Имрӯз дар Душанбе додгоҳе раҳбари рабудашудаи Ҳаракати сиёсии “Гурӯҳи 24”, Суҳроб Зафарроро муҳокима карданд.

Дар ин бора Ҳаракати сиёсии “Гурӯҳи 24” дар сомонаи расмиаш хабар дод. Гуфта мешавад, қисми аввали мурофиа рӯзи 18-уми сентябр пушти дарҳои баста ва бидуни иштироки пайвандонаш сурат гирифтааст. 

Имрӯз, 20-уми сентябр “Радиои Озодӣ” аз қавли манобеаш навишт, ки қисми дуюми мурофеаи Суҳроб Зафар, раҳбари Ҳаракати сиёсии “Гурӯҳи 24” ва Насимҷон Шарифов, узви дигари рабудашдаи ин созмони мухолиф, паси дарҳои баста дар Боздоштгоҳи рақами яки Душанбе оғоз шудааст.

Маълум нест, ки онҳо бо адвокат таъмин шудаанд ё на, чун мақомот дар ин бора изоҳори назар намекунанд. Ба иттилои манбаъ, имрӯз ҳам пайвандони ин мухолифонро ба додгоҳ раҳ надодаанд. 

“Гурӯҳи 24” рабуда шудани роҳбарашро дар баёнияе “дуздии байналмилалӣ” уновон карда, гуфта буд, ки ин амал як иқдоми ошкоро барои хомӯш кардани ҳаракатҳои мухолифин ва маҳдуд карадни озодии сиёсии шаҳрвандон аст. 

Раҳбари “Гурӯҳи 24” Суҳроб Зафар ҳамроҳ бо узви фаъоли ин гурӯҳ Насимҷон Шарифов дар моҳи феврали ҳамин сол аз Туркия нопадид шуданд ва дертар аз Тоҷикистон пайдо шуданд. Мақомот то ҳол чӣ гуна дастгир кардану ба Тоҷикистон бурдани онҳоро шарҳ надодаанд.

Маҷмаи Умумии Созмони Милали Муттаҳид рӯзи 18-уми сентябр қатъномаеро қабул кард, ки тибқи он Исроил муваззфа шудааст, нерӯҳои худро аз Навори Ғазза берун кашад.

Гуфта мешавад, барои иҷрои ин Қатънома ба Исроил 12 моҳ муҳлат дода шуда ва ҳамчунин ин Қатънома Исроилро уҳдадор мекунад, то шаҳраксозиро дар заминҳои Фаластин фавран бас кунад.

Аз 193 кишвари узви СММ 124 кишвар аз Қатънмоа ҷонибдорӣ кардаанд. Аз ҷумла, Тоҷикистон, Русия ва дигар кишварҳои Осиёи Марказӣ ба фоидаи Қатънома овоз додаанд.

Аммо Амрико, яке аз ҳампаймони наздики Исроил ба ин Қатънома мухолифат кард. Дар умум 13 кишвар, аз ҷумла Аргентина, Чехия, Маҷористон (Венгрия), Парагвай ва ғайра бар зидди Қатънома раъй доданд ва 43 кишвари дигар аз овоздиҳӣ худдорӣ варзиданд.

Ин Қатънома бар асоси як хулосаи машваратии Додгоҳи олии СММ (Лаҳай) дар моҳи июли соли ҷорӣ гирифта шудааст, ки гуфта буд, Исроил бар хилофи қонунҳои байналмилалӣ Каронаи Бохтарӣ, Байтулмуқаддаси Шарқӣ ва Навори Ғаззаро ишғол кардааст.

Дар хулосаи машваратии Додгоҳи байнулмилалӣ (ICJ), ки ҳайати 15-нафарии додрасҳо онро муайян кардааст, таъкид мешавад, ки “идомаи ҳузури Исроил дар сарзамини ишғолшудаи Фаластин ғайриқонунӣ” буда, Исроил уҳдадор аст то ба ҳузури ғайриқонунии худ ҳарчи зудтар хотима бахшад”.

Ин Додгоҳ ҳамчунин гуфта буд, ки Исроил бояд “ҳамаи шаҳракнишинҳоро аз сарзамини ишғолшудаи Фаластин берун кунад” ва “зарари расидаро ба тамоми шахсони воқеӣ ё ҳуқуқии дахлдор бисупорад.”

Исроил аз соли 1967 дар Каронаи Бохтарӣ ва Байтулмуқаддаси Шарқӣ тақрибан 160 шаҳрак бунёд кардааст, ки ҳудуди 700 000 яҳудиёнро дар он ҷо ҷой кардааст. Додгоҳ мегӯяд, ки ин шаҳракҳо бар хилофи қонунҳои байналмилалӣ бунёд шудаанд. 

Намояндаи Фаластин дар Созмони Милал раъйдиҳиро паёми рӯшане барои эътирофи ҳуқуқи мардуми Фаластин ба истиқлол донист, дар ҳоле, ки намояндаи Исроил онро “ҳимоят аз терроризми дипломатӣ” гуфт.

Намояндаи Фаластин мегӯяд, ҳарчанд қатъномаҳои Маҷмаи Умумии Созмони Миллал ҳатмӣ нестанд, аммо онҳо дорои аҳамияти рамзӣ ва сиёсӣ мебошанд, зеро он мавқеи ҳамаи 193 кишвари узви СММ-ро дар ин бора инъикос мекунад.

Дар ҷануби Лубнон садҳо нафар бар асари таркиши дастгоҳҳои иртиботии “Пейҷер” захмӣ шудаанд. Аксари захмиён аъзоёни гурӯҳи “Ҳизбуллоҳ” гуфта мешаванд.

Манобеи амниятӣ гуфтаанд, ки имрӯз сешанбе, садҳо узви Ҳизбуллоҳи Лубнон дар ҷануби ин кишвар ва дар канори ҷанубии Бейрут бар асари таркиши дастгоҳҳои иртиботи радиоӣ, ки онҳо истифода мекарданд, сахт маҷруҳ шудаанд.

Хабарнигори “Ал-Ҷазира” бо такя ба манобеи худ инфиҷори васоили иртиботи навъи “Пейҷер”-ро таъйид карда, ки  дар манотиқи мухталифи ин кишвари Лубнон беш аз 1200 нафар маҷрeҳ ба ҷо гузоштааст. 

Дар ҳамин ҳол хабаргузории “Меҳр”-и Эрон навишта, ки Муҷтабо Амонӣ, сафири Эрон дар Лубнон бар асари ҳамлаи киберии Исроил захмӣ шудааст. Тибқи иттилои ин хабаргузорӣ, сафир захмҳои сабук бардошта ва ба бемористон мунтақил шудааст. Гуфта мешавад, ҳамроҳи сафири Эрон ду муҳофизаш низ захмӣ шудаанд.

Як манбаи амниятӣ ба “Ал-Ҷазира” гуфтааст, ки таркиши дастгоҳҳои иртибототӣ дар Лубнон бар асари ҳамлаи ҳакерӣ, ки тавассути технологияи бесим ба роҳ монда шудааст, сар задааст. Манбаи амниятӣ тавзеҳ дода, ки таркиши дастгоҳҳои иртиботӣ дар минтақаҳои ҷанубии Бейрут, Биқоъ ва ҷануби Лубнон фаро гирифтааст.