Ҷустуҷӯ кунед
Ҷустуҷӯ
20.9 C
Dushanbe
Хона блог саҳифа 193

Ба Лавров дар бораи муҳоҷирон гуфтанд, вале ӯ шарти худро гузошт

Аз ҷониби
AZDA.TV
-
0

Вазорати корҳои хориҷии кишвар аз мулоқоти вазирони хориҷии Русия ва Тоҷикистон хабар дод.

Бино ба иттилои манбаъ, субҳи 6-уми июни соли ҷорӣ Сергей Лавров, вазири корҳои хориҷии Русия, ки бо сафари расмӣ дар Тоҷикистон қарор дорад, бо ҳамтои тоҷикаш Сироҷиддин Муриддин дидору гуфтугӯ карданд.

Гуфта мешавад, вазирони хориҷии ду кишвар зимни мулоқот дурнамои рушди муносибатҳои Тоҷикистону Русияро дар соҳаҳои сиёсӣ, тиҷоратӣ-иқтисодӣ, фарҳангӣ-гуманитарӣ ва муҳоҷират муфассал баррасӣ карданд.

Ҳамзамон таъкид мешавад, ки мақомҳои баландпояи хориҷии Русия ва Тоҷикистон дар ин дидор ба масъалаи муҳоҷирони кории тоҷик, ки беш аз ду миллион нафар дар он кишвар кору зиндагӣ мекунанд, ишора карда, хусусан ҳодисаҳои боздошту латтукӯби муҳоҷиронро, ки чанде пеш рух дод, мавриди баррасӣ қарор додаанд.

“Ҷониби Тоҷикистон таъкид намуд, ки зимни баргузории чорабиниҳои нақшавӣ ва ғайринақшавии мақомоти давлатии Русия ҷиҳати ба танзим даровардани равандҳои муҳоҷират, ҳуқуқу озодиҳои заминавии шаҳрвандони тоҷикистонии муқими Русия бояд риоя гарданд.”, омадааст дар хабари Вазорат.

Вале қабл аз ин дидор Сергей Лавров зимни боздидаш аз пойгоҳи низомии Русия дар Душанбе, маъруф ба “Пойгоҳи 201” гуфт, ки кишвараш умедвор аст, Тоҷикистон ҳарчи зудтар фоидаҳои пайвастан ба Иттиҳоди иқтисодии АвруОсиёро дарк карда, ба он мепайвандад. Ҳатто ӯ ишора кард, ки гурӯҳи махсусе барои ин кор бо мақомоти тоҷик дар гуфтугӯ ҳастанд.

Ба назри баъзе коршиносони минтақа, Тоҷикистон агар масъалаи муҳоҷирон ва эҳтироми ҳуқуқи онҳоро аз Русия талаб карда бошад, Русия ҳам шарти худро барои иҷрои ин кор гузоштааст, ки он ҳам бошад масъалаи маҷбур сохтани мақомоти тоҷик барои пайвастан ба ИИАО мебошад.

Олими шинохтаи тоҷик, Саттор Турсун даргузашт

Аз ҷониби
AZDA.TV
-
0

Саттор Турсун, нависанда ва адиби шинохтаи тоҷик шоми 5-уми июни соли ҷорӣ дар хонааш аз олам даргузашт. Дар ин бора дар шабакаҳои иҷтимоӣ наздикон ва шогирдонаш хабар доданд.

Номбурда, аз он ҷумлаи олимон ва адибони тоҷке буд, ки ҳаёти худро дар эҷодиёт ва пажӯҳишҳои илмӣ сарф карда, дар дохил ва хориҷи кишвар ном бароварда буд.

Ин олими тоҷик соли 1946 дар ноҳияи Бойсуни вилояти Сурхандарёи Узбекистон ба дунё омада, соли 1970 бахши арабии факултаи шарқшиносии Донишгоҳи давлатии Тоҷикистонро хатм кардааст.

Саттор Турсун ҷоизадори Ҷоизаи давлатии Абуабдуллоҳи Рӯдакӣ буда, узви собиқадори Иттифоқи нависандагони Тоҷикистон буд. Ӯ ҳамчун корманди шоистаи фарҳанги кишвар борҳо қадрдонӣ шудааст.

Ин зиёии тоҷик ҳаёти худро бештар дар соҳаи илму пажӯҳиш сарф карда, дар симатҳои гуногуне, ба монанди мудири шуъбаи очерк ва публитcистика, мудири шуъбаи наср, муовини сардабир, сардабири “Садои Шарқ”, узви ҳайъати таҳририяи маҷаллаи “Фарҳанг” ва ғайра кор кардааст. Ӯ аз аввалин сухангӯёни Эмомалӣ раҳмон дар соли 1993 маҳсуб мешавад, аммо дар ин симат зёд фаъолият накардааст.

То ин дам асарҳои зиёде аз ин нависандаи чирадасти тоҷик ба нашр расидааст, ки аз ҷумлаи онҳо: “Се рӯзи як баҳор”, “Санг дар бағал ба тӯфон”, “Камони Рустам”, “Мӯйсафедон”, “Зиндагӣ дар домани талҳои сурх”, “Ҳасрат” ва ғайра мебошанд.

Бозгушоии сафорати Эрон дар Арабистон

Аз ҷониби
AZDA TV-2
-
0

Мақомоти эронӣ ба сурати расмӣ фардо ва пасфардо сафоратхона ва сарконсулгарии худро дар Арабистони Саудӣ бозгушоӣ мекунанд.

Бино ба иттилои расмӣ, имрӯз, 5-уми июни соли 2023 Вазорати корҳои хориҷии Эрон гуфт, ки пагоҳ, 6-уми июн Сафорати Эрон дар Риёз бо ҳузури намояндаҳои ҳар ду кишвар бозгушоӣ мешавад.

Ба қавли манбаъ, дар назар аст, 7-уми июни соли ҷорӣ низ Консулгарӣ дар Ҷидда ва Намояндагии Эрон дар Созмони Ҳамкории исломӣ бозгушоӣ мешаванд.

Бозгушоии Сафорати Эрон дар Риёз, Консулгарии он дар Ҷидда ва Намояндвгии ин кишвар дар Созмони Ҳамкории Исломӣ аз бурузи танишҳои сиёсӣ байни ду кишвар дар 2015 баста шуда буданд.

Гуфта мешавад, мақомоти Теҳрон ва Риёз ба муддати зиёда аз 7 солу 3 моҳ қатъи робита карда буданд, баҳори имсол бо миёнҷигарии Чин мақомоти Эрон ва Арабистон дар Пекин сулҳ карда, ваъда дода буданд, ки равобити дипломатӣ, сиёсӣ ва иқтисодии худро аз сар оғоз мекунанд.

Ҳалокати наздик ба 300 мусофир дар Ҳиндустон

Аз ҷониби
AZDA TV-2
-
0

Бар асари тасодуфи 3 қатори мусофиркаш дар Ҳиндустон наздик ба 300 нафар ба ҳалокат расида, беш аз 900 каси дигар ҷароҳат бардоштаанд.

Бино ба иттилои расонаҳо, Ашвини Вайшнав, вазири роҳи оҳани Ҳиндустон хостори таҳқиқоти алоҳида аз ҷониби полиси ин кишвар дар робита ба тасодуфи маргбори қаторҳо шудааст.

Пеш аз ин таҳиқиқоти ҷудогона аз ҷониби масъулини ин кишвар оғоз шуда буд ва тибқи баровардаҳои пешкии онҳо “хатои сигнал” сабаби ин ҳодиса будааст, ки яке аз қаторҳои мусофирбар бо иштибоҳ тағйири масир кардааст.

Нахуствзири Ҳиндустон аҳм таъкид карда буд, ки омилони ин ҳодисаи маргбортарини қарн, ки дар натиҷа наздики 300 нафар ба ҳалокат расидаву беш 900 каси дигар захмӣ шудааст, ба муҷозоти сахт маҳкум хоҳад шуд.

Эмомал Раҳмон, Президенти Тоҷикистон ҳам бо ирсоли барқия ба унвони Нарендра Моди, Нахуствизири Ҳиндустон изҳори ҳамдардӣ кардааст.

Гуфта мешавад, ин ҳодиса, шоми 2-уми июни соли ҷорӣ дар иёлати Одишаи Ҳиндустон ба вуқуъ пайваста, аллакай таҳқиқот оғоз шудааст аст, вале бо гузашти 3 рӯз ҳамоно дар бораи сабабҳои бурузи ин ҳодиса ва ё омилони асосии он ба натиҷаи ниҳоӣ нарасидаанд.  

Ин ҳодиса дар яке аз истгоҳҳои роҳи оҳан, ки хатҳои зиёде дар масирҳои мухтатиф дошта аст, рух додааст. Тавре нақл карда мешавад, ин ҳодиса замоне рух дода, ки қатори мусофирбари маъмулӣ ба иштибоҳ вориди хати қатори борбар, ки дар ҷояш истода будааст, мешавад. Аз шиддати зарбаҳо чанд вагони онҳо аз хат хориҷ мешаванд ва дар ҳамин вақт қатори тезгард ба чанд вагони аз хат хориҷшуда бармехӯрад ва ин фоҷаи рух медиҳад.

Ифтитоҳи бузургтарини масиҷиди Тоҷикистон бо ҳузури амири Қатар

Аз ҷониби
AZDA.TV
-
0

Дар назар аст рӯзҳои наздик амири давлати Қатар шайхи Тамим бин Ҳамад Оли Сонӣ бо сафари расмӣ ба Тоҷикистон биёяд.

Гуфта мешавад, сафари кории амири давлати Қатар ба кишварҳои Осиёи Марказӣ аз рӯзи душанбе, 5-уми июни соли ҷорӣ оғоз ёфтааст ва қарор аст рӯзҳои 8-9-уми июни соли ҷорӣ вориди Душанбе шавад.

Расонаҳои қатарӣ ҳадаф аз сафари амири ин кишварро ба давлатҳои Осиёи Марказӣ ва хусусан Тоҷикистон баррасии ҳамкориҳои дуҷониба, таҳкими равобити дипломатӣ, иқтисодӣ, сиёсӣ ва дигар масоили мавриди алоқаи муштараки кишварҳо гуфтаанд.

Дар ҳамин ҳол расонаҳои Тоҷикистон хабар медиҳанд, ки дар назар аст дар ин сафар бо ҳузури раҳбари давлати Қатар Тамим бин Ҳамад Оли Сонӣ ва раисҷумҳури Тоҷикистон Эмомалӣ Раҳмон бузургтарин масҷиди Тоҷикистон, ки бунёди он бо сармоягузории Қатар 14 сол боз идома дорад, ифтитоҳ шавад.

Гуфта мешавад, ин масҷид яке аз бузургтарин масҷидҳо дар Осиёи Марказӣ буда, масоҳати умумии он 12 гектар мебошад. Дар дохили масҷид то 100 ҳазор намозгузор дар як вақт ҷой мегирад.

Бунёди он соли 2009 оғоз ёфта буд. Маблағи сохтмони он 100 миллион доллари амрикоиро ташкил медиҳад, ки аз ин миқдор 70 миллионашро давлати Қатар ва 30 миллони дигарашро Тоҷикистон пардохт кардааст.

Баррасии ҳамкориҳои Тоҷикистон ва Бонки ҷаҳонӣ

Аз ҷониби
AZDA TV-2
-
0

Раҳбарони сатҳи олии Тоҷикистон ва Бонки ҷаҳонӣ масълаҳои ҳамкории дуҷонибаи худро дар шаҳри Душанбе мавриди баррасӣ қарор доданд.

Бино ба иттилои расмӣ, 5-уми июни соли 2023 ҳайатҳои Тоҷикистон ва Бонки ҷаҳонӣ дар Қасри миллат мулоқот карда, масоили ҳамкории кунунӣ ва дурнамои робитаҳои Тоҷикистон бо Бонки ҷаҳониро мавриди баррасӣ қарор доданд.

Ба қавли манбаъ, дар рафти ин мулоқот таъкид шуд, ки дар давоми 30 соли ҳамкориҳо бо ин ниҳоди молӣ аз ҷониби Бонки ҷаҳонӣ барои амалисозии 116 лоиҳа “зиёда аз 2,7 миллиард доллари америкоӣ маблағгузорӣ” шудааст.

Гуфта мешавад, дар рафти ин мулоқот ҳайати Тоҷикистонро Эмомалӣ Раҳмон, Президенти кишвар ва ҳайати Бонки ҷаҳониро хонум Антонелла Бассани, ноиби Президенти ин ниҳоди молӣ раҳбарӣ мекарданд.

Баъд аз боздошту латтукӯби муҳоҷирон Лавров ба Тоҷикистон меравад

Аз ҷониби
AZDA TV
-
0

Сергей Лавров, вазири корҳои хориҷии Русия бо як сафари кории ду рӯза озими Тоҷикистон мешавад. 

Бино ба иттилои Вазорати корҳои хориҷии Русия, ин сафар аз пеш тарҳрезӣ шудааст ва рӯзҳои 5-6-уми июн баргузор мегардад. 

Қарор аст, дар ин сафараш Сергей Лавров бо раисҷумҳури Тоҷикистон Эмомалӣ Раҳмон ва вазири корҳои хориҷии кишвар Сироҷиддин Муҳриддин мулоқот анҷом дода, масъалаҳои минтақавию байналмилалӣ, рушди ҳамкории Маскаву Душанбе дар бахшҳои сиёсат ва иқтисоду тиҷоратро баррасӣ кунанд. 

Инчунин дар назар аст Лавров зимни сафараш ба Тоҷикистон аз Донишгоҳи славянии Тоҷикистону Русия ва пойгоҳи 201-и Русия дар Душанбе боздид кунад. 

Лавров дар ҳоле бо як сафари корӣ ба Тоҷикистон меравад, ки чанд рӯзи ахир боздошту латтукӯб ва ба маконҳои номаълум бурдани муҳоҷирони тоҷик аз ҷониби нерӯҳои амниятӣ ва интизомии Русия шиддаст гирифтааст.

Ҳамарӯза навору садоҳое дар шабакаҳои иҷтимоӣ нашр мешаванд, ки дар он бераҳмии кормандонии амниятии рус нисбати тоҷикон инъикос ёфтааст. 

Маълум нест, ки Эмомалӣ Раҳмон дар мулоқот бо Лавров аз мушкилоти муҳоҷирони тоҷик хоҳад гуфт ё не. 

Додгоҳ эътироф кард, ки Розиқов бо шиканҷа кушта шудааст

Аз ҷониби
AZDA.TV
-
0

Додгоҳи шаҳри Кӯлоб эътироф карда, ки Абдуқаҳҳор Розиқови 37-сола, ки моҳи январи соли ҷорӣ пас аз боздошт ҷон бохта буд, бар асари шиканҷа даргузаштааст.

То ин дам мақомот шиканҷа шудани марҳумро аз ҷониби маъмурони милитсия рад мекарданд ва иддао мекарданд, ки ӯ бар асари истифодаи зиёди маводи мухаддир даргузаштааст.

Додгоҳи шаҳри Кӯлоб мурофиаи се корманди милитсияи ин шаҳрро, ки ба даст доштан дар марги Абдуқаҳҳор Розиқов муттаҳам мешаванд, оғоз кардааст. Гуфта мешавад, ин се корманди пулис ба шиканҷаи Разоқов айбдор мешаванд.

“Азия-Плюс” рӯзи 5-уми июни соли ҷорӣ аз қавли Умед Ниёзов, вакили дифои хонаводаи Розиқовҳо хабар дод, ки “тафтишот се корманди милитсия – Шамшод Шарифов, Зафар Холов ва Ҷамшед Кароматовро бо моддаи 143 иловаи 1-и  қисми 3 (шиканҷа) Кодекси ҷиноятии Тоҷикистон ҶТ айбдор мекунад.“

Гумонбарон қаблан бо иттиҳоми “баромадан аз ҳадди ваколатҳои мансабӣ” (қисми севуми моддаи 316-и Қонуни ҷиноӣ) айбдор мешуданд.

Вакили дифои Розиқовҳо ба ин расона гуфтааст, ки “Баъдан, дар рафти тафтишоти пешакӣ, муфаттишон моддаи 316-ро ба моддаи 143 иловаи 1 қисми 3 (шиканҷа)-и Кодекси ҷиноятии Тоҷикистон бандубаст карда, ба додгоҳ ирсол карданд. Мурофиаи судӣ идома дорад”.

Ёдовар мешавем, ки шаби 2-юми январи соли ҷорӣ кормандони ШВКД-и шаҳри Кӯлоб сокини ин шаҳр Абдуқаҳҳор Розиқови 37-соларо аз хонааш боздошт карда, дертар ҷасадашро ба сардхонаи шаҳр супорида буданд.

Наздикону пайвандонаш дар суҳбат ба расонаҳо гуфта буданд, ки Розиқов дар натиҷаи шиканҷаи мақомот ба ҳалокат расидааст, чун пеш аз даф дар баданаш осори шиканҷа дида мешуд.

Вазорати корҳои дохилии Тоҷикистон сабаби марги Абдуқаҳҳор Розиқовро истеъмоли зиёди “маводи сахттаъсири навъи амфетамин (кристалл)” гуфтааст, аммо наздиконаш инро рад мекунанд.

Баъд аз ин ҳодиса, даҳҳо сокини Кӯлоб рӯзи 3-юми январ дар назди сардхона ё “Морг”-и шаҳри Кӯлоб ҷамъ омада, талаб карда буданд, ки то милитсаҳои гумонбар боздошт нашаванд, аз назди сардхона дур намешаванд. Он шом мақомот се корманди милитсияи дастбастаро ба наздикони Розиқов нишон доданд ва онҳо ҷасадро гирифта бурданд.

Аммо дертар мақомот як нафар аз муттаҳамон – Шамшод Шарифовро баъди ин ҳодиса ба ҳабс гирифта, ду нафари дигар, Зафар Холов ва Ҷамшед Кароматовро бо шарти берун нарафтан аз маҳалли зист раҳо карданд, ки ин боиси дубора ҷамъ омадани сокинони Кӯлоб барои адолатхоҳӣ шуд.

Дар Қирғизистон аз як кудето пешгирӣ шудаст

Аз ҷониби
AZDA.TV
-
0

Кумитаи давлатии амнияти миллии Қирғизистон 5-уми июн аз боздошти гурӯҳе хабар дод, ки ба гуфти ин ниҳод, қасди кудето кардан дар ин кишварро доштаанд.

Хабаргузории қирғизии “24 KG” бо такя ба манобеаш аз КДАМ-и Қирғизистон хабар дод, гурӯҳи мазкур нақша доштаанд бо роҳи зӯри ҳокимияти кониститутсиониро сарнагун карда, қудратро дар ин кишвар ба даст гиранд.

Аммо то ҳанӯз ҳувияти нафарони боздоштшуда ва шумори онҳо маълум нест. Кумитаи давлатии амнияти миллии Қирғизистон низ дар бораи онҳо маълумоте нашр накардааст.

Ҳамзамон назари боздоштшудаҳо низ дастраси расонаҳо нашудааст.

Расонаҳои қирғизӣ аз рафти боздошти кудетогарон наворе нашр кардаанд, ки дида мешавад, нерӯҳои вежа аз мошин поён шуда, дохили як хона мешаванд. Ҷараёни боздошт маълум нест.

Дар ҳамин ҳол бархе корбарон мепурсанд, ки кӯдетогарон чанд нафар будаанд, ки дар дохили як хона ҷамъ шуданд? Одатан чунин гурӯҳҳо шуморашон хеле зиёд аст ва ҳатто дар дохили мақомоти қудратӣ кормандони баландпоя бо онҳо ҳамкорӣ мекунанд. Вале то ҳанӯз хабаре аз боздошти мақомдорони ин кишвар дар робита ба қазияи мазкур нашр нашудааст.

Бархе коршиносони масоили сиёсии минтақа бар ин назаранд, ки маъмулан раҳбарони кишварҳои Осиёи Марказӣ ҳар гурӯҳу ҳаракатҳои дохилиро, ки бихоҳанд аз майдони сиёсат дур бизананд, аз ҳамин шева кор мегиранд. Ва онҳоро ба унвони кудетогарон боздошту зиндонӣ мекунанд.

Даргирӣ байни нерӯҳио Ҷабҳаи муқовимати миллии Афғонистон ва Толибон

Аз ҷониби
AZDA.TV
-
0

Ҷабҳаи муқовимати миллии Афғонистон, ки раҳбарии онро Аҳмад Масъуд, фарзанди Аҳмадшоҳ Масъуд бар уҳда дорад, аз як ҳамлаи худ дар вилояти Тахори Афғонистон хабар дод.

Бино ба иддаои ин ҷунбиши мардумии Панҷшер, шаби гузашта нерӯҳои ин ҷабҳа ба сохтмони вулусволии Баҳораки вилояти Тахор ҳамла карда, чор тан аз нерӯҳои Толибонро кушта ва панҷ нафари дигари онҳоро захмӣ кардаанд.

Дар хабари ин ҷабҳа гуфта мешавад, ки нерӯҳои он аввал чандин мушак бар сохтмони вулусволии Баҳорак шиллик карда, сипас бо нерӯҳои Толибон даргир шудаанд.

Тибқи иттилои Ожонси хабарии “Бохтар”, захмиёни Толибон барои дармон ба бемористони вилоти Тахор дар шаҳри Толиқон мунтақил шудаанд.

Аммо, дар аҳмин ҳол раиси амнияти Толибон дар вилояти Тахор иддаои Ҷабҳаи муқовимати миллии Афғонистонро мабнӣ бар ҳамла бар сохтмони вудусволии Баҳорак ва кушта шудани нерӯҳои худро рад кардааст.

1...192193194...675саҳифаи 193 аз 675

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
clear sky
21.1 ° C
21.1 °
21.1 °
40 %
2kmh
0 %
Sat
37 °
Sun
38 °
Mon
39 °
Tue
38 °
Wed
38 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст