Ҳукумати вилояти Суғд барои таҷлили ҷашни Наврӯз ва пешвози Эмомалӣ Раҳмон 19 ҳазор нафарро ба “маршировка” ҷалб кардааст.

Акс аз Asia-Plus
Тамрини барномаи фарҳангӣ ё “маршировка”-и Наврӯзи ҷумҳуриявии имсола аз аввали моҳи март дар чанд минтақаи шаҳри Хуҷанд оғоз шуда, ба он 19 ҳазор нафар, аз ҷумла кормандони соҳаи фарҳанги шаҳру ноҳияҳои кишвар ва ҳудуди 12 ҳазор нафар донишҷӯёну хонандагони мактаб ҷалб шудаанд.

Як манбаъ аз ҳукумати вилояти Суғд ба “Азия-плюс” гуфта, ки барномаи фарҳангӣ ва асосии Наврӯзи ҷумҳуриявии имсола охири моҳи март бо ҳузури раисҷумҳур Эмомалӣ Раҳмон дар варзишгоҳи “20- солагии Истиқлолият” – и шаҳри Хуҷанд баргузор мегардад ва роҳбари бадеии чорабинии наврӯзӣ Баҳриддин Раҷабов аз шаҳри Душанбе таъин гардидааст.

Ба гуфтаи манбаъ, “дар чорабинии фарҳангӣ ва театрикунонидашуда расму оинҳои наврӯзӣ, урфу одат, анъанаҳои миллӣ, дастовардҳои замони истиқлолият намоиш дода мешаванд. Барои дар сатҳи баланд баргузор гаштани он ситод ҳам таъсис ёфта, ҳамрӯза корбарӣ мекунанд”.

Гуфта мешавад, “маршировка” аввал дар 4-5 минтақаи шаҳри Хуҷанд баргузор шуда ва наздики як ҳафта мешавад, ки ҳамаро ба  варзишгоҳи “20-солагии Истиқлолият” ҷамъ овардаанд ва онҷо тамринҳоро аз субҳ то бегоҳ идома медиҳанд.

Як донишҷӯ, ки дар ин “маршировка” ширкат мекунад, гуфтааст, маъмурияти донишгоҳ онҳоро аз дарс озод карда, ваъда додаанд, ки дар вақти санҷишу имтиҳонҳо дастгирӣ мекунанд.

То ҳол торихи дақиқи баргузори ҷашни Наврӯзи имсола маълум нест, аммо тибқи маълумоти Хадамоти матбуоти Президенти Тоҷикистон Эмомалӣ Раҳмон аз 29 то 31-уми март ба вилояти Суғд сафар хоҳад кард.

Ҳамасола бахшида ба ҷашнҳои давлатӣ дар Тоҷикистон “маршировка” бо иштироки донишҷуён баргузор мегардад ва ҳамеша баҳси ҷалби донишҷӯён ба ин ҷашнҳо доғ боқӣ мемонад. Барои мисол садҳо донишҷӯи донишгоҳҳои кишвар ва мактабҳои миёна соли нави таҳсилро дар “маршировка” оғоз мекунанд ё дар байни сол ба он ҷалб карда мешаванд, ки ин боиси аз дарсҳо ақиб мондани хонандагон мегардад

Чанд нафар аз иштирокдорони маршировкаҳо дар суҳбат ба Azda.tv гуфта буданд, ки интихоби онҳо аз ҷониби раҳбарияти донишгоҳҳо сурат гирифта, ҷалби онҳо ба раҳпаймоӣ маҷбурӣ будааст.  Ба гуфтаи онҳо, дар ҳолати саркашӣ кардан, масъулони донишгоҳ онҳоро бо хориҷ аз донишгоҳу мушкил эҷод кардан ҳангоми супоридани санҷишу имтиҳонот таҳдид мекунанд.

Дар гузашта нафароне, ки дар “маршировка”-ҳо иштирок мекарданд? гуфта буданд, ки дар аксар ҳолатҳо масъулин ба гармии ҳаво нигоҳ накарда, тамринро идома медоданд, ки боиси бемории чандин нафар гашта буд.

Инчунин донишҷӯён аз нарасидани обу хӯрок ва надодани ҳамаи масрафи роҳашон, ки аз ҷониби мақомот барои он маблағ ҷудо мешавад, шикоят карда буданд.

Вазорати маориф ва илми Тоҷикистон ин гуна хабарҳоро рад карда мегӯяд, ки ҷалби донишҷӯён ба “маршировка” маҷбурӣ набуда ва иштирок дар он маънои ватандӯстиро дорад.

Мақомоти Кумитаи ҳолатҳои фавқулоддаи Тоҷикистон зарарҳои расида аз заминларзи рӯзи 23-уми мартро эълон кард. Яке аз сабаби аслии вайрон шудани хонаҳо надоштани таҳкурсӣ гуфта мешавад.

Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон 27-уми марти соли ҷорӣ дар истинодан ба хулосаи Комиссияи ҳолатҳои фавқулоддаи вилояти Суғд иттилоъ дод, ки “зиминларзаи рӯзи 23 марти соли 2023 дар ҳудуди ноҳияи Кӯҳистони Мастчоҳ 318 ҳолати зарар ба хонаҳои истиқоматии деҳаҳои Палдорак, Ярм Пакшифи Деҳмонара, Дашти миёна, Роғ, Самҷон, Пакшифи ҷамоати деҳоти Лангар ба қайд гирифта шуд.”

Мақомти КҲФ мегӯянд, ки дар деҳаҳои номбурдаи ноҳияи Кӯҳистони Мастчоҳ бар асари заминларза биноҳои ёрирасони хоҷагиҳо вайрон гардида, дар натиҷа чорвоҳои хурду калон, аз ҷумла “18 сар чорвои калон ва 27 сар моли майда” талаф ёфтааст.

Тибқи иттилои Комиссияи ҳолатҳои фавқулоддаи вилояти Суғд 165 хона дар деҳаи Палдорак зарар дидаанд. Аз ҷумла, дар ин русто 4 хона пурра хароб шуда, 37 хона қисман зарар дидаанд ва ба 124 хона осеби сабук расидааст.

Шумори деҳаҳои зарардида дар деҳаи Ярм 23 адад буда, 7 хона қисман ва 16 хона зарари сабук дидаанд. Ҳамчунин дар 6 деҳаи дигари ин ноҳия дар умум 86 хонаи дигар осебҳои сабук дидаанд.

Комиссияи КҲФ мегӯяд, дар ноҳияи Рашт бар асари ин заминларза дар 7 деҳаи ин ноҳияи кӯҳистонӣ 32 хона зарари сабук дидаанд. Аммо дар ноҳияи Нуробод бошад, ба 17 хона зарарҳои сабук ворид шудааст. Ва хушбахтона, талафоти ҷонии одамон ба қайд гирифта нашудааст.

Комиссияи ҳолатҳои фақулода дар хулосаи худ сабаби аслии тахриб шудани хонаҳои сокинон ва иншооти ёрирасонро дар “риоя нагардидани меъёру қоидаҳои сохтмонӣ, бетаҳкурсӣ бунёд гардидани хонаҳо, пешбинӣ нашудани чораҳои зидди зилзилавӣ ва истифодабарии тулонии онҳо” овардааст.

Нашри омори хисороти ворида аз зилзилаи рӯзи 23-уми март дар ҳолест, ки аз ин ҳодиса аллакай 5 рӯз гузашта ва мақомоти КҲФ мегӯянд, ҳанӯз ҳисобот идома дорад.