодаи вежаи ИМА дар умури Ховари Миёна Стивен Виткоф иборат буд.

Тибқи иттилои расонаҳо, Амрико ва Русия дар нишасти дирӯзаи Риёз роҳҳои хотима додан ба ҷанги сесолаи Украина ва ҳамчунин масоили дуҷонибаро муҳокима карданд. Намояндагони ду тараф инчунин роҳҳои беҳбуд бахшидани муносибатҳои байни кишварҳо, аз ҷумла коҳиш додани таҳримҳои иқтисодӣ ва таҳкими ҳамкориҳои тиҷоратиро баррасӣ карданд. Гуфта мешавад, ин музокирот метавонад заминаи мулоқоти байни президенти ИМА Доналд Трамп ва ҳамтои руси ӯ Владимир Путинро фароҳам оварад.

Сергей Лавров, вазири корҳои хориҷии Русия дирӯз пас аз нишаст ба хабарнигорон гуфт, ки агарчи дар ин марҳила бо Амрико намешавад 100% ба тавофуқ расид, аммо якдигарфаҳмиҳо ва дастовардҳое дар мавриди поён додани ҷанг дар Украина вуҷуд дорад.

Сафари расмии Сарвазири Тоҷикистон ба Эрон

Аз ҷониби
Azda TV
-
0

Бино ба иттилои расонаҳои давлатӣ, Сарвазири Тоҷикистон Қоҳир Расулзода рӯзи 17-уми феврал бо сафари расмӣ вориди Теҳрон шуд.

Гуфта мешавад, мулоқот ва гуфтушунидҳои Қоҳир Расулзода бо муовини якуми президенти Эрон Муҳаммад Ориф ва ҳамин тавр мулоқоти ҳайатҳои баландмақом баргузор гардид. Расулзода зимни мулоқотҳо баён дошта, ки Эрон дар низоми равобити байналмилалии Тоҷикистон ҷойгоҳи хосса дорад.

Дар ҷараёни суҳбатҳо ишора шуда, ки соли гузашта ҳаҷми гардиши молу маҳсулот байни ду давлат афзоиш ёфта, муносибатҳо дар соҳаҳои мавриди таваҷҷуҳ ба таври назаррас густариш ёфтаанд.

Ҳамчунин дар мулоқотҳо гуфта шуд, ки Тоҷикистон ва Эрон барои ҳамкории дуҷонибаи судманд дар соҳаҳои гидроэнергетика, саноати маъдан, сохтмон, хӯрока, дорусозӣ, нақлиёт, кишоварзӣ ва тиҷорату сармоягузорӣ имконоти фаровон доранд ва истифодаи самараноки ин имконияту захираҳо метавонад барои рушди ҳамкории дуҷониба дар соҳаҳои гуногун заминаи воқеӣ гузорад.

Гуфта мешавад, дар муқоиса бо солҳои пешин соли 2024 ҳаҷми ҳамлу нақли молу маҳсулоти миёни ин ду кишвар 3,2 баробар зиёд гаштааст ва феълфан дар Тоҷикистон 160 ширкат бо сармояи Эрон фаъолият доранд.

Муҳаммадризо Ориф баён дошта, ки муносибатҳои сиёсии Тоҷикистону Эрон дар сатҳи олитарин қарор доранд ва сафарҳои ахири раисҷумҳур Масъуд Пизишкиён ба Тоҷикистонро тасдиқи ҷонибдории рушди муносибатҳо аз тарафи Эрон унвон кард.

Ҷониби Эрон дар ин мулоқотҳо гуфта, ки Эрон омода аст дар Тоҷикистон дар бахшҳои мухталиф сармоягузорӣ кунад ва ниёзҳои ин кишварро бароварда созад.

Ҷонибҳо ҳамчунин хотирррасон кардаанд, ки аз моҳи гузашта реҷаи раводид миёни кишварҳо бекор шуд, ки барои тиҷорат шароити хубу мусоидро муҳайё месозад.

Тибқи иттилои расонаҳои Эрон, Сарвазири Тоҷикистон Қоҳир Расулзода 18-уми феврал дар ин сафар ҳамчун меҳмони вежа ба “Ҳамоиши сеюми иқтисодии Хазар”, ки дар шаҳри Теҳрон доир шуд, иштирок ва суханронӣ намудааст. Дар ин ҷамъомад сарвазирони кишварҳои Русия, Туркманистон, Қазоқистон ва Озарбойҷон барои муҳокимаи масъалаҳои ҳамкории минтақавӣ ва рушди иқтисодӣ гирди ҳам омадаанд.

Ёдоварӣ мешавем, ки дар моҳи январи соли равон сафари расмии Масъуд Пизишкиён раисиҷумҳури Эрон ба Тоҷикистон баргузор шуд, ки дар он сафар 23 санади ҳамкории дуҷониба ба имзо расид. Дар ҷараёни сафар Форуми тиҷоратии кишварҳо дар Душанбе баргузор шуд ва маблағи зиёда аз 450 млн доллар санадҳои ҳамкорӣ имзо шуд.

Мақомоти Тоҷикистону Эрон дар ин чанд соли ахир равобити печидае доштанд. Тира шудани муносибатҳои дипломатии ду кишвар аз зиндонӣ шудани Бобаки Занҷонӣ шуруъ шуд ва бо бастани Ҳизби наҳзати исломии Тоҷикистон дар соли 2015 тиратар гашт.

Аммо соли 2019 пас аз сари қудрат омадани Иброҳим Раисӣ дар Эрон муносибатҳои ин ду кишвар нармтар шуд ва дар замони расиҷумҳурии Расиӣ миёни Тоҷикистону Эрон низоми бидуни раводид барои шаҳрвандони ду кишвар ҷорӣ шуд.

“Рейд”-и муҳоҷирон дар бозору кӯчаҳои Русия

Аз ҷониби
AZDA-TV
-
0

Мақомоти Русия дар бозору кӯчаҳои шаҳру ноҳияҳо барои тафтиши муҳоҷирон “рейд” гузаронданд.

Дар пайи ин тафтишу бозпурсиҳо кормандони Кумитаи тафтишот ва пулиси Русия танҳо аз бозори Савеловскийи Маскав беш аз 300 нафарро боздошт кардаанд.

Гуфта мешавад, мақомоти рус бештар дар комиссариати ҳарбӣ сабти ном шудан ё нашудани муҳоҷиронро санҷида, афроди боздоштшударо ба мусофирбарҳо савор карда, ба маркази муҳоҷират ва ба комиссариатҳои ҳарбӣ мебаранд.

Ба ҳамин монанд “рейдҳо” дар дигар минтақаҳои Русия низ идома дорад ва маълум нест чанд муҳоҷири тоҷик боздошту ба комиссариати ҳарбӣ бурда шудаанд.

Ёдовар мешавем, ки раисҷумҳури Русия Владимир Путин дар моҳи августи соли ҷорӣ лоиҳаи қонунеро имзо карда буд, ки тибқи он ҳар нафаре, ки пас аз гирифтани шаҳрвандии ин кишвар худро дар артиш сабти ном намекунд, ё аз хидмати сарбозӣ саркашӣ мекунад, шиносномаи Русияаш бекор карда мешавад.

ВКД-и Русия иддао дорад, ки чунин тадбирҳо ба таъмини баробарии ҳамаи шаҳрвандон дар назди қонун нигаронида шудааст на ба маҳрумсозии оммавӣ аз шаҳрвандии зодагони дигар кишварҳо.

Аммо муҳоҷирон, бахусус зодагони Тоҷикистон мегӯянд, ки дар аксар ҳолат санҷишҳо ва бекор кардани шаҳрвандии Русия нисбати онҳо сурат мегирад ва мақомоти Русия бо ин кор мехоҳанд ҳарчи бештар зодагони дигар кишварҳоро ба артиш ҷалб кунанду ба ҷанг дар Украина бифиристанд.

Гуфта мешавад, назорат болои муҳоҷирин ва ихроҷи онҳо дар Русия баъд аз ҳодисаи хунин “Крокус Сити Холл”, ки гумонбарони он шаҳрвандони Тоҷикистон мебошанд, шиддат гирифт. Пас аз ин ҳодиса чораҳои назоратӣ сахттар шуда, маҳдудиятҳои нав дар бораи фаъолияти кории муҳоҷирон дар аксар минтақаҳои Русия ҷорӣ карда шуданд.

Танҳо дар соли 2024 бо қарори додгоҳҳои Русия беш аз 90 ҳазор муҳоҷир аз хоки Русия ихроҷ шудаанд. Ин дар ҳолест, ки дар соли 2023 аз Русия 44,2 ҳазор ва дар соли 2022 26,6 ҳазор муҳоҷир ихроҷ шуда буданд.

Мақомоти Русия нагуфтаанд, ки аз ин шумора чанд нафарашон зодагони Тоҷикистон мебошанд, аммо Ҳабибулло Воҳидзода, додситони кулли кишвар 14-уми феврали соли ҷорӣ, зимни нишасти матбуотӣ ба хабарнигорон гуфт, ки соли 2024 аз Русия беш аз 30 ҳазор муҳоҷир ихроҷ шудааст ва танҳо аз фурудгоҳҳои Русия беш аз 17 ҳазор шаҳрванди Тоҷикистон баргардонида шудаанд.

Дар Риёз бидуни ҳузури Украина қазияи ҷангро баррасӣ мекунанд

Аз ҷониби
AZDA.TV
-
0

Имрӯз сешанбе, 18-уми феврал дар шаҳри Риёз, пойтахти Арабистони Саудӣ нишасти намояндагони Амрико ва Русия дори гашт.

Вазорати корҳои хориҷии Саудӣ дар изҳороте гуфтааст, бо фармони шоҳзода Муҳаммад бин Салмон нишастеро бо ҳузури намояндагони вежаи Амрико ва Русия барои ҳалли мушкилоти ҷанг дар Украина мизбонӣ хоҳад кард.

Ин нишаст, ки дар сатҳи вазирони корҳои хориҷии Амрико ва Русия сурат мегирад, қарор аст дар он масъалаи поён додани ҷанги Русия бо Украина баррасӣ шавад. Аммо дар байни музокиракунандагон намояндагони Украина ҳузур надоранд.

Ҳайати Русияро вазири корҳои хориҷии он Сергей Лавров ва ёвари президенти Русия Юрий Ушаков намояндагӣ мекунанд, аммо ҳайати Амрикоро вазири корҳои хориҷии ин кишвар Марко Рубио, мушовири амнияти миллӣ Майк Волтз ва фиристодаи вежаи ИМА дар умури Ховари Миёна Стивен Виткоф ташкил медиҳанд.

Интизор меравад, ки ҷонибҳои Амрико ва Русия роҳҳои хотима додан ба ҷанги сесолаи Украина ва ҳамчунин масоили дуҷонибаро муҳокима кунанд. Намояндагони ду тараф инчунин роҳҳои беҳбуд бахшидани муносибатҳои байни кишварҳо, аз ҷумла коҳиш додани таҳримҳои иқтисодӣ ва таҳкими ҳамкориҳои тиҷоратиро баррасӣ хоҳанд кард. Гуфта мешавад, ин музокирот метавонад заминаи мулоқоти байни президенти ИМА Доналд Трамп ва ҳамтои руси ӯ Владимир Путинро фароҳам оварад.

Расонаҳои русӣ низ хабар доданд, ки Сергей Лавров бо ҳамтои амрикоӣ ва бо дигар намояндагони баландмақоми Амрико дар Риёз гуфтугӯ хоҳад кард ва қазияи меҳварии ин мулоқот гуфтушунид дар мавриди поён додани ҷанги сесолаи Русия бо Украина хоҳад буд.

Ба иттилои расонаҳо, Лавров дар мулоқоти худ бо намояндагони Амрико се масъалаи калидиро матраҳ кардааст. Аз ҷумла, поён додани ҷанг, интихоботи президентӣ дар Украина ва раванди имзои созишномаи сулҳ аз ин масоил будаанд.

Ин нишаст дар ҳоле сурат мегирад, ки ба Кохи Сафед омадани Доналд Трампро ҳанӯз як моҳ сипарӣ нашудааст. Таҳлилгарони рус ҳайати Трампро дар ҳалли мушкилоти ҷаҳонӣ муассир ва фаъол медонанд.

Дар ҳамин ҳол президенти Украина Владимир Зеленский дар изҳороте гуфт, ки ҷониби Украина ба нишасти Риёз даъват нашудааст ва таъкид кард, ки ҳар гуна музокирот бе ҳузури Украина бидуни фоида аст ва натиҷаҳои онро эътироф нахоҳад кард.

Ҳалокати беш аз 500 нафар дар садамаҳои нақлиётии кишвар

Аз ҷониби
Azda TV
-
0

Танҳо дар давоми соли 2024 дар роҳҳои мошингарди Тоҷикистон 552 нафар бар асари садамаҳои нақлиётӣ ҷони худро аз даст додаанд.

Дар ин бораи вазири корҳои дохилии кишвар Рамазон Раҳимзода рӯзи 13-уми феврал зимни нишасти матбуотии ниҳодаш хабар дод.

Раҳимзода теъдоди кулли тасодуфи мошинҳоро зиёда аз 1200 ҳолат зикр кард. Ӯ афзуд, ки дар пайи ин ҳодисаҳо 1350 нафар захмӣ шудааст.

Сабабҳои асосии ин садамаҳо суръати баланд, дар ҳолати мастӣ рондани мошин ва беэътиноӣ ба қоидаву қонуни ҳаракат дар роҳҳо гуфта мешавад.

Аммо бархе аз мунтақидон чанд омили дигар, азҷумла доштани мошинҳои куҳна ва ғайристандартӣ ба далелҳои камбуди молии ронандагон, роҳҳои ноҳамвор ва таъмирнашуда, беэътиноӣ ба дониши ронандагон ҳангоми имтиҳонсупорӣ дар мактабҳои ронандагии Тоҷикистонро ба ин садамаҳо рабт медиҳанд.

Таҳлилгарон марги 552 нафарро дар байни ҷамъияти 10 миллионаи Тоҷикистон зиёд арзёбӣ мекунанд. Ба гуфтаи онҳо, ин омор тақрибан 55 ҳалати марг дар 1 миллион шаҳрванд рост меояд, ки миёнгини омори ҷаҳонии ҳалокатҳо дар ҳодисаҳои роҳ 17 ҳолати вафот дар 100 ҳазор ҷамъият мебошад. Тибқи ин омори Тоҷикистон 5,5 ҳолати вафот дар 100 ҳазор аҳолӣ рост меояд, ки он нисбат ба бархе кишварҳои аз нигоҳи аҳолӣ монанд ба Тоҷикистон боз ҳам зиёд аст.

Вазири корҳои дохилии кишвар дар ин нишаст инчунин гуфт, ки теъдоди садамаҳо ва қурбониён дар муқоиса ба соли 2023 андаке поин аст, вале ҳамоно ташвишовар боқӣ мемонад.

Ёдовар мешавем, ки соли 2018 Иттиҳодияи Аврупо лоиҳае бо ҳадафи кам кардани садамаҳои роҳ пиёда кард. Чашмандози ин лоиҳа то соли 2030 теъдоди ҳалокатҳоро дар ин самт то 50% коҳиш додан буд ва то соли 2050 он бояд ба сифр расонда шавад. Ин лоиҳаи “Чашмандози сифр” номгузорӣ шудааст.
Нашрияи Комиссияи Аврупо (European Commision) мегӯяд, бо иҷро кардани ин лоиҳа аз соли 2019 то соли 2023 10% ҳалокатҳо камтар шудаанд. Таҳлилгарон пешниҳоди эҷоди чунин тарҳҳоро барои Тоҷикистон низ зарурӣ мешуморанд.

СММ: Хатари ДИИШ ҷаҳонро таҳдид мекунад

Аз ҷониби
Azda TV 3
-
0

Шӯрои Амнияти Созмони Милали Муттаҳид дар як нишасте рӯзи 10-уми феврал масъалаи терроризм, махсусан хатари ДИИШ ва шохаи осиёии он, Вилояти Хуросонро таҳлилу барасӣ кард.

Амрико аз афзоиши тавони ин гурӯҳи террористӣ дар минтақа, махсусан дар Афғонистон нигаронӣ кардааст. Муовини намояндаи Амрико дар Созмони Милал Дороти Шиа зимни баррасии фаъолияти ДИИШ аз тавоноии ин гурӯҳ барои ҷалби афрод дар Афғонистон ва Покистон суҳбат карда, фаъолияти онҳоро нигаронкунанда донист.

Дороти Шиа дар идома гуфт: “Гурӯҳҳои вобаста ба Давлати исломӣ дар Осиёи Марказӣ, бахусус шохаи Хуросон низ як таҳдиди ҷаҳонӣ ҳисоб мешавад. Мо ҳамчунон аз тавоноиҳои шохаи Хуросони ДИИШ барои нақша, иҷрои ҳамлаҳо ва ҳамчунин талошҳои ҷалби афрод, бахусус дар Афғонистон ва Покистон, нигарон ҳастем.”

Владимр Воронков, раиси дафтари Созмони Милал оид ба мубориза бо терроризм зимни суханронияш дар ин нишаст гуфт, ДИИШ ҳоло ҳам ба сафи худ аз кишварҳои Осиёи Марказӣ сарбоз мегирад. Вай шохаи Хуросони ДИИШ-ро таҳдид барои Афғонистон ва ҷаҳон номид.

Ба гуфтаи ӯ, шохани Хуросони ДИИШ ба ҷуз ҳамлаҳо дар Афғонистон чандин ҳамлаҳои террористиеро дар хориҷ аз Афғонистон, аз ҷумла кишварҳои аврупоӣ тарроҳӣ кардааст. Владимр Воронков мегӯяд: “Созмони Милали Мутаҳид ва мутаҳидонаш барои пешгирии густариши фаъолияти ДИИШ талош мекунанд, аммо мутасифона ин гурӯҳи террористӣ ҳоло ҳам фаъол аст.”

Дар ин нишасти СММ кишвари Покистон низ аз қувват гирифтани гурӯҳҳои террористӣ нигаронӣ кард. Мунир Акрам намояндаи ин кишвар дар нишасти Шӯрои Амният гуфт, “Ал-Қоида дар Осиёи Марказӣ нотавон шуда буд, аммо дар Афғонистон дубора тақвият ёфтааст.” Ӯ баён дошт, ки ДИИШ дар Покистон ва Афғонистон пайваста сарбозгирӣ мекунад.

Аммо гурӯҳи Толибон, ки ҳоло дар Афғонистон зимоми қудртаро дар даст дорад, борҳо иддао карда, ки ДИИШ аз хоки Покистон вориди Афғонистон шуда, ё аз шаҳрвнадони фирории Тоҷикистон ташкил шуда, дар Афғонистон амалҳои террористӣ анҷом медиҳад. Чанде пеш ин гурӯҳ низ аз боздошти аъзои ДИИШ хабар дода, муддаи шуда буд, ки афрод аз Покистон вариди хоки Афғонистон шудаанд.

Ва борҳо низ ҳангоми дастгирии аъзои ДИИШ аз ҷониби нерӯҳои амниятии Толибон, боздоштшудаҳо иқрор шуда буданд, ки шаҳрнвади Тоҷикистон ҳастанд ва бо ваъдаҳои дурӯғ аз роҳҳои гуногун вориди Афғонистон шуда, қасди амалҳои террористиро доштанд.

Тоҷикистон, ки бо Афғонистон 1334 километр марзи муштарак дорад, ҳамеша аз ҳузури гурӯҳҳои террористӣ дар Афғонистон нигарон аст. Сироҷиддин Муҳриддин, вазири умури хориҷаи Тоҷикистон рӯзи 11-уми феврал таъкид кард, ки Тоҷикистон аз фаъолтар шудани гурӯҳҳои террористӣ ва ҳузури мубалиғони ин гурӯҳҳо дар Осиёи Марказӣ ба шидад нигарон аст.

Таҳлилгарон мегӯянд, бештари нигаронии Тоҷикистон барои ҳузури пуррранги шаҳвандони тоҷик дар сафи ин гурӯҳҳои террористӣ аст.

1...142143144...786саҳифаи 143 аз 786