Сокинони шаҳри Котелникии вилояти Маскав дар муроҷиати навбатиашон ба Путин аз тафтиши нерӯҳои амниятӣ болои муҳоҷирон ҳимоят карда, хостаанд он идома ёбад.
Гуфта мешавад, ин видео дар посух ба навори намозгузорони ин шаҳр, ки дар муроҷиате ба Путин аз рафтори хашин ва ғайриқонунии кормадони мақомоти амниятии Русия дар баробари намозгузорон шикоят карда, хоста буданд, ки аз таҳқири мусалмонон ҷилавгирӣ кунад, сабт шудааст.
Дар навор сокинони Котелники ба ҳимояи мақомоти ҳифзи ҳуҳуқ бархоста, иддао доранд, ки тамоми амалҳои онҳо дар доираи қонун ва дар асоси аризаи шаҳрвандон сурат гирифтааст.
Сокинони ин шаҳр иддао доранд, ки баръакс, муҳоҷирон аз Тоҷикистон, Афғонистон, Узбекистон ва Қирғистон, ки гӯё 80 дарсади намозгузоронро дар ин марказ ташкил медоданд, ҳангоми тафтиш муқовимат нишон доданд.
Муроҷиаткунандагон дар ин навор аз Путин талаб доранд, ки мақомоти амниятӣ бояд тафтиши муҳоҷиронро идома диҳанд, чун дигар ин тавр зиндагӣ карда наметавонанд.
“Мо на Фаронса ҳастем, на Косово, ки онҷо бетартибиҳо идома доранд. Дар хонаи мо бояд тартибот бошад. Фарзандони мо бояд дар амон бошанд. Пеши роҳи вуруди муҳоҷирон ба кишварамон бояд гирифта шавад. Дар акси ҳол, таркиши иҷтимоӣ ба амал меояд. Чун онҳо аллакай ошкоро ба мо мегӯянд, ки мо дар ин ҷо зиндагӣ мекунем, на шумо” – мегӯянд сокинони ин минтақа.
Ёдовар мешавем, ки рӯзи 10-уми июл дар шабакаи ютубии “Идораи динии мусалмонони вилояти Маскав” наворе нашр шуд, дар он гурӯҳе аз намозгузорон дар бораи ҳодисаи рӯзи ҷумъаи ҳафтаи гузашта нақл мекунанд, ки он рӯз ҳангоми гузоштани намози ҷумъа гурӯҳе аз кормандони ОМОН вориди масҷид шуда, намозгузоронро таҳқир карда, бо рафтори дағалона талош карданд намозгузоронро пароканда кунанд.
Ба гуфтаи онҳо, кормандони ОМОН бо пойафзол вориди масҷид шуданд ва нисбати намозгузорон, ки аксарашон шаҳрвандони Русия мебошанд, аз нерӯ истифода карданд.
Намозгузорони ин масҷид аз Путин хостаанд, ки аз таҳқири мусалмонон ҷилавгирӣ кунанд ва нисбат ба вайронкунандагони қонун чораҳои сахт биандешад.
Кирилл Кабанов, раиси Кумитаи миллии мубориза бо фасод дар шабакаи телеграми худ гуфтааст, ки пас аз муроҷиати намозгузорони Котелники сокинони маҳаллаи Южнийи ин шаҳр ба унвони раиси Кумитаи тафтишотӣ Александр Бастрикин бо дархости тафтиши ин муроҷиатҳо барои ифротгароӣ ва барангехтани адовати миллӣ, нома навиштаанд.
Гуфта мешавад, пештар аз ин дар миёнаҳои моҳи майи соли ҷорӣ чанд тан аз сокинони шаҳри Котелники дар муроҷиати видеоие ба президенти Русия Владимир Путин аз “қонуншиканӣ” ва зиёд шудани муҳоҷирон дар ин шаҳр шикоят карда буданд.
Инчунин, чанд вакили парлумон ва мақомдорони рус бо изҳоротҳои зидди муҳоҷирон баромад карда, хоста буданд барои муҳоҷирон виза ҷорӣ шавад, вуруди онҳо ба кишвар манъ шавад ё ба ҷанг бурда шаванд.
Баъд аз ин муроҷиатҳо дар аксари шаҳру ноҳияҳои Русия “рейд”-и густурдаи муҳоҷирон оғоз шуд.
То ин муддат дар шабакаҳои иҷтимоӣ наворҳои зиёде нашр шуда, ки дар онҳо дида мешавад, мақомоти интизомии ин кишвар муҳоҷиронро гурӯҳ-гурӯҳ боздошт намуда, ба боздоштгоҳҳо мебаранд. Инчунин, дар баъзе наворҳо дида мешавад, ки муҳоҷирон дастҳо пушти сар дар замин хобидаанд ва аз ҷониби мақомоти рус нисбати онҳо таҳқир ва рафтори номуносиб сурат мегирад.
Ба гуфтаи муҳоҷирон, мақомоти рус ҳам шаб ва ҳам рӯз ҷойи кор ва макони истиқомати онҳоро тафтиш намуда, чи аснод дошта бошанд чи на, ҳамаро якҷоя боздошт мекунанд. Вале, ба гуфтаи муҳоҷирон, касе ҳуҷҷатҳои лозимаро дошта бошад, озод мекунанд, аммо онҳое, ки ҳуҷҷат надоранд боздошту ихроҷ мешаванд ва ҳатто тибқи хабарҳои тасдиқнашуда, муҳоҷирони боздоштшударо ба ҷанги Украина ҷалб кардаанд.
Идораи динии мусалмонони вилояти Маскав бо нашри изҳороте амали афсарони ОМОН-ро дар вақти “рейд”-ҳо “ваҳшиёна” номида, онро тафтиши таҳқиромез номид ва онро аз рӯи усулаш бештар на ба тафтиши ҳуҷҷатҳо, балки ба амалиёти боздошти ҷинояткорони махсусан хавфнок монанд карда буд.
